Te varua moˈa—no te aha te taata e taa ore ai?

EAHA te varua moˈa? Mea huru ohie te uiraa ia hiˈohia, mea fifi râ ia ite i te hoê pahonoraa ohie.

Ua parau te pâpa Benoît XVI i te hoê nahoa taata i Auteralia: “E mea fifi roa ia taa maitai eaha te Varua.”

Mea rahi iho â ïa te manaˈo e te papu ore no nia i te uiraa, Eaha te varua moˈa? Teie te tahi mau pahonoraa matauhia:

• Te hoê taata ora i roto i te mau pǐpǐ a te Mesia.

• Te vairaa mai te Atua i roto i teie ao.

• Te toru o te taata o te Toru tahi.

No te aha teie taa-ore-raa? No ǒ roa mai te reira i te senekele maha o to tatou tau, i to te tahi feia maimi i te pae faaroo parauraa e e taata te varua moˈa tei faito i te Atua. Aita râ te mau Papai e te mau pǐpǐ matamua a te Mesia i haapii i teie manaˈo. Te faataa ra te hoê buka ite rahi: “Aita te Faufaa Tahito e faataa ra i te varua o te Atua ei taata . . . Te varua o te Atua, o to ˈna noa ïa mana.” Te na ô faahou ra teie buka: “Te faaite ra te rahiraa o te mau papai o te Faufaa Apî i te varua o te Atua mai te hoê mea, eiaha râ mai te hoê taata; te ite-maitai-hia ra te reira i roto i te faaauraa i rotopu i te varua e te mana o te Atua.”—The New Catholic Encyclopedia.

Mea fifi iho â ïa no te taata ia manaˈo e e taata te hoê mana. No reira te rahiraa o ratou, ia au i te hoê titorotororaa apî i Marite, e patoi ai i te manaˈo e e taata ora te varua moˈa. Ua tano anei ratou? Aore ra e tiaturi anei tatou i te feia maimi i te pae faaroo o te parau onoono ra e “e taata iho â te varua moˈa tei taa ê i te Metua e te Tamaiti”?

No te ite i te pahonoraa tano, e hiˈo tatou i roto i te Parau a te Atua, te Bibilia, o te faataa maitai ra i te varua moˈa. Ua papai te aposetolo Paulo: “Te mau parau moˈa atoa i papaihia ra e mea faaurua mai ïa e te Atua, e e mea maitai ei haapiiraa, ei aˈoraa.”—Timoteo 2, 3:16.

No te aha e mea maitai ai ia imi outou i te parau mau no nia i te varua moˈa? Maoti te reira e fanaˈo ai outou i te tauturu a te Atua. Ua manaˈo anei outou i te tahi mau taime e eita e haere faahou ia outou ia faaoromai? Ua fafau Iesu i ta ˈna mau pǐpǐ: “E ani, e noaa ïa ia outou . . . Te ite na outou i te horoa i te mea maitai na ta outou tamarii, . . . e rahi atu ïa to outou Metua i te ao ra i te horoa i te Varua Maitai [“varua moˈa,” MN] i te feia i ani atu ia ˈna.”—Luka 11:9, 13.

I roto i na tumu parau i muri nei, e vaiiho tatou i te Bibilia ia faaite mai eaha te varua moˈa. E ite atoa tatou e e nafea to tatou oraraa e maitai ai i te reira.

[Parau iti faaôhia i te api 3]

Te faaite maira te Bibilia eaha te varua moˈa