Mushkul vaziyat yoki ofat odamlarning sog‘lig‘iga ko‘p tomonlama salbiy ta’sir qilishi mumkin.

• Noxush voqealar insonlarni stressga soladi. Uzoq davom etgan stress esa ularning kasallikka chalinish ehtimolini oshiradi.

• Ofatlar-u pandemiyalar sog‘liqni saqlash tizimiga zarar keltirishi va dori-darmon yetishmovchiligiga olib kelishi mumkin.

• Falokatlar odamlarning moddiy ahvolini og‘irlashtiradi va ular oziq-ovqat hamda dori-darmon kabi eng zaruriy narsalarni sotib ololmaydi.

• Jiddiy kasallik va aqliy zo‘riqish noto‘g‘ri qarorlar chiqarishingizga va sog‘lig‘ingizga yaxshi ta’sir qiladigan odatlarni tashlab qo‘yishingizga olib kelishi mumkin. Natijada sog‘lig‘ingiz yanada yomonlashishi hech gap emas.

• Sog‘liq muammolariga beparvo bo‘lsangiz, kasalliklaringiz kuchayib, hatto hayotingiz uchun xavf tug‘dirishi mumkin.

• Sog‘lig‘ingiz yaxshi bo‘lsa, qiyin vaziyatlarda ham to‘g‘ri qarorlar chiqara olasiz.

• Moddiy sharoitingiz qanday bo‘lishidan qat’i nazar, sog‘lig‘ingizni asrash uchun muayyan qadamlar qo‘ya olasiz.

Dono odam yuzaga kelishi mumkin bo‘lgan xavf-xatarlarni aniqlashga harakat qiladi va ularning oldini olish uchun kerakli choralarni ko‘radi. Sog‘liq borasida ham xuddi shunday. Gigiena qoidalariga rioya qilsangiz, kasallikka chalinish xavfi kamayadi yoki u yengilroq kechadi. Kasallikni davolashdan ko‘ra uning oldini olish afzalroq.

«Gigienaga rioya qilganimiz va uyimizni toza saqlaganimiz tufayli shifokor ko‘rigiga va dori-darmonga kamroq pul sarflaymiz». (Andreas) *