A taua mo kinauga fakasaua e mafai o ˋtupu i koga kolā e filemu i te taimi nei. Ke oko ki fenua kolā e seai ne kinauga i ei, e mafai foki loa o logoˋmae a tino i ei ona ko te maˋkini o fesokotakiga i te lalolagi i aso nei i lō aso mua. Kafai ko oti te taua kae ko logoˋmaega kolā ne māfua mai i ei e mafai o tumau eiloa i se taimi leva ˋki. Mafaufau ki nai fakaakoakoga:

• Te sē lava o meakai. E fai mai te World Food Programme, “a taua ko te māfuaga sili eiloa o te sē lava o meakai, kae nofo ki se 70 pasene o tino fiaˋkai i te lalolagi nei e ˋnofo i koga kolā e fai i ei a taua mo kinauga.”

• Masaki faka-te-foitino mo te mafaufau. A te tulaga fakamataku o taua mo te seai se tokagamalie e māfua mai i ei, e mafai o fai ei a tino ke mafatia kae manavase valevale. A tino kolā e ˋnofo i koga o taua e se logoˋmae fua i te feitu faka-te-foitino kae mafai foki o maˋsaki ki olotou mafaufau. Kae e masani o se uke a fesoasoani tau te fakaimasaki e maua ne latou.

• Faimālō ke tiaki olotou fale. Talu mai i a Setema 2023, e sili atu i te toko 114 miliona tino i te lalolagi kātoa ko oti ne faimālō ke tiaki olotou fale, e ˋtusa mo te lipoti mai te Ofisa Maluga o Malo ˋSoko mō Tino ˋSola. A te  pogai tonu o te fakalavelave tenei ko taua mo kinauga fakasaua.

• Fakalavelave i mea tau tupe. E masani o feˋpaki a tino mo fakalavelave i mea tau tupe ona ko taua, e pelā mo te oloakaga o ˋtogi o mea. E mafai o logoˋmae latou māfai ko ave ne te malo a tupe kolā e ˋtau o fakaaoga ki masaki mo akoga ke ˋtogi ki ei a mea mō te taua. Kae uke ˋki a sene e manakogina ke toe faite ki ei a mea ne fakamasei i te taua.

• Fakalavelave o te natula. E logoˋmae a tino māfai ko fakamasei a mea o te natula kolā e ola i ei latou. A vai, te ea, mo te laukele kolā ko oti ne fakamasei e mafai o māfua mai i ei a masaki, kae kafai foki loa ko palele atu te taua kae koi maˋtaku eiloa a tino i pōmu kolā e ˋgalo i lalo i te laukele.