Te Tusi a Mataio 24:1-51

  • FAKAILOGA O TE FAKATASI MAI O KELISO (1-51)

    • Taua, oge meakai, mafuie (7)

    • E ‵tau o talai atu te tala ‵lei (14)

    • Te fakalavelave lasi (21, 22)

    • Fakailoga o te Tama a te tagata (30)

    • Te lakau ko te mati (32-34)

    • E pelā mo aso o Noa (37-39)

    • Tumau i te matapula‵pula (42-44)

    • Te tavini fakamaoni kae poto mo te tavini masei (45-51)

24  I te taimi ne tiaki ei ne Iesu te faletapu ne olo atu ana soko o fakaasi atu ki a ia a vaega katoa o te faletapu.  Ne fai atu a ia ki a latou: “E se lavea ne koutou a mea katoa konei? Au e fai ‵tonu atu ki a koutou me ka seai eiloa se fatu ka ‵toe i luga i te suā fatu kae e se ‵pei ki lalo.”+  Kae koi sagasaga a ia i luga i te Mauga o Olive, ne olo atu ana soko ki a ia, ko latou aka eiloa, kae fai atu: “Fai mai aka ki a matou, ka ‵tupu mafea a mea konei, kae se a foki te fakailoga o tou fakatasi mai*+ mo te taimi o te gataga o te olaga tenei?”+  Ne tali atu a Iesu ki a latou: “Fakaeteete ke mo a ma takitaki ‵se koutou ne se tino,+  me e tokouke a tino ka o‵mai i toku igoa kae fai mai, ‘Au ko te Keliso,’ kae ka takitaki ‵se ne latou a tino e tokouke.+  Ka ‵logo koutou i taua mo tala o taua. Ke mo a ma ‵poi koutou, me e ‵tau eiloa o ‵tupu a mea konei, kae e seki oko mai te gataga.+  “Me ka fai taua te suā atufenua ki te suā atufenua mo te suā malo ki te suā malo,+ kae ka oko mai a oge meakai+ mo mafuie ki koga katoa.+  A mea katoa konei ko te kamataga o puapuaga.  “Tenā ka fakapuapuaga+ ei koutou ne tino kae tamate,+ kae ka takalia‵lia a atufenua katoa ki a koutou ona ko toku igoa.+ 10  E se gata i ei, ka tiaki ne tino e tokouke a te fakatuanaki kae fakatogafiti ne te suā tino a te suā tino kae ka takalialia te suā tino ki te suā tino. 11  Ka ‵sae aka a pelofeta ‵loi e tokouke kae takitaki ‵se ne latou a tino e tokouke;+ 12  kae ona ko te gasolo aka o amioga solitulafono ko gasolo ifo ei o se a‵lofa a tino e tokouke. 13  Kae ko te tino telā e kufaki ke oko ki te gataga ka sao eiloa.+ 14  Kae ko te tala ‵lei tenei o te Malo ka talai atu ki te lalolagi nofoaki kātoa mo fai se molimau ki atufenua katoa,+ ko oko mai ei te gataga. 15  “Tela la, kafai ko lavea ne koutou a te mea fakatakalialia telā e māfua i ei te fakamaseiga, e pelā mo te mea ne faipati ki ei te pelofeta ko Tanielu, ko tu i se koga tapu,+ (ke na malamalama la te tino faitau), 16  tenā ko latou kolā e ‵nofo i Iuta ke na kamata o ‵tele ki luga i mauga.+ 17  Ko te tagata i luga i te tuafale ke se fanaifo o puke a mea mai tena fale, 18  kae ko te tagata i te fatoaga ke se toe foki o puke tena gatu. 19  Kalofa eiloa i fāfine fai‵tama mo fāfine kolā koi faū olotou pepe māfai ko oko mai a aso konā! 20  ‵Talo faeloa ko te mea ke se ‵tele kea‵tea koutou i te taimi o te tau ‵moko io me ko te Sapati; 21  me ko te taimi eiloa tenā ka tupu i ei te ‵toe fakalavelave lasi+ telā ne seki tupu aka eiloa talu mai te kamataga o te lalolagi ke oko mai ki te taimi nei, kae ka se toe tupu eiloa se mea penā.+ 22  A te ‵tonuga loa, moi se fakamu‵tana a aso konā, e seai eiloa se tino e sao; kae ona ko tino filifilia ka fakamu‵tana ei a aso konā.+ 23  “Kafai e fai mai se tino ki a koutou, ‘Kiloke! Tenei a te Keliso,’+ io me, ‘Telā i ko!’ sa tali‵tonu ki ei.+ 24  Me ka ‵sae mai a Keliso ‵loi mo pelofeta ‵loi+ kae ka fai ne latou a fakailoga ‵lasi mo mea fakaofoofogia i olotou taumafaiga ke takitaki ‵se+ a tino filifilia. 25  Kiloke! Ko oti ne fakailoa atu ne au a mea konei ki a koutou. 26  Tela la, kafai e fai atu a tino ki a koutou, ‘Kiloke! A ia telā i te koga lavaki,’ sa olo ki ei; ‘Kiloke! A ia tenā i loto i te potu,’ sa tali‵tonu ki ei.+ 27  Me e pelā eiloa mo te ‵lapa mai o te uila mai saegala kae maina atu ki togala, e penā foki te fakatasi mai* o te Tama a te tagata.+ 28  So se koga e takato i ei se foitino mate, ka mumu atu ki ei a aeto.+ 29  “Mai tua malie faeloa o te fakalavelave i aso konā, ka pouli te la,+ kae ka se maina te masina, ka ta‵tela ifo a fetū mai te lagi, kae ka ga‵lulu a mea ma‵losi o te lagi.+ 30  Tenā ka lavea atu ei a te fakailoga o te Tama a te tagata i te lagi, kae ko matakāiga katoa o te lalolagi ka ‵tagi fanoa‵noa,+ kae ka lavea ne latou a te Tama a te tagata+ e vau i kaumana o te lagi mo tena ‵mana mo tena ‵malu sili.+ 31  Kae ka uga atu ne ia ana agelu fakatasi mo te ‵tagi o pu, kae ka fakamaopoopo fakatasi mai ne latou ana tino filifilia mai feitu e fa o te lalolagi,* mai te mata e tasi o te lagi ke oko ki te suā mata.+ 32  “Ke tauloto ki te tala fakatusa tenei mai te lakau ko te mati: I te taimi eiloa e toe ola aka ei ana kaula kae ko kamata o ‵somo aka ana lau, ko iloa ei ne koutou me ko pili mai te tau ‵vela.+ 33  E penā foki koutou, kafai ko lavea ne koutou a mea katoa konei, ke iloa ne koutou me ko pili atu a ia ki otou mataloa.+ 34  Au e fai ‵tonu atu ki a koutou me ka se palele atu te kautama tenei seiloga ke ‵tupu a mea katoa konei. 35  Ka ‵galo atu a te lagi mo te lalolagi, kae ka se mafai o ‵galo aku muna.+ 36  “E seai se tino e iloa ne ia te aso mo te itula tenā,+ ke oko eiloa ki agelu o te lagi io me ko te Tama, e se iloa katoa ne latou, kae na ko te Tamana fua e iloa ne ia.+ 37  Me e pelā eiloa mo aso o Noa,+ ka penā foki te fakatasi mai* o te Tama a te tagata.+ 38  Me e pelā eiloa mo aso mai mua o te Lolo, a tino e ‵saga faeloa o ‵kai kae inu, ne fai a avaga a tāgata kae tuku atu a fāfine ke a‵vaga ke oko ki te aso ne ulu ei a Noa ki loto i te vaka,+ 39  kae ne seki fia ‵saga atu latou ki ei ke oko eiloa ki te taimi ne poko ei te Lolo kae ave kea‵tea ei a latou katoa,+ ka penā foki a te fakatasi mai o te Tama a te tagata. 40  E tokolua a tāgata ka ‵nofo i te fatoaga; e tokotasi e ave kae tiaki te suā tino. 41  E tokolua a fāfine e tuki saito i te koga tuki saito; e tokotasi e ave kae tiaki a te suā tino.+ 42  Tela la, ke tumau i te matapula‵pula, me e se iloa ne koutou a te aso e vau ei te otou Aliki.+ 43  “Ke iloa ne koutou te mea tenei: Moi fai e iloa ne te pule o te fale a te taimi o te po e vau ei te tino kaisoa,+ penei ka alaala faeloa a ia ke mo a ma ulu atu se tino kaisoa ki loto i tena fale.+ 44  I te feitu la tenei, e ‵tau foki mo koutou o toka faeloa,+ me i te Tama a te tagata e vau i te itula telā e seki fakamoe‵moe koutou ki ei. 45  “Ko oi eiloa te tavini fakamaoni kae poto telā ne fili ne tena matai ke tausi atu ki ana nisi tavini, ke tuku atu olotou meakai i te taimi tonu?+ 46  Ka fiafia eiloa te tavini tenā māfai e vau tena matai kae maua atu me e fai eiloa ne ia a te mea tenā!+ 47  Au e fai ‵tonu atu ki a koutou ka fakasopo eiloa ne ia te tavini tenā ke pule i ana kope katoa. 48  “Kae kafai e fai ifo te tavini masei tenā ki a ia eiloa i tena loto, ‘Ko tuai mai toku matai,’+ 49  kae kamata o ‵ta ne ia ana nisi tavini kae ‵kai kae inu fakatasi mo tino ko‵nā, 50  ka vau eiloa te matai o te tavini tenā i te aso e seki fakatalitali a ia ki ei mo te itula telā e se iloa ne ia,+ 51  kae ka fakasala ne ia ki te ‵toe sala ‵mafa eiloa kae ka tuku atu foki tou tagata ke ‵kau fakatasi mo tino ‵loi. Tenā eiloa te koga ka tagi mautuutu kae ū ana nifo i ei.+

Fakamatalaga mai lalo

Io me “kae se a te fakailoga e iloa ei me ko fakatasi mai koe.” Onoono ki te FP.
Onoono ki te FP.
Eleni, “matagi e fa.”
Onoono ki te FP.