Job 21:1-34
21 Job da kpahen:
2 “Ovwan nabọ kerhọ rẹ obo re me ta;E jẹ ọnana dia onẹrhẹvwe rẹ ovwan cha vwọ kẹ vwẹ.
3 Ovwan chirakon mẹ re me cha vwọ ta ota na;Me da ta nu, ovwan sa vwẹ ovwẹ jehwẹ.
4 Ohworakpọ yen mi brenu kẹ?
Ọ da dia ọtiọyen, ofu rhe dje vwe?*
5 Ovwan ni vwe je tẹnrovi vwe vwọrẹ igbevwunu;Ovwan vwẹ obọ vwo rhurhu unu rẹ ovwan.
6 Ọke mi de roro kpahọn, ẹwẹn ko kpokpo uvwe,Oma mẹ eje ko kpogho.
7 Diesorọ ihwo umwemwu vwọ tọn,Ghwa, ji fe?*
8 Emọ rayen vẹ ayen herọ ọkieje,Ayen je mrẹ emọ rayen.
9 Iwevwin rayen hẹ ẹdia rẹ ofuvwegbe, ayen vrabọ rẹ oshọ,Ọghẹnẹ je vwẹ ọkpọ rọyen vwo gboja kẹ ayeen.
10 Erhuẹn rayen vwiẹ gbẹrhẹnẹdẹ;Erhuẹn rayen vwiẹ, evun rayen shee.
11 Emeshare rayen djẹ rua otafe kerẹ ekrun rẹ igodẹ,Emọ rayen ji pho kraekrae nene asan eje.
12 Ayen sua une vẹ itamborini kugbe ihapuJe ghọghọ ọke rẹ ayen de nyo edo rẹ iflutu.*
13 Ayen ghwọrọ ẹdẹ rayen vwọrẹ otekẹvwẹAyen me ro otọ kpo evunrẹ Ushi* vwọrẹ ufuoma.*
14 Ẹkẹvuọvo ayen ta kẹ Ọghẹnẹ rẹ uyota na nẹ, ‘Yanjẹ avwanre vwo!
Avwanre guọnọ riẹn idjerhe wẹẹn.
15 Ono yen Ọromevwẹgba na, rẹ avwanre vwọ ga?
Erere vọ yen che te avwanre obọ siẹrẹ avwanre de vughe?’
16 Ẹkẹvuọvo me riẹnre nẹ ọ dia ayen yen suẹn efe romobọ rayeen.
Iroro* rẹ orumwemwu sherabọ kẹ vwẹ.
17 Brabọ yen e fuẹn urhukpẹ rẹ ihwo umwemwu?
Brabọ yen oghwọrọ brẹ ayen cha?
Brabọ yen Ọghẹnẹ ghwọrọ ayen vwẹ ophu rọyen?
18 O vwo ọke rẹ ayen vwọ họhọ ẹbe eyaya vwevunrẹ odju?Je dia kerẹ ohọrọ rẹ odju rẹ ogiribo muẹ yanran?
19 Ọghẹnẹ cha sẹro rẹ oja rẹ ohwo vwọ hẹrhẹ emọ robọ rọyen.
Ẹkẹvuọvo e jẹ Ọghẹnẹ hwosa kẹ rere ọ vwọ riẹn.
20 E jẹ ẹro robọ rọyen mrẹ oghwọrọ rọyen,E jẹ ọ je dia ohwo rọ cha da vwo nẹ ophu rẹ Ọromevwẹgba na.
21 Kidie die yen tere te obo re phia kẹ uwevwin rọyen siẹrẹ ọ da yanran nuSiẹrẹ e de bru uche emeranvwe rọyen krẹ?*
22 O vwo ohwo ọvo ro se yono Ọghẹnẹ erianriẹn,*Rọ vwọ dianẹ Ọyen ohwo rọ tobọ vwẹ ihwo ri me kpenu vwo guẹdjọ na?
23 Ohwo ọvo ghwuru ọke rẹ ẹgba rọyen eje je vwọ hẹ oma rọyenỌke rẹ oma vwo fuon karekare rẹ ẹwẹn rọyen ji vwo totọ,
24 Ọke rẹ ekpoghawọ rọyen vwọ vọn vẹ ivwriRẹ ibeku rọyen je vwọ gan.*
25 Ẹkẹvuọvo ohwo ọfa ghwuru vẹ omaemuophiyọ ọgangan,*Ọ danvwe erọnvwọn iyoyovwin kakakaa.
26 Ayen ihwo ivẹ na che sherhẹn ekpẹn,Ihori che rhurhu ayen ihwo ivẹ na.
27 Nighere! me riẹn oborẹ ovwan roro dẹnKugbe ona rẹ ovwan hworo rẹ ovwan vwo gbe vwe ku.*
28 Kidie ovwan tanẹ, ‘Tivọ yen uwevwin rẹ ohwo ro titiri na hepha?Tivọ yen utughẹ rẹ ohwo umwemwu na diare jovwo na je hepha?’
29 Wọ je rhe nọ eyonyan enọ jovwo?
Wọ rha nabọ fuẹrẹn oborẹ ayen tare,*
30 Nẹ e vwo ghovwo ohwo umwemwu vwẹ ẹdẹ rẹ okpetuJi sivwon vwẹ ẹdẹ rẹ ophu?
31 Ono yen cha nọ enọ kpahen idjerhe rọyen,Je hwosa kẹ fikirẹ obo ro ruru?
32 Ọke re de muo kpo asan re shẹ ihwo phiyọ,A cha rhẹrẹ ushi rọyen.
33 Ukonri rẹ ekpẹn rẹ iyara* na cha dia vwevwerhen vwọ kẹ,Ihworakpọ eje ki che nene*Kerẹ ihwo re se kerii re kobaro kẹ.
34 Ọtiọyena kẹ diesorọ ovwan vwọ kẹ vwẹ uchebro ri vwo otọọ?
Emu vuọvo hẹ ẹkpahọnphiyọ rẹ ovwan vwọ vrẹ ophiẹnvwee!”
Eta rehẹ obotọ na
^ Vwẹ Hibru, “dje ẹwẹn mẹ?”
^ Yẹrẹ “je goma?”
^ Yẹrẹ “ipaipi.”
^ Yẹrẹ “Sheol,” kọyen, ushi re shẹ ihwo phiyọ. Ni Eta re Vwomaphia.
^ Yẹrẹ “Ushi siẹvuọvo,” kọyen, ughwu re kpakpata rọ vrabọ rẹ ọmiaovwẹ.
^ Yẹrẹ “Uchebro; Ona ehworo.”
^ Yẹrẹ “rọyen ibro ivẹ.”
^ Yẹrẹ “yono Ọghẹnẹ orọnvwọn.”
^ Vwẹ Hibru, “otu rẹ ibeku rọyen je vwọ rhuọnrhuọn.”
^ Yẹrẹ “vẹ erhi ro muenu.”
^ Yẹrẹ ọ sa dia, “vwo gbe ozighi vwọso ovwẹ.”
^ Vwẹ Hibru, “fuẹrẹn eka rayen.”
^ Yẹrẹ “iwadi.”
^ Vwẹ Hibru, “Ko che kpono ihworakpọ eje nene oma.”
