1 Salonikaliklarga 5:1-28
5 Birodarlar, vaqt va muddatlarga kelsak, ular haqida sizlarga yozishning hojati yo‘q.
2 O‘zlaringiz ham yaxshi bilasizlarki, Yahovaning* kuni+ o‘g‘ri tunda kelgandek keladi+.
3 Odamlar: «Tinchlik va xavfsizlik!» — deb yurishganda, homilador ayolni to‘lg‘oq tutib qolganidek, ular nogahon halokatga duchor bo‘lishadi+. Ular sira qochib qutula olishmaydi.
4 Lekin siz birodarlar, o‘sha kun to‘satdan kelganda uning qo‘liga tushmaysizlar, sababi siz o‘g‘rilar kabi qorong‘ilikda emassizlar.
5 Zero sizlar nur va kunduzning o‘g‘illarisiz+. Bizlar na tunga, na zulmatga tegishlimiz+.
6 Xullas kelinglar, boshqalarga o‘xshab uxlamaylik+, ammo hushyor turib+, sergaklikni saqlaylik+.
7 Uxlayotganlar tunda uxlashadi va ichib olganlar kechasi mast bo‘lishadi+.
8 Ammo biz kunduzga tegishli bo‘lganlar, kelinglar, hushyorlikni saqlab, imon va muhabbat sovutini, najot umidini dubulg‘adek kiyib olaylik+.
9 Boisi, Tangri bizni O‘zining qahriga mubtalo qilish uchun emas, aksincha, Hazratimiz Iso Masih orqali qutqarilish uchun tanladi+.
10 Iso Masih biz uchun o‘lgan ekan+, hushyormizmi, uyqudamizmi*, biz hamisha u bilan yashashimiz kerak+.
11 Shu sababli, hozir ham qilayotganingizdek, bir-biringizga dalda berib, bir-biringizni qo‘llab-quvvatlanglar+.
12 Birodarlar, orangizda zo‘r berib mehnat qilayotganlarni, Hazratimizning ishida sizlarni boshqarayotganlarni hamda sizlarga nasihat berayotganlarni hurmat qilishingizni iltimos qilamiz.
13 Shuningdek, bajarayotgan ishlari uchun ularga ehtirom ko‘rsatib, sevinglar+. O‘zaro tinch-totuv yashanglar+.
14 Birodarlar, sizlarga nasihatimiz shu: tartibni buzayotganlarni ogohlantiringlar*+, ruhi tushganlarga tasalli beringlar, kuchsizlarga yordamlashinglar, hamma odamlarga sabr-toqatli bo‘linglar+.
15 Hech bir kishi yomonlik evaziga yomonlik qaytarmasin+, aksincha, bir-biringizga hamda boshqalarga yaxshilik qilishga intilinglar+.
16 Doimo xursand bo‘linglar+.
17 Tinmay ibodat qilinglar+.
18 Har narsa uchun minnatdorchilik bildiringlar+. Chunki Iso Masihning izdoshlari bo‘lgan sizlarga nisbatan Allohning irodasi shudir.
19 Xudoning ruhi sizlarda amal qilishiga to‘sqinlik qilmanglar*+.
20 Bashoratlarga beparvo bo‘lmanglar+.
21 Har narsani tekshirib ko‘rib+, yaxshisiga yopishib olinglar.
22 Har qanday yomonlikdan o‘zingizni chetga tortinglar+.
23 Tinchlik Xudosi sizlarni butunlay muqaddas qilsin. Hazratimiz Iso Masihning hozir bo‘lish payti davomida ruhingiz, joningiz* va tanangiz har tomonlama benuqson bo‘lib qolsin+.
24 Sizlarni da’vat etgan Alloh ishonchlidir va U buni qiladi.
25 Birodarlar, bundan buyon ham biz uchun ibodat qilinglar+.
26 Barcha birodarlarni birodarlik sevgisi ila o‘pib qarshi olinglar.
27 Bu maktubni hamma birodarlarga o‘qib berish mas’uliyatini Hazratimiz oldida zimmangizga yuklayman+.
28 Hazratimiz Iso Masihning inoyati sizlarga yor bo‘lsin.
Izohlar
^ Yoki «o‘lim uyqusidamizmi».
^ Yoki «tartibni buzayotganlarga pand-nasihat qilinglar».
^ So‘zma-so‘z «ruhning alangasini o‘chirmanglar».
