Petero Eya Kabiri 3:1-18
3 Abagonzebwa, enu niyo bbaruha yange eya kabiri ei ndukubahandiikira, kusisanaho n’ey’okubanza, na hati nimbeekambisa kukozesa kurungi obusobozi bwanyu obw’okuteekereza kuraba omu kubaijukya,
2 nukwo mwijuke ebintu ebyagambirwe* kuraba omuli banabbi abarukwera n’ekiragiro kya Mukama waitu kandi Omujuni ekyabagambiirwe kuraba omu bakwenda banyu.
3 Eky’okubanza ningonza mumanye kinu, ngu omu biro ebya ha mpero* halibaho abasekeerezi, abaliija n’okusekeereza kwabo nibahondera okwegomba kwabo.
4 kandi nibagamba bati: “Okubaho* kwe okwaraganiziibwe kuli nkaha? Kurugira kimu ha kiro baisenkuruitwe baagwijagiire omu kufa, ebintu byona biri nkooku bikaba biri kurugira kimu ha kutandika kw’okuhanga.”
5 Habwokuba banga ensonga enu bakigenderiire, ngu ira muno hakaba haroho iguru n’ensi eyarugire omu maizi yayemerra egumire kandi eri hagati y’amaizi habw’ekigambo kya Ruhanga;
6 kandi kuraba omu miringo egi, ensi ey’akasumi ako ekahwerekerezebwa, obu yahikirweho okusandaara kw’amaizi.
7 Baitu habw’ekigambo nikyo kimu, iguru n’ensi ebiroho kasumi kanu, byahuliirwe omurro kandi byahwirwe kuhikya ha kiro eky’okucwa omusango kandi eky’okuhwerekereza abantu abatarukutiina Ruhanga.
8 Abagonzebwa, muteebwa kinu ngu hali Yahwe* ekiro kimu kiri nk’emyaka rukumi, kandi emyaka rukumi eri nk’ekiro kimu.
9 Yahwe* takeerererwa obukirukuhika ha kintu eki yaraganiize nkooku abantu abamu bateekereza, baitu naagumiisiriza habwanyu, habwokuba tarukugonza omuntu weena ahwerekerre, baitu naagonza boona beegarukemu.
10 Baitu ekiro kya Yahwe* kiriija nk’omusuma, nambere iguru lirirugaho bwangu n’okuhinda kwingi, baitu habw’okwokya okw’amaani, ebintu biryaga, kandi ensi n’ebikorwa ebigirumu birisuukurwa.
11 Nkooku ebintu binu byona nibiija kwaga omu mulingo gunu, muteekerezeeho musemeriire kuba bantu ba mulingo ki. Musemeriire kuba bantu abaine engeso ezirukwera kandi abarukukora ebikorwa ebirukwoleka ngu mwemaliire hali Ruhanga,*
12 obu mulindiriire* kandi nimwikaza omu biteekerezo byanyu okwija kw’ekiro kya Yahwe,* nambere iguru lirihwerekerezebwa omu murro, n’ebintu biryaga habw’okwokya okw’amaani!
13 Baitu haroho iguru erihyaka n’ensi empyaka ebi turukulindirra kusigikirra ha murago gwe, kandi omuli ebi okuhikirra nuho kuliba.
14 Nahabweki, abagonzebwa, nkooku mulindiriire ebintu binu, mwekambe muno kurora ngu yabasanga mutaine katoonyezi, noobu kaakuba akamogo, kandi muli omu businge.
15 Ekindi, okugumiisiriza kwa Mukama waitu mukutwale nk’okujunwa, nkooku Paulo ow’oruganda mugenzi waitu omugonzebwa na uwe yabahandiikiire kusigikirra h’amagezi agaamuhairwe,
16 naabazaaho ebintu binu nkooku akora omu bbaruha ze zoona. Baitu ebintu ebimu ebirumu bigumire kubyetegereza, kandi ebintu binu abataine eki bamanyire* kandi abatagumire nibabihingisa, nkooku bakora Ebyahandiikirwe ebindi, bo bonka nibeereetera okuhwerekerra.
17 Baitu inywe abagonzebwa, habwokuba mumanyire ebintu binu bukyali kara, mwerinde nukwo mutahabisibwa hamu na bo kuraba omu bisuba eby’abantu abajeemu, mukaruga nambere mugumiire.*
18 Baitu mweyongere kutunga embabazi enyingi muno n’okumanya okurukukwata ha Mukama waitu kandi Omujuni waitu Yesu Kristo. Aheebwe ekitiinisa hati, n’ebiro n’ebiro. Amiina.
Obugambo Obuli Hansi
^ Rundi, “ebyarangirwe.”
^ Rora, Kusoborra Ebigambo; “Ebiro ebya ha mpero.”
^ Rora, Kusoborra Ebigambo.
^ Rora, Ebyong. A5.
^ Rora, Ebyong. A5.
^ Rora, Ebyong. A5.
^ Rora, Kusoborra Ebigambo; “Kwemarra hali Ruhanga.”
^ Rundi, “mulindiriire n’ekihika.” Nkooku kiri, “obu nimwanguhyaho.”
^ Rora, Ebyong. A5.
^ Rundi, “abateegesiibwe.”
^ Rundi, “musigikiire.”
