Job 2:1-13
2 Ọyena vwọ wan nu, ẹdẹ na de rhi te rẹ emọ rẹ Ọghẹnẹ rẹ uyota na* vwọ rhe reyọ ẹdia rayen vwẹ obaro ri Jihova, Eshu da je ro ohri rayen, ọ da reyọ ẹdia rọyen vwẹ obaro ri Jihova.
2 Etiyin Jihova da ta kẹ Eshu: “Tivọ wo nẹ cha?” Eshu da kpahen kẹ Jihova: “Me yancha yankpo vwẹ otọrakpọ na ji ghoro vwẹ evun rọyen.”
3 Jihova da ta kẹ Eshu: “Wo vwo oniso rẹ* odibo mẹ Job re? O vwo ohwo vuọvo rọ họherọ vwẹ otọrakpọ naa. Ọyen ohwo ọsoso ro vwo ọyọnregan,* ọ djoshọ rẹ Ọghẹnẹ je sian obo re brare. Ọ je sẹro rẹ ọyọnregan rọyen kokoroko dede nẹ wọ davwẹngba vwọ nẹrhẹ mi mukpahọn me vwọ ghwọrọ* ekueku.”
4 Ẹkẹvuọvo Eshu da kpahen kẹ Jihova: “Ohọroma vwọ kẹ ohọroma. Ohwo cha vwẹ kemu kemu ro vwori vwọ kpahotọ fikirẹ arhọ* rọyen.
5 Jẹ, vwọ kẹ ewene, rionbọ wẹn phia rere wọ ghwiẹ ubeku rọyen vẹ uvwo rọyen, vwọrẹ imuẹro, ọ cha hanrhe owẹ vwẹ obaro wẹn.”*
6 Ọtiọyena Jihova da ta kẹ Eshu: “Nighere! Ọ hẹ obọ wẹn!* Ẹkẹvuọvo wọ reyọ arhọ* rọyeen!”
7 Ọtiọyena Eshu de vrẹn nẹ obaro* ri Jihova, ọ da vwẹ irubẹ re miavwa* vwọ ghwiẹ Job vwo nẹ ẹhẹrhowọ rọyen re te ekrekruyovwin rọyen.
8 Job kọ reyọ ẹbẹre ochẹ vwọ kara oma rọyen, jẹ o chidia iwurhie.
9 Ukuotọ rọyen aye rọyen da ta kẹ: “Wọ je sẹro rẹ ọyọnregan wẹn? Hanrhe Ọghẹnẹ rere wo ghwu!”
10 Ẹkẹvuọvo Job da kpahen kẹ: “Wọ ta ota kerẹ ọvo usun rẹ eya ri jẹ ọhọ evwo na. Obo ri yovwirin ọvo yen avwanre che rhiabọreyọ mie Ọghẹnẹ rẹ uyota na, avwanre rhe ji rhiabọreyọ obo re brare?” Vwẹ enana eje na, Job vwẹ ẹbẹrunu rọyen vwo ru umwemwuu.
11 Igbeyan ri Job erha de nyo kpahen okpetu na eje ri she teyọn na, ayen ọvuọvo de nẹ asan rọyen rhe—Ẹlifaz ohwo ri Timan, Bildad ohwo ri Shua, kugbe Zofa ohwo ri Neamat. Ayen de vwo ọrhuẹrẹphiyotọ rẹ ayen vwọ vwoma rere ayen yanran ra nẹrhẹ Job je vwẹ uchebro kẹ.
12 Ọke rẹ ayen vwọ mrẹ vwẹ ugboko, ayen rhe vughee. Kẹ ayen viẹ gangan, ayen da bẹrẹ iwun rayen, ayen da ghwẹ ekpẹn do kpenu ku uyovwin rayen.
13 Ayen de nene chidia otọ vwẹ ẹdẹ ighwrẹn kugbe ason ighwrẹn. Ohwo vuọvo ta ota vwọ kẹẹ, kidie ayen mrẹvughe nẹ ọmiaovwẹ rọyen na ganre mamọ.
Eta rehẹ obotọ na
^ Ota ri Hibru ro mudiaphiyọ emọ rẹ Ọghẹnẹ re dia emekashe.
^ Vwẹ Hibru, “Wo mu ẹwẹn wẹn kpahen.”
^ Yẹrẹ “ohwo ọsoso ro vwo ekaan.”
^ Vwẹ Hibru, “mukpahọn mi vwo muo rọ.”
^ Yẹrẹ “erhi.”
^ Vwẹ Hibru, “vwẹ opharo wẹn.”
^ Yẹrẹ “hẹ otọ rẹ usuon wẹn.”
^ Yẹrẹ “erhi.”
^ Vwẹ Hibru, “nẹ opharo.”
^ Yẹrẹ “vwẹ era re miavwa gangan.”
