Petero Eya Kabiri 1:1-21
1 Nyowe Simooni Petero, omwiru kandi omukwenda wa Yesu Kristo, nimpandiikira abo abaatungire okwikiriza okw’omuhendo nk’okwaitu kuraba omu kuhikirra kwa Ruhanga waitu hamu n’Omujuni waitu Yesu Kristo nti:
2 Leka embabazi enyingi muno* hamu n’obusinge bibongerweho habw’okumanyira kimu Ruhanga, na Mukama waitu Yesu,
3 habwokuba amaani ga Ruhanga gatuhaire* ebintu byona ebitusobozesa kuba boomeezi n’okwemarra hali Ruhanga, kuraba omu kumanya okuhikire okw’Ogu ayatwesere habw’ekitiinisa kye n’oburungi bwe.
4 Kuraba omu bintu ebi, atuhaire* emirago ey’omuhendo kandi enkuru muno, nukwo kuraba omu mirago egi musobole kubagana ha kitiinisa kya Ruhanga, habwokuba mulekere kuhondera engeso z’ensi ezireetwa okwegomba okubi.*
5 Habw’ensonga enu, mwekambe ha kwikiriza kwanyu, mwongereho oburungi, ha burungi bwanyu, mwongereho okumanya,
6 ha kumanya kwanyu, mwongereho okwetanga, ha kwetanga kwanyu, mwongereho okugumiisiriza, ha kugumiisiriza kwanyu, mwongereho okwemarra hali Ruhanga,
7 ha kwemarra hali Ruhanga, mwongereho kugonza ab’oruganda, kandi ha kugonza ab’oruganda, mwongereho okugonza.
8 Ebintu binu obu biraaba omuli inywe kandi bikasaagaana, nibiija kubalinda nukwo mutaba bantu abatarukukora rundi abatarukwana ebyana obukirukuhika ha kumanya okuhikire okurukukwata ha Mukama waitu Yesu Kristo.
9 Habwokuba omuntu weena ow’ataine ebintu ebi mufu w’amaiso, atarukwikiriza amaiso ge kurora ekyererezi,* kandi ayeberwe ngu akoogebwaho ebibi bye ebya ira.
10 Nahabweki ab’oruganda, mwekambe muno kwikara muli beesigwa nk’abo abaayeserwe kandi abaakomerwemu,* habwokuba obu muraikara nimukora ebintu binu, timurukwija kuruga omu kwikiriza.*
11 Amananu gali, obu muraakora muti, nimwija kwikirizibwa kutaaha omu Bukama obutahwaho obwa Mukama waitu kandi Omujuni waitu, Yesu Kristo.
12 Habw’ensonga enu, ningonza kwikara nimbaijukya ebintu binu noobu kiraaba ngu mubimanyire, kandi mugumiire omu mananu aga mwayegere.*
13 Baitu obu ndaaba nkyali omu mubiri gunu,* nindora kihikire kwikara nimbaijukya ebintu binu nukwo mbeekambise,
14 habw’okukimanya ngu ndi haihi kuruga omu mubiri gunu nkooku Mukama waitu Yesu Kristo yammanyisize kurungi.
15 Niinyija kwikara ninyekamba kukikora, nukwo obu ndiba mmazire kugenda, musobole kwijukyangana* ebintu binu.
16 Obu twabamanyisize h’amaani ga Mukama waitu Yesu Kristo hamu n’okubaho* kwe, tutasigikirre ha nganikyo ez’ebisuba ez’okwehangahanga, baitu tukeerorra ekitiinisa kye ekingi n’amaiso gaitu.
17 Habwokuba akatunga ekitiinisa n’okunyumizibwa kuruga hali Ruhanga Isiitwe, Ruhanga ow’ekitiinisa ekingi muno obu yamugambiire ati: “Onu nuwe Omwana wange, ou ndukugonza muno, nyowe ou nsiimire.”
18 Ebigambo binu tukabihurra nibiruga omu iguru obu tukaba tuli na uwe ha rusozi orurukwera.
19 Nahabweki, obwesige bwaitu omu kigambo eky’obunabbi bweyongiire kuguma, kandi nimukora kurungi kukitaho omutima nk’etaara erukwakira omu kiikaro eky’omwirima (okuhikya obwire bukiire kandi enyunyuuzi ey’omu rukyakya* ekarugayo) omu mitima yanyu.
20 Eky’okubanza, mukimanyire ngu busaho bunabbi omu Byahandiikirwe oburuga omu nteekereza z’abantu.
21 Habwokuba busaho murundi na gumu obunabbi obu bwaleeserweho okugonza kw’abantu, baitu abantu baabazaaga ebyarugire hali Ruhanga nibatereekerezebwa omwoyo ogurukwera.
Obugambo Obuli Hansi
^ Rora, Kusoborra Ebigambo.
^ Rundi, “gatuhaire ha bwa busa.”
^ Rundi, “atuhaire ha bwa busa.”
^ Rundi, “omukoijo.”
^ Rundi nikisobora kuhindurwa, “naarora haihi.”
^ Nkooku kiri, “kugumya okwetwa kwanyu n’okukomwa kwanyu.”
^ Nkooku kiri, “timurukwija kulemwa.”
^ Rundi, “agali omuli inywe.”
^ Nkooku kiri, “omu heema enu,” ogu nugwo omubiri gwe omu nsi.
^ Rundi, “kubalizangana.”
^ Rora, Kusoborra Ebigambo; “Okubaho.”
^ Rora, Kusoborra Ebigambo.
