1, 2. Omwaka 2018, nitwija kuba na mukoro ki oguratuteraniza hamu omu mulingo ogw’embaganiza, kandi habwaki? (Rora ekisisani ekiri ha rupapura 9.)

EBIRO 31, okwezi kwa Maaci, omwaka 2018, obukaikuru n’obukaikuru bw’abantu omu bicweka ebirukwahukana eby’ensi nibaija kwesorooza hamu kwijuka omukoro ogubaho omurundi gumu buli mwaka. Izooba obu liramara kugwa, Bakaiso ba Yahwe hamu n’abantu bandi baingi nibaija kwijuka ekintu Yesu yatukoliire. Buli mwaka, Ekiijukyo kiteraniza abantu omu bumu omu mulingo ogurukuhuniriza, kukira emikoro endi yoona.

² Yahwe na Yesu baine kuba basemererwa muno kurora obukaikuru n’obukaikuru bw’abantu omu bicweka ebirukwahukana eby’ensi nibagenda ha mukoro gunu omukuru. Baibuli nebazaho “ekitebe kingi omuntu wena ekyatasobora okubara, barugire omu mahanga gona, nenganda, nabantu, nendimi,” nibatokera haiguru nibagamba: “Okujuna kube hali Ruhanga waitu, anyakuikaliire ha kitebe kyobukama, nahali Omwana Gwentama.”  (Okusuku’rwa 7:9, 10) Kintu kirungi muno kurora ngu buli mwaka, abantu baingi boleka okusiima kwabo hali Yahwe na Yesu habw’ebintu by’amaani ebi batukoliire!

3. Ekicweka kinu nikiija kugarukamu bikaguzo ki?

³ Ekicweka kinu nikiija kukukonyera kugarukamu ebikaguzo binu: (1) Ninsobora kwetekaniriza nta Ekiijukyo nukwo kingasire? (2) Ekiijukyo kiretaho kita obumu omu bantu ba Ruhanga boona? (3) Kiki ekinsobora kukora kusagika obumu omu Bantu ba Ruhanga? (4) Obwire bulihika tube n’Ekiijukyo ky’okumalirra? Obu kiraaba nukwo kiri, kiribaho di?

4. Habwaki tusemeriire kukora kyona ekirukusoboka kuba ha Kiijukyo?

⁴ Habwaki tusemeriire kuba ha Kiijukyo? Ensonga emu eri ngu, obu tugenda omu nso’rokano tuba tugenzere kuramya Yahwe. Nitukigumya ngu Yahwe na Yesu basiima habw’amaani aga buli muntu atekamu kubaho ha ruso’rokano orukuru muno orubaho buli mwaka. Nitugonza Yahwe na Yesu barole ngu nitukora kyona ekirukusoboka kuba ha Kiijukyo oihireho kakuba habaho ekintu eky’amaani ekitulemeseze. Ebikorwa byaitu obu byoleka ngu nitutwara enso’rokano kuba kintu kikuru, tuba nituha Yahwe ensonga endi ey’okwikaza ibara lyaitu omu “kitabu ekyokuijukya.” Ekitabu kinu nikyo “kitabu kyobwomezi.” Kihandikirwemu ibara lya buli muntu arukugenda kutunga obw’omwezi obutahwaho.​—Maraki 3:16; Okusuku’rwa 20:15.

5. Kiki ekyosemeriire kukora obu harukuba hasigaireyo ebiro bike Ekiijukyo kihike?

⁵ Obu haraba hasigaireyo ebiro bike Ekiijukyo kihike, tukozese obwire obu kusaba n’okwecumitirizaaho ha nkoragana yaitu na Yahwe nukwo turole obweraba egumire. (Soma 2 Abakolinso 13:5.) Omukwenda Paulo akagambira Abakristaayo ngu: “Mwerole inywenka, rundi muikaire omu kuikiriza.” Ekintu kinu nitusobora kukikora tuta? Nitusobora kwekaguza: ‘Mali ninkigumya ngu kinu nikyo ekitebe kyonka eki Yahwe akomeremu kukora eby’agonza? Ninkora kyona ekirukusoboka kutebeza n’okwegesa amakuru amarungi? Ebikorwa byange nibyoleka ngu mali ninkigumya nk’oku tuli omu biro bya ha mpero, kandi ngu obulemi bwa Setani buli haihi kuhwaho? Obwesige bwange omuli Yahwe na Yesu bukyali bw’amaani nk’oku bukaba buli obu natandikire kuheereza Yahwe?’ (Matayo 24:14; 2 Timoseo 3:1; Abaheburaniya 3:14) Kutekerezaho eby’okugarukamu eby’ebikaguzo binu nikiija kutukonyera ‘kwerenga’ kurora kiki eki tuli.

6. (a) Omulingo gumu gwonka ogusobora kutuletera obwomeezi obutahwaho nugwo guha? (b) Omugurusi omu ayetekaniriza ata Ekiijukyo kya buli mwaka, kandi ekyokurorraho kye nikikwegesa ki?

⁶ Omulingo gumu ogw’orukusobora kwetekaniriza Ekiijukyo nukwo kusoma ebicweka kuruga omu bitabu byaitu ebirukubaza ha bukuru bw’omukoro gunu n’okubyecumitirizaaho. (Soma Yohana 3:16; 17:3.) Omulingo  gwonka ogu tusobora kutungamu obwomeezi obutahwaho nukwo kumanya Yahwe n’okwikiririza omuli Yesu. Kurora twayetekaniriza Ekiijukyo, nitusobora kwesomesa ha bintu ebiratukonyera kwirra haihi nauwe. Kinu nikyo omugurusi omu akora. Amazire akasumi nahereza nk’omugurusi omu kitebe kandi nagamba ngu akasoroza ebicweka ebiizira omu Watchtower ebirukubaza ha Kiijukyo hamu n’okugonza oku Yahwe na Yesu batwolekere. Omu biro bike Ekiijukyo kitakahikire, asoma ebicweka binu kandi atekerezaaho n’ensonga habwaki Ekiijukyo kikuru. Kandi obwasoma ha kintu kindi ekirukubaza ha Kiijukyo, nakyo akyongera ha bintu ebi yasoroize. Kandi asoma nayecumitiriza ha Kusoma Baibuli okw’Ekiijukyo. Omugurusi onu nagamba ngu obwakora ebintu binu, buli mwaka ayega ebintu bihyaka. Ekirukukira obukuru, okwesomesa kunu kumuletera kweyongera kugonza Yahwe na Yesu. Naiwe obworayesomesa omu mulingo gunu, noija kweyongera kugonza Yahwe na Yesu. Noija kweyongera kusiima habw’ebibakozere, kandi noija kugasirwa omu Kiijukyo.

7. (a) Ha Kiihuro kya Mukama waitu eky’okubanza, Yesu akasaba ki? (b) Kiki ekirukwoleka ngu Yahwe agarukiremu esaara ya Yesu?

⁷ Ha Kiihuro kya Mukama Waitu eky’okubanza, Yesu akasaba esaara ey’embaganiza. Akasaba yabazaho obumu obukaba buli hagati ye na Ise. Kandi akasaba ngu abegeswa be nabo babe n’obumu obwa mulingo ogu. (Soma Yohana 17:20, 21.) Hataroho okugurukyagurukya, Yahwe amazire ira kugarukamu esaara egi ey’Omwana we. Omukoro gw’Ekiijukyo nugwo ogukyakizireyo kwoleka nk’oku Bakaiso ba Yahwe bali omu bumu. Ha kiro eki, obukaikuru n’obukaikuru bw’abantu kuruga omu mahanga maingi, kandi ab’erangi ezirukwahukana boleka nk’oku barukukigumya ngu Yahwe akatuma Omwana we. Omu biikaro ebimu, tikyanguhire kurora abantu ab’erangi ezirukwahukana nibaramiza hamu, kandi obu kibaho, bakirora nk’ekitahikire. Baitu Yahwe na Yesu ubo tali nukwo batekereza. Hali Yahwe na Yesu, obumu bwaitu obutwoleka ha Kiijukyo bubasemeza.

8. Yahwe akaha nabbi Ezekyeri butumwa ki?

⁸ Itwe nk’Abakaiso ba Yahwe, tikirukutuhuniriza kurora ngu tuli omu bumu. Yahwe akaha Ezekyeri obunabbi obukaba nibwoleka ngu halibaho obumu. Akagambira Ezekyeri ngu atunge emiigo ebiri, omwigo gumu gwa “Yuda” kandi ogundi gwa “Yusufu” nukwo agiteranize hamu efoke omwigo gumu. (Soma Ezekyeri 37:15-17.) Watchtower ya Julaayi 2016, hansi y’omutwe “Ebikaguzo Kuruga omu Basomi Baitu”, ekasoborra eti: “Yahwe akaragura kurabira omu nabbi we Ezekyeri ngu akaba nagenda kugarra abantu be omu Nsi ey’Ekaba Eraganiziibwe kandi ngu bakugarukire nibafooka ihanga limu. Obunabbi obu bukongera bwagamba ngu boona abanyakuramya Yahwe omu biro bya ha mpero baliramiza hamu omu bumu.”

9. Buli mwaka, Ekiijukyo kyoleka kita obumu obwabazibweho omu bunabbi bwa Ezekyeri?

⁹ Kutandika n’omwaka 1919, Yahwe akatandika kusorooza n’okuleta hamu abantu be abaseserweho amagita. Bakaba bali nk’akati ka “Yuda.” Hanyuma abantu abaine okunihira kw’okutunga obwomeezi obutahwaho omu nsi nabo bakatandika kubeteranizaho. Abaine okunihira kw’okwikara omu nsi nubo abali nk’akati aka “Yusufu.” Yahwe  akaraganiza kuteraniza hamu obuti bunu nukwo bufooke akati kamu omu mukono gwe. (Ezekyeri 37:19) Akateraniza hamu abaseserweho amagita ‘n’entama ezindi’ bafooka “igana limu.” (Yohana 10:16; Zakaliya 8:23) Omu kasumi kanu, ebitebe binu bibiri biri hamu omu bumu kandi nibiheereza hamu Yahwe. Boona baine Omukama omu, Yesu Kristo kandi nuwe yayeserwe ‘omwiru wange Daudi’ omu bunabbi bwa Ezekyeri. (Ezekyeri 37:24, 25) Buli mwaka obu twesorooza hamu ha mukoro gw’okwijuka okufa kwa Yesu, turora omulingo ebitebe binu bibiri biri omu bumu nk’oku kyaragwirwe omu Ezekyeri. Baitu buli omu hali itwe nasobora kukora ki kwongera n’okwikazaho obumu bw’abantu ba Ruhanga?

10. Nitusobora kukurakuraniza tuta obumu omu bantu ba Ruhanga?

¹⁰ Omulingo gw’okubanza ogu tusobora kukurakuraniza obumu omu bantu ba Ruhanga nugwo guha? Kwekamba kuba baculeezi. Yesu obwakaba ali omu nsi, akagamba ngu abegeswa be baine kuba bebundaazi. (Matayo 23:12) Abantu ab’ensi bakira kwetwara kuba ba haiguru kukira abandi. Baitu obu turaaba tuli bebundaazi, nitwija kutamu ekitiinisa ab’oruganda abarukwebembera ekitebe kandi nitwija kuhondera oburagirizi bwabo. Obu nubwo ekitebe kiraikara omu bumu. Ekirukukirayo, kakuba twebundaaza, nitwija kusemeza  Yahwe Ruhanga habwokuba “atanga abemyehembo, baitu [aha] omugisa abaculezi.”​—1 Petero 5:5.

11. Kwecumitiriza ha mugaati na viino ebikozesebwa ha Kiijukyo nibisobora kutukonyera bita kwongera ha bumu bwaitu?

¹¹ Kintu ki ekyakabiri eki tusobora kukora kukurakuraniza obumu? Nukwo kwecumitirizaho hali eki omugaati n’evino eki birukumanyisa. Tusemeriire kukikora Ekiijukyo kitakabaireho kandi kukira muno ha kiro eki kyonyini eky’Ekiijukyo. (1 Abakolinso 11:23-25) Omugaati ogutatumbisiibwe nigwemerraho habw’omubiri gwa Yesu oguhikiriire ogu Yesu yahaireyo nk’ekyonzira. Viino erukutukura n’eyemerraho habw’esagama ya Yesu. Baitu tikirukumara kumanya bumanya amakuru g’ebintu binu. Tusemeriire kwijuka ngu ekicunguro kya Yesu kikoleka okugonza kw’amaani okw’abantu babiri. Yahwe akahayo Omwana we kutufera, kandi na Yesu akaikiriza kuhayo obwomeezi bwe habwaitu. Obututekereza ha kugonza kwabo, kituletera naitwe kubagonza. Kandi okugonza okutwinire Yahwe nikwija kugumya obumu bwaitu.

12. Oruganikyo rwa Yesu nirwoleka ruta ngu Yahwe nagonza tuganyirangane?

¹² Ekintu kyakasatu ekisobora kutuletera obumu nikyo kiha? Kuba n’omutima gw’okuganyirangana. Obu tuganyirangana, twoleka ngu nitusiima Yahwe habw’okutuganyira ebibi ebyaitu habwaitu kurabira omu kicunguro kya Yesu. Kwoleka habwaki kiri kikuru kuganyira, Yesu akabazaho oruganikyo orukukwata hali omukama n’abairu be. Soma Matayo 18:23-34 hanyuma oyekaguze: ‘Nimpurra nyine ekihika ky’okukora Yesu eki yayegeseze? Ngumisiriza kandi ndengaho kwetegereza ab’oruganda n’abanyaanya itwe? Nyetegekere kuganyira abo abansobiize?’ Ky’amananu ngu ebibi ebimu biba by’amaani kukira ebindi. Kandi itwe nk’abantu abatahikiriire, haroho ebibi ebimu ebi tugumira kuganyira. Baitu oruganikyo rwa Yesu nirutwoleka ekintu Yahwe arukugonza tukole. (Soma Matayo 18:35.) Yesu akakyolekera kimu ngu Yahwe tasobora kutuganyira kakuba tutaganyira ab’oruganda n’abanyaanya itwe obu barukuba begarukiremu. Kinu kiri kintu ekitusemeriire kwecumitirizaho muno. Obu turaaba nitugonza kulinda obumu bwaitu, tusemeriire kuganyirangana nk’oku Yesu yayegeseze.

13. Kwikara omu businge n’abagenzi baitu kikurakuraniza kita obumu bwaitu?

¹³ Obu tuganyira abandi, twikara omu businge n’ab’oruganda hamu n’abanyaanya itwe. Omukwenda Paulo akagamba ngu tusemeriire kwekamba kulinda obumu bwaitu n’obusinge hagati yaitu. (Abefeso 4:3) Nahabweki Ekiijukyo obu kiraaba kiri haihi kuhika, kandi kukira muno ha kiro eki ekyonyini eky’Ekiijukyo, tekerezaho muno omulingo otwazaamu abandi. Wekaguze: ‘Abantu bammanyire nk’omuntu aikara akwasirwe ekiniga? Manyirwe nk’omuntu akora kyona ekirukusoboka kugarraho obusinge n’obumu?’ Binu biri bikaguzo bikuru ebi tusemeriire kwecumitirizaho.

14. Nitusobora kwoleka tuta ngu nitugumisiriza ab’oruganda omu kugonza?

¹⁴ Kintu ki ekyakana ekitusobora kukora kukurakuraniza obumu bwaitu? Kuhondera ekyokurorraho kya Yahwe eky’okwoleka okugonza. (1 Yohana 4:8) Titusemeriire kugamba ngu, “Ninsobora kulinda obusinge n’ab’oruganda bangezi bange, baitu tinyine kubehikya muno.” Kakuba tutandika kutekereza tuti, nitwija kuba tutarukuhondera  oburagirizi bwa Paulo oburukututererra kugumisirizangana omu kugonza. (Abefeso 4:2) Paulo tarukututererra kugumisirizangana kwonka baitu natutererra kukikora n’okugonza. Omuntu arukugumisiriza kwonka nayahukanaho n’omuntu arukukikora omu kugonza. Omu kitebe twinemu abantu ab’emiringo erukwahukana kandi boona Yahwe nuwe abalesere kumuramya. (Yohana 6:44) Nahabweki aine ensonga habwaki nabagonza. Yahwe obwaraba nagonza ab’oruganda na banyaanya itwe, itwe nitwe baha kugamba ngu titusemeriire kubagonza? Nitusemerra kubagonza habw’okuba Yahwe nikyo arukugonza tukole.​—1 Yohana 4:20, 21.

15. Nitumanya tuta ngu halibaho Ekiijukyo eky’okumalirra?

¹⁵ Kiro kimu, tuliba ha Kiijukyo habw’omurundi gwaitu ogw’okumalirra. Kinu nitukimanya tuta? Habwokuba Paulo akagambira Abakristaayo abaseserweho amagita ngu bakaba nibarangirra ‘okufa kwa Mukama waitu okuhikya obwaliija’ buli murundi baijukaga okufa kwa Yesu. (1 Abakolinso 11:26) Yesu obwakaba nabazaaho obunabbi oburukukwata ha biro by’empero, akabazaho n’ensonga erukukwata ha kwija kwe. Obu yali nabazaaho omuhito omwingi oguli haihi kwija, akagamba: ‘Kandi nubwo kalizoka akokurorraho ak’Omwana womuntu omu iguru; nenganda zona ez’omunsi ziritera empamo, zirirora Omwana womuntu naizira ha bicu ebyahaiguru, namani n’ekitinisa ekingi. Kandi alituma bamaraikabe niraka erikoto eryengwara, nabo balisoroza abakomebe omu mbeho ina, okuruga ha mpero yiguru, okuhika ha mpero yalyo.’ (Matayo 24:29-31) Yesu ‘alisoroza abakomebe’ obwalitwara omwiguru Abakristaayo abaseserweho amagita abakyali omu nsi. Kinu kiribaho hanyuma y’okutandika kw’omuhito omwingi baitu obulemu bwa Hara-Magedoni butakatandikire. Omu bulemu obu, Yesu hamu 144,000, nibaija kurwanisa abakama b’ensi kandi babasingule. (Okusuku’rwa 17:12-14) Ekijukyo ekirimalirra nikyo eki ekitulijuka Yesu atakaizire kusoroza abaseserweho amagita abaliba basigaireho.

16. Habwaki omaliriire kuba ha Kiijukyo eky’omawaka gunu?

¹⁶ Kora kyona ekirukusoboka kurora wabaho ha Kiijukyo ebiro 31 Maaci, 2018. Kandi osabe Yahwe akukonyere kuhikiriza obujunanizibwa bwawe nukwo itwena twikale omu bumu. (Soma Zabuli 133:1.) Kiro kimu tuligenda ha Kiijukyo habw’omurundi gwaitu ogw’okumalirra. Obu turaaba tulindiriire ekiro kinu, leka tukyoleke ngu mali nitutwara obumu obu tuba nabwo buli mwaka ha Kiijukyo nk’ekintu eky’omuhendo.