Seto questo?
Cossa che le persone le fea nei portoni dele cità nei tempi dela Bìblia?
I PORTONI dele cità no i era mia sol posti par ndar rento ala cità. Tante persone le passea par questi portoni, alora lì, sucedea tante robe tuti i giorni. La Bìblia la parla dei portoni dele cità de pi de 50 volte e la parla de quel che sucedea lì.
Nei portoni dele cità, le persone le passea tempo insieme. La parola ebraica par “porton” no vol mia dir sol una porta davanti ala cità. Ma la vol dir anca un posto ndove le persone le fea su qualche pìcola costrussion, o le metea tende o barache. In arquante cità, rento dei portoni, ghen’era grande piasse ndove le persone le podea catarse. — Nee. 8:1.
Darente dei portoni dele cità, i comersianti i vendea. In Gerusalen, arquanti portoni i ga ciapà el nome del prodoto che se vendea lì. Par esémpio, ghen’era el Porton del Pesse e el Porton dele Piégore. — Sof. 1:10; Gio. 5:2.
I portoni dele cità i era posti ndove sucedea tante robe dela vita
Nei portoni dele cità, le persone le ndea comprar e vender ma anca par far altre robe che le gavea de bisogno. Abraon e Boaz i ga fato acordi davanti a testimònie nei portoni dele cità. (Gén. 23:10-15, 17, 18; Rut. 4:1, 10) Arquanti che viaiea i dormia nele piasse darente dei portoni dele cità se nissun li convidea par ndar nela so casa. (Giui. 19:15-21) Anca, le persone le ndea nei portoni dele cità par scoltar le ùltime notìssie. — 2 Sam. 18:24, 25.
Darente dei portoni dele cità, i giuisi i fea i giulgamenti. Lori i giulghea davanti testimònie che le podea scoltar quel che le persone le disea e anca el risultà del giulgamento. (Deu. 21:18-20) Come questi giulgamenti i era fati davanti a tante persone, i giuisi i era insentivadi a far un giulgamento pi giusto. Dopo che i giuisi i fea la dessision, i ofissiai i fea suito quel che i gavea dessidio. (Deu. 25:2) Nei portoni dele cità, le persone le spetea che i giuisi i tratesse le persone con giustìssia, i se comportesse ben e che i incoraiesse anca i altri a far compagno. — Deu. 16:18-20; Giò 29:7, 11-17.
Òmini fedeli i incoraiea le persone de Israel che le era nei portoni dele cità a fidarse in Geovà. Profeti e altri i proclamea i so messagi nei portoni dele cità parché i savea che lì le persone le se riunia. (1 Rè 22:10; Ger. 17:19, 20) Par esémpio, el rè Geù el ga dito davanti a tute le persone che Geovà el gavea realisà la so promessa de castigar la casa de Acabe. (2 Rè 10:8-10) El rè Ezechia el ga riunio i paroni dei soldadi nte un porton dela cità par incoraiarli a fidarse nel aiuto de Geovà. — 2 Cró. 32:6-8.
La Bìblia la dise che ‘la vera sabedoria la osa nei portoni dela cità’. (Pro. 1:20, 21) Nel Israel antigo, òmini fedeli i dea consili sabi. Anca, l’è stà nei portoni che le ze state fate bone dessision. Ancoi, la sabedoria de Geovà la ze nela Bìblia, e i so servi de tuto el mondo i ze drio giutar le persone a catar la sabedoria nela Bìblia.
