Te Tusi a Luka 21:1-38

  • Tupe e lua a se fafine mativa ko mate tena avaga (1-4)

  • TE FAKAILOGA O MEA KA OKO MAI (5-36)

    • Taua, mafuie fakama‵taku, famai, oge meakai (10, 11)

    • Ko nikoi Ielusalema ne kautau (20)

    • Taimi ne fuafuagina mō atufenua (24)

    • Te vauga o te Tama a te tagata (27)

    • Tala fakatusa e uiga ki te lakau ko te mati (29-33)

    • Ke matapula‵pula faeloa (34-36)

  • Ko akoako atu Iesu i te faletapu (37, 38)

21  I tena kiloakaga lavea ei ne Iesu a tino mau‵mea e lafo olotou meaalofa ki loto i pusa tupe.+  Kae ne lavea ne ia se fafine mativa ko mate tena avaga e lafo ne ia ki ei a tupe fo‵liki e lua kolā e se taulia malosi,*+  kae ne fai atu a ia: “Au e fai ‵tonu atu ki a koutou, me e uke atu a tupe ne lafo ne te fafine mativa tenei ko mate tena avaga i lō tino katoa.+  Me ne lafo ne latou katoa konei olotou meaalofa mai i olotou tupe silia, kae ko te fafine tenei ne lafo atu eiloa ne ia ana mea katoa kolā e ola ei a ia.”+  Fakamuli ifo, i te taimi ne fai‵pati ei a nisi tino e uiga ki te faletapu, ki te auala ne teu ei ki fatu ‵gali mo mea kolā ne ofo atu ki te Atua,+  fai atu ei a ia: “E pelā mo mea konei e lavea ne koutou, ka oko mai a aso ka seai eiloa se fatu ka ‵toe i luga i te suā fatu kae e se ‵pei ki lalo.”+  Tenā ne fesili atu ei latou ki a ia, olotou muna: “Te Faiakoga, ka ‵tupu mafea a mea konei, kae se a te fakailoga e iloa ei me ka ‵tupu a mea konei?”+  Ne fai atu a ia: “Fakaeteete ke se takitaki‵segina koutou,+ me e tokouke a tino ka o‵mai i toku igoa kae fai mai, ‘Au ko ia,’ kae ‘Ko pili mai te taimi tonu.’ Sa tau‵tali i a latou.+  E se gata i ei, kafai e lagona ne koutou a tala o taua mo fakalavelave, ke mo a e ma‵taku koutou. Me e ‵tau o ‵tupu muamua a mea konei, kae e seki oko mai te gataga.”+ 10  Tenā ne fai atu ei a ia ki a latou: “Ka fai taua te suā atufenua ki te suā atufenua,+ mo te suā malo ki te suā malo.+ 11  Ka isi ne mafuie fakama‵taku, mo oge meakai mo famai i koga katoa;+ kae ka isi ne mea fakama‵taku e lavea atu mo fakailoga ‵lasi mai te lagi. 12  “Kae koi tuai o ‵tupu a mea katoa konei, ka oko atu a lima o tino ki a koutou kae fakasaua atu ki a koutou,+ kae avatu ki sunako mo falepuipui. Ka avatu koutou ki mua o tupu mo kovana ona ko toku igoa.+ 13  Ka iku atu i ei ki te tukuatuga ne koutou se molimau. 14  Tela la, ke na fakaiku aka i otou loto ke mo a ma fakaakoako muamua otou pati ka fai atu ke ‵pulu ei koutou,+ 15  me ka tuku atu ne au ki a koutou a pati mo te poto, kolā ka se mafai ne otou fili katoa o ‵teke io me faka‵se ne latou.+ 16  E se gata i ei, ka tuku atu* foki koutou ne otou mātua mo taina mo kāiga mo taugasoa, kae ka tamate ne latou a nisi tino i a koutou,+ 17  ka takalia‵lia a tino katoa ki a koutou ona ko toku igoa.+ 18  Kae ka seai eiloa se laulu i otou ulu ka galo atu.+ 19  E auala i te otou kufaki ka faka‵sao ei ne koutou otou ola.+ 20  “Kae kafai e lavea ne koutou a Ielusalema ko nikoi ne kautau,+ ka iloa ei ne koutou me ko pili mai tena fakamaseiga.+ 21  Tela la, ko latou kolā e ‵nofo i Iuta ke na kamata o ‵tele ki luga i mauga,+ ko latou kolā e ‵nofo i loto i ei ke na olo kea‵tea, kae ko latou kolā i tua ke se toe ulu atu ki loto i ei, 22  me konei eiloa a aso ka fakaoko atu ei te fakasalaga* ko te mea ke fakataunu a mea katoa kolā ne tusi. 23  Kalofa eiloa i fāfine fai‵tama mo fāfine kolā koi faū olotou pepe māfai ko oko mai a aso konā!+ Me ka lasi ‵ki eiloa te tulaga fakaalofa o te fenua mo te fakasalaga o tino konei. 24  Ka ‵mate latou i te pelu kae ave fakapagota foki ki atufenua katoa;+ kae ka lakalaka a Ielusalema ne atufenua* ke oko eiloa ki te fakataunuga o taimi ne fuafuagina mō atufenua.*+ 25  “Ka isi foki ne fakailoga i te la, te masina, mo fetū+ kae ka manava‵se a atufenua i te lalolagi me ka se iloa ne latou o fai se mea ona ko te logoa mo te sou o te tai. 26  Ka mata‵po a tino ona ko te ma‵taku mo te ‵nofo fakatali‵tali ki mea kolā ka oko mai ki luga i te lalolagi nofoaki kātoa, me ka ga‵lulu a mea ma‵losi o te lagi. 27  Kae ka lavea ne latou te Tama a te tagata+ e vau i se kaumana mo tena ‵mana mo tena ‵malu sili.+ 28  Kae koi kamata o ‵tupu a mea konei, ‵tu faka‵lei kae ‵kilo ki luga me ko pili mai te taimi ka faka‵sao ei koutou.” 29  Tenā ne fai atu ei ne ia se tala fakatusa ki a latou: “Onoono ki te lakau ko te mati mo nisi lakau katoa.+ 30  Kafai ko ‵somo aka olotou lau, ko lavea kae iloa ne koutou me ko pili mai te tau vela. 31  E penā foki koutou, kafai ko lavea ne koutou a mea konei ko ‵tupu, ke iloa ne koutou me ko pili mai te Malo o te Atua. 32  Au e fai ‵tonu atu ki a koutou me ka se palele atu te kautama tenei seiloga ke ‵tupu a mea katoa.+ 33  Ka ‵galo atu a te lagi mo te lalolagi, kae ka se mafai o ‵galo aku muna.+ 34  “Kae ‵saga tonu ki a koutou eiloa ke mo a ma faka‵mafa otou loto ki te ‵kai malosi mo te inu malosi+ mo te manavase ki te olaga nei,+ i te mea mana oko fakapoi atu te aso tenā ki a koutou 35  e pelā me se malei.+ Me ka oko atu eiloa te aso tenā ki tino katoa kolā e ‵nofo i luga i te lalolagi kātoa. 36  Tela la, ke matapula‵pula faeloa+ kae ‵talo i taimi katoa+ ko te mea ke mafai o ‵sao koutou mai i mea katoa kolā e ‵tau o ‵tupu, ko ‵tu atu ei koutou i mua o te Tama a te tagata.”+ 37  Ne akoako atu faeloa a ia i loto i te faletapu i te ao, kae i te po e fano sāle a ia o nofo i luga i te mauga e fakaigoa ki te Mauga o Olive. 38  Kae ne olo sāle atu a tino katoa a koi ‵malu i aso takitasi o fakalogo‵logo ki a ia i te faletapu.

Fakamatalaga mai lalo

Eleni, “e lua lepita.” Onoono ki te MF E14.
Io me “fakatogafiti.”
Io me “aso o te taui ma sui.”
Io me “Fenua Fakaa‵tea.”
Io me “Fenua Fakaa‵tea.”