E NAFEA TA OUTOU MAU Ô E FAAOHIPAHIA ˈI?
Te hoê faanahoraa teata i te mau vahi aita e natirara
1 NO EPERERA 2021
I te mau avaˈe atoa, e tiai ru tatou ia matara mai te mau video o te JW Haapurororaa teata. Mea fifi râ no te mau taeae no Afirika ia fanaˈo i te reira. Eaha te tumu?
I te rahiraa o te mau vahi i Afirika, mea taotiahia te natirara. I te mau vahi e ere i te mea taotiahia, mea taere e mea moni roa. Ei hiˈoraa, ua rave mai te hoê tiaau haaati no Matetata i te video JW Haapurororaa teata o te avaˈe i te hoê vahi taoferaa. Ua aufau o ˈna piri i te 2 000 moni farane. Ua hau atu ïa i te tino moni e noaa mai ia vetahi i roto hoê hebedoma ohipa!
Noa ˈtu aita e natirara, e mirioni taata i Afirika te fanaˈo nei i te JW Haapurororaa teata. E nafea?
Mai 2017, ua haapurorohia te mau video a te faanahonahoraa na roto i te afata teata i te mau fenua i te pae apatoa o Afirika. Mea tamoni ore e e haapurorohia i te mau mahana atoa na roto 16 reo.
No teie faanahoraa teata, ua aufau te mau Ite no Iehova piri i te 1 200 000 moni farane i te avaˈe no te haapuroro i te mau video. Ua haapurorohia na roto 35 fenua i te pae apatoa i Afirika. No te haapuroro i te hoê video i te taime iho â e tavirihia ˈi te reira, e tuhaa moni hau tei aufauhia. E nehenehe ïa e tausani taata e apiti mai i te tahi mau rururaa taa ê.
E rave rahi taata, oia atoa te feia e ere i te Ite no Iehova, te fanaˈo nei i te faanahoraa teata JW i to ratou fare. Tera râ, e rave rahi o to tatou mau taeae te fifi nei no te hoo mai i te tahi mau matini rii. No te tauturu ia ratou, ua tamauhia te reira i roto hau atu 3 670 Piha a te Basileia ia nehenehe ratou e mataitai i te JW Haapurororaa teata i reira. Piri i te 7 000 moni farane te haamâuˈaraa no te mau Piha a te Basileia e vai ra te hoê afata teata. Aita anaˈe râ e afata teata, e nehenehe te mau haamâuˈaraa e raea roa hau atu i te 50 000 moni farane.
OE mauruuru rahi to to tatou mau taeae e tuahine no teie ravea. Te na ô ra te hoê matahiapo i Cameroun: “E au teie faanahoraa i te mâna no te mau utuafare i roto i te medebara.” Te na ô ra te hoê taeae i Nigéria: “E mataitai to ˈu utuafare i teie faanahoraa e 3 taime i roto i te hebedoma. E tiai ru ta ˈu mau tamarii i te mataitai i te reira. E ani atoa mai ratou ia mataitai faahou.” Te na ô atoa ra te hoê tuahine i Nigéria: “Auê te oaoa ia mataitai i te faanahoraa teata JW! Aita vau e mataitai faahou ra i te parau apî no te mea e riri ohie au a mataitai ai i te reira. Area te JW Haapurororaa teata, mea faaitoito mau ïa! Mea au roa na ˈu ia mataitai i te reira. E haamaitairaa rahi no ǒ mai ia Iehova!”
Ua faataa te hoê tiaau haaati no Mozambique e, i roto i ta ˈna tuhaa haaati, ua tamauhia te tahi mau matini rii i roto i te mau Piha a te Basileia no te fanaˈo i te faanahoraa teata. E haere mai te mau taeae na mua roa i te hora putuputuraa no te mataitai i te JW Haapurororaa teata.
No te tairururaa nunaa rau i 2019, i Johannesbourg, ua haapurorohia te tahi mau oreroraa parau na roto i tera ravea i e iva vahi ê. Te na ô ra te hoê taeae e ohipa ra i te tuhaa haapurororaa o te amaa no Afirika apatoa: “Na mua ˈˈe, ahani aita teie ravea, e haapuroro matou i te mau oreroraa parau na roto i te natirara. E titauhia râ te hoê reni natirara maitai e ia aufau i te tahi atu mau haamâuˈaraa. Mea mâmâ aˈe ia haapuroro i te mau oreroraa parau na roto i te afata teata.”
Maoti ta outou mau ô horoa noa no te turu i te ohipa na te ao nei, e nehenehe ïa e rave rahi taeae e tuahine i Afirika e mataitai i te JW Haapurororaa teata. Te mauruuru nei matou i te mau ô atoa i horoahia mai na roto i te mau ravea atoa faataahia i nia donate.jw.org.