1-2. Cossa che ndaremo veder in questo stùdio?

TANTI servi de Geovà nel passà i ze restadi tanto desanimadi e arquanti i ga volesto fin morir. (1 Rè 19:2-4; Giò 3:1-3, 11; 7:15, 16) Parché? Parché i umani i vive poco e i sofre tanto. (Giò 14:1) Ma lori i se fidea in Geovà e lu el ghe ga sempre giutà e consolà. Dele volte, anca noantri se sentimo desanimadi. Ma noantri semo consoladi quando studiemo i so esempi nela Bìblia. — Rom. 15:4.

² In questo stùdio, ndaremo veder el esémpio de Giusepe, el fiol de Giacò, dela védova Noemi e dela so nora Rute, del levita che el ga scrito el Salmo 73 e del apòstolo Piero. Tuti lori i ga infrontà tante dificoltà e i ze restadi tanto desanimadi. Ma come Geovà el ghe ga incoraià? Cossa che podemo imparar dei so esempi? Studiar sora questo ndarà far pi forte la nostra confiansa de che Geovà l’è darente de quei che i ga “el cuor pien de tristessa” e che “lu el salva quei che i ze desanimadi”. — Sal. 34:18.

3-4. Cossa che ga sucedesto con Giusepe quando lu l’era gióveno?

³ Quando Giusepe el gavea intorno de 17 ani, Dio lo ga fato insognarse due volte. I sogni i mostrea che Giusepe el ndaria esser una persona importante e che el gavaria el rispeto dela so fameia. (Gén. 37:5-10) Ma poco tempo dopo, tuta la vita de Giusepe la ga cambià. Invesse de rispetarlo, i fradei de Giusepe i lo ga vendesto e lu l’è deventà un schiavo de Potifar, nel Egito. (Gén. 37:21-28) De colpo lu el ga assà de esser un fiol amà,  l’è deventà un schiavo sensa valor nel Egito e el ga scominsià a laorar par una persona che no la cognossea a Geovà. — Gén. 39:1.

⁴ La vita de Giusepe la ze restada ancora pedo parché la sposa de Potifar la ga dito che lu el ga proà violentarla. Potifar no’l ga fato sforso par saver se quela roba la gavea pròpio sucedesto. Invesse, suito lo ga metesto in preson e Giusepe l’è restà incadenà lì. (Gén. 39:14-20; Sal. 105:17, 18) Fursi Giusepe, che l’era sol un gióveno, l’è restà tanto desanimà con quel che gavea sucedesto. Pol esser che lu el se preocupesse con quel che le persone le ndaria pensar sora Geovà par causa de quela busia.

5. Cossa che ga giutà a Giusepe?

⁵ Giusepe no’l podea far gnente par cambiar quel che l’era drio suceder con lu. Ma cossa che ga giutà a Giusepe? Giusepe no’l seitea pensar nele robe che lu no’l podea far. Invesse, lu el se sforsea de far ben i laori che lu el gavea e de contentar a Geovà, che l’era la persona pi importante par lu. Cossita, col aiuto de Geovà, tuto quel che Giusepe el fea ndea ben. — Gén. 39:21-23.

6. Come i sogni de Giusepe i lo ga giutà?

⁶ Nantra roba che ga giutà a Giusepe l’è stato pensar nei sogni che lu el ga bio. Parché? Parché i sogni i mostrea che lu el ndaria veder la so fameia nantra volta e che la so vita la ndaria restar meio. Quando Giusepe el gavea intorno de 37 ani, i so sogni i ga scominsià a realisarse de una maniera maraveiosa! — Gén. 37:7, 9, 10; 42:6, 9.

7. De acordo con 1 Piero 5:10, cossa che ndarà giutarne quando infrontemo dificoltà?

⁷ Cossa che noantri imparemo? Quel che ga sucedesto con Giusepe ne ricorda che el mondo l’è tanto rugno e che podemo sofrir ingiustìssie. Podemo anca restar desanimadi par causa de qualcossa che un fradel el ne ga fato. Ma cossa che ndarà giutarne a no abandonar a Geovà e no restar desanimadi? Veder a Geovà  come la nostra protession. (Sal. 62:6, 7; ledi 1 Piero 5:10. *) Noantri podemo imparar nantra roba de quel che ga sucedesto con Giusepe. Lu el gavea intorno de 17 ani quando Geovà lo ga fato insognarse con quele bele robe. Alora, sicuro che anca ancoi Geovà el se fida nei gióveni che i ze fedeli a lu. Par esémpio, arquanti gióveni i seita fedeli a Geovà anca che i sìpia metesti in preson par causa dela so lealtà a lu. — Sal. 110:3.

8. Cossa che ga sucedesto con Noemi e Rute?

⁸ Noemi e la so fameia i era de star in Giudà. Alora, lori i ga scominsià a patir de fame e ghe ga tocà ndar a Moabe. In quel posto, el so omo de Noemi, Elimeleche, l’è morto e ela la ze restada sola coi due fioi. Dopo de un tempo, i fioi de Noemi i se ga maridà con due done moabite, che le era Rute e Orpa. Alora, intorno de 10 ani dopo, i fioi de Noemi i ze morti sensa gaver fioi. (Rute 1:1-5) Sicuro che Noemi, Rute e Orpa le ze restade tanto desanimade! Rute e Orpa le podea maridarse nantra volta, ma Noemi la era belche vècia e no la gavea nissuni par ténderla. Noemi la era tanto desanimada, che la ga dito: “No sté mia ciamarme de Noemi. Gavé de ciamarme de Mara, parché el Tuto Poderoso el ga fato la me vita deventar tanto amara.” Dopo de tuto questo, Noemi la ga dessidio tornar a Belen e Rute la ze ndata insieme. — Rute 1:7, 18-20.

9. De acordo con Rute 1:16, 17, 22, come Rute la ga giutà a Noemi?

⁹ Cossa che ga giutà Noemi a infrontar quela bruta situassion? L’è stato el amor leal. Par esémpio, Rute la ga mostrà el amor leal a Noemi parché la ga dessidio restar insieme con ela. (Ledi Rute 1:16, 17, * 22. *) In Belen, Rute la ga laorà tanto par tor su quel che vansea nei campi e cossita, ela e Noemi le gavea de magnar. Le persone le vedea Rute come una brava dona. — Rute 3:11; 4:15.

10. Come che Geovà el ga mostrà amor ai poareti come Noemi e Rute?

¹⁰ Come che Geovà el ga mostrà amor ai poareti? Par meso de una lege che Geovà el gavea dato ai israeliti, che la assea i poareti tor su quel che vansea nei campi. Questa lege la disea che, quando le persone le era drio tor su, lore le gavea de assar un poco indrio par i poareti. (Lev. 19:9, 10) Questa lege la ga giutà tanto a Noemi e Rute, parché cossita lore le gavea de magnar sensa domandarlo ai altri.

11-12. Come Boaz el ga giutà a Noemi e Rute?

¹¹ Rute la tolea su quel che vansea dei campi de un omo sior, che el gavea nome Boaz. Boaz l’è restà maraveià col amor e lealtà de Rute con Noemi. Alora, Boaz el se ga maridà con Rute e el ga comprà la tera che la era dela fameia de Noemi. Cossita, i fioi de Rute i podaria ereditar le tere. (Rute 4:9-13) Boaz e Rute i ga bio un fiol che gavea nome Obede, che l’è stato el nono del rè Davi. — Rute 4:17.

¹² Sicuro che Noemi la ze restada tanto contenta e la ga ringrassià a Geovà par causa de Obede. Noemi e Rute le ndarà restar ancora pi contente nela ressuression, quando le ndarà saver che Obede l’è stato un dei antenati del Messia, Gesù Cristo!

13. Cossa che imparemo de quel che ga sucedesto con Noemi e Rute?

 ¹³ Cossa che noantri imparemo? Pol suceder de noantri restar tanto desanimadi par causa dei problemi che infrontemo. Fursi noantri pensemo che no saremo boni de dàrghene fora con lori. Ma in queste situassion, noantri ghemo de fidarse del tuto in Geovà e esser darente dei nostri fradei. Noantri imparemo ancora nantra roba de quel che ga sucedesto con Noemi. Geovà no’l ga ressussità el so omo e i so fioi. Cossita capimo che Geovà no’l ndarà finir con tuti i nostri problemi. Ma Geovà el pol doperar i nostri fradei par far arquante robe che le pol giutarne. — Pro. 17:17.

14. Parché che un levita l’è restà desanimà?

¹⁴ El scritor del Salmo 73 l’era levita. Cossita, lu el gavea la oportunità de servir nela casa de Geovà. Ma nte una època dela so vita, anca lu l’è restà desanimà. Parché? Parché el ga scominsià a gaver invìdia dei rugni e dei orgoliosi e ghe parea che lori i gavea una vita meio che lu. (Sal. 73:2-9, 11-14) Lu el pensea che queste persone le gavea tuto: soldi, una bona vita e gnanca una ansietà. Lu l’è restà tanto desanimà e el ga dito: “L’è stato par gnente mantegnerme neto, sensa sbàlio e sensa colpa.” Se lu el seitesse a pensar cossita, lu el ndaria fermarse de servir a Geovà.

15. De acordo col Salmo 73:16-19, 22-25, cossa che el levita el ga fato par no seitar desanimà?

¹⁵ Ledi Salmo 73:16-19, * 22-25. * El levita l’è stato bon de nò restar pi desanimà parché lu l’è ndato rento del grandioso santuàrio de Dio. In quel posto, intrà le persone che le adorea a Geovà, lu l’è stato bon de pregar a Dio e de pensar dela maniera giusta. Alora, el se ga  nicorto che l’era sbalià pensar cossita e che el podaria perder la so amicìssia con Geovà se el seitesse a farlo. El levita anca el ga visto che i rugni i ze “nte un posto che sbrìssia” e che “i sarà finidi fora”. El levita el saria bon de fermarse de gaver invìdia e de restar desanimà se el pensasse dela medèsima maniera che Geovà el pensa. Alora, quando lu el ga fato questo, lu l’è stato bon de sentir pace e alegria. Lu el ga dito a Geovà: “Nela tera, l’è sol a ti che mi vui.”

16. Cossa che imparemo col esémpio del levita?

¹⁶ Cossa che noantri imparemo? Noantri no ghemo mai de sentir invìdia dei rugni, che ne par che i ga una bona vita. La felicità de queste persone no la ze mia vera e la se finisse, parché lore no le ndarà gaver la vita eterna. (Ecl. 8:12, 13) Se noantri sentimo invìdia de lore, noantri podemo restar desanimadi e perder la nostra amicìssia con Geovà. Se ti te senti invìdia, fà el medèsimo che el levita el ga fato. Cossa? Scolta i consili de Geovà, sìpia amigo de quei che i serve a lu e ama a Geovà de pi che qualche altra roba. Cossita, ti te ndarè gaver la vera alegria e te sarè bon de seitar nela strada dela “vera vita”. — 1 Tim. 6:19.

17. Parché che Piero fursi l’è restà desanimà?

¹⁷ El apòstolo Piero l’era sempre disposto, ma dele volte lu no’l pensea vanti de far o parlar qualcossa. Cossita, tante volte lu el se ciamea gramo de quel che el gavea fato o parlà. Par esémpio, quando Gesù el ga dito ai apòstoli che lu el ndaria sofrir e morir, Piero el ga dito: “Questo no’l ndarà suceder.” (Mat. 16:21-23) Gesù el ga dito a Piero che quel che lu el gavea parlà no l’era mia giusto. Un tempo dopo, quando i òmini i ze ndati ciapar Gesù, Piero no’l ga pensà prima e el ga taià la récia del schiavo del somo sasserdote. (Gioani 18:10, 11) Nantra volta, Gesù el ga bio de parlarghe che el gavea fato una roba sbaliada. In nantra situassion, Piero el ga dito che no’l ndaria mai abandonar a Gesù ancora che i altri apòstoli i fesse  questo. (Mat. 26:33) Ma quando lu el gavea de esser coraioso par parlar, el ga dito tre volte che no’l cognossea a Gesù. Piero l’è restà tanto desanimà e el ga piandesto tanto. (Mat. 26:69-75) Fursi lu el ga pensà che Gesù mai ndaria perdonarlo.

18. Come Gesù el ga giutà Piero?

¹⁸ Piero no’l se ga fermà de servir a Geovà parché lu l’era desanimà. Dopo che lu el ga fato sbali, el se ga ciamà gramo e el ga seità a servir insieme dei apòstoli. (Gioani 21:1-3; Ati 1:15, 16) Cossa che ga giutà Piero a no seitar desanimà? Gesù el ga domandà a Geovà che lo giutesse a gaver una forte fede e el ga incoraià Piero a tornar e giutar i so fradei. Geovà el ga scoltà Gesù. Dopo de un tempo, Gesù el se ga fato veder a Piero, fursi par incoraiarlo. (Luc. 22:32; 24:33, 34; 1 Cor. 15:5) Dopo che i apòstoli no i ga bio una bona pescaria, Gesù el se ga fato veder anca a lori e el ga dato la oportunità a Piero de parlar che lo amea. Sicuro che Gesù el gavea perdonà el so caro amigo Piero e el ghe ga dato de pi laori. — Gioani 21:15-17.

19. Come el Salmo 103:13, 14 el ne giuta a pensar dela medèsima maniera che Geovà?

¹⁹ Cossa che noantri imparemo? Gesù el imitea de maniera perfeta le qualità del so Pare. Alora, lu el ga tratà Piero con misericòrdia. Sàtana el vol che noantri pensemo che Geovà no’l perdona i nostri sbali. Ma quando noantri sbaliemo, ghemo de far sforso par pensar dela medèsima maniera che Geovà. Geovà el mostra amor e el ne perdona. L’è cossita che ghemo de pensar sora noantri e anca sora i altri che i ne disgusta. — Ledi Salmo 103:13, 14. *

20. Cossa che ndaremo veder nel pròssimo stùdio?

²⁰ Quando noantri studiemo i esempi de Giusepe, de Noemi e Rute, del levita e de Piero, noantri semo ancora pi sicuri che Geovà l’è darente de quei che i ga “el cuor pien de tristessa”. (Sal. 34:18) Geovà el assa che noantri infrontemo arquante dificoltà. Ma lu el ne giuta a perseverar e cossita la nostra fede la resta pi forte. (1 Pie. 1:6, 7) Nel pròssimo stùdio, ndaremo veder come Geovà el giuta ai so servi quando i ze desanimadi par causa dele imperfession o dele dificoltà.