Petero Eya Kabiri 2:1-22

  • Nihaija kubaho abeegesa ab’ebisuba (1-3)

  • Abeegesa ab’ebisuba nibaija kucwerwa omusango (4-10a)

    • Bamalaika banagwa omu Tataro (4)

    • Okusaandara kw’amaizi; Sodomu na Gomora (5-7)

  • Obwokurorraho obw’abeegesa ab’ebisuba (10b-22)

2  Baitu hakaija haabaho na banabbi ab’ebisuba omu bantu, nkooku harukwija kubaho abeegesa ab’ebisuba omuli inywe. Omu mulingo ogw’okwesereka, nibaija kuleetaho okwecwamucwamu obutebe okurukuhwerekereza kandi nibaija n’okwehakana mukama wabo ayabaguzire, beereetere okuhwerekerra okwa bwangu-bwangu. 2  Ekindi, baingi balihondera engeso zaabo ezijunzire,* kandi habwabo omuhanda ogw’amananu gulibazibwaho kubi. 3  Kandi habw’omururu gwabo nibaija kubatwaraho ebyanyu nibakozesa ebigambo eby’ebisuba. Baitu omusango ogwabacweriirwe ira, tigurukwija mpora-mpora, kandi n’okuhwerekerra kwabo tikugwijagiire. 4  Ruhanga ataleme kufubira bamalaika abaasiisire baitu yabanaga omu Tataro* yababoha n’enjegere* omu mwirima kasira* balindiriire omusango ogw’abacweriirwe. 5  Kandi ataleme kufubira ensi eya ira, baitu yajuna Nuha, omutebezi w’okuhikirra hamu n’abandi musanju obu yaleesere okusandaara kw’amaizi hali ensi y’abantu abatarukutiina Ruhanga. 6  Kandi akacwera omusango embuga za Sodomu na Gomora, yazihwerekereza zaafooka iju, yayoleka ekintu ekirukwija kuhika h’abantu abatarukutiina Ruhanga. 7  Kandi akajuna Loti ow’ahikiriire ow’akaba naatuntuzibwa muno engeso ezijunzire ez’abantu enkozi z’ebibi— 8  habwokuba omusaija ogu ow’ahikiriire yasaalirwaga muno buli kiro habw’ebikorwa ebibi ebi yaroraga kandi n’ebi yahurraga obu akaba naikara n’abantu abo. 9  Nahabweki, Yahwe* amanyire kujuna abo abamwemaliireho kubaiha omu kirengo, baitu abantu abatahikiriire abaahwire nukwo bahwerekerezebwe* ha kiro eky’okucwa omusango, 10  kukira muno abo abagonza kusiisa emibiri ey’abandi kandi abagaya ab’obusobozi. Tibaine eki barukutiina kandi beegondeza bonka, tibatiina kubazaaho kubi ab’ekitiinisa, 11  baitu noobu kiraaba ngu bamalaika nibabakira obusobozi n’amaani, tibakozesa ebigambo ebirukujuma obu barukuba nibabajunaana, habwokuba nibatamu Yahwe* ekitiinisa. 12  Baitu abantu abo nibasisana ebisoro ebitaine magezi kandi ebikora ebintu bitabandize kubiteekerezaaho, ebizaarwa kukwatwa n’okwitwa, babazaaho kubi ebintu ebi batarukumanya. Nibaija kuhwerekerra habw’omuhanda omubi ogu bakwasire, 13  bahikweho obusaasi nk’empeera yabo habw’omuhanda gwabo omubi. Bakitwara nk’ekirukusemeza kwomeera obwomeezi obwekiguuda n’omu bwire bwa nyamusana. Abantu abo bali bitoonyezi kandi bumogo, nibasemerererwa muno enyegesa zaabo ez’ebisuba, obu nibaliira hamu na inywe ebiihuro. 14  Amaiso gaabo gaijwire obusiihani, tibasobora kwangirra ekibi kandi basoonasoona abatagumire. Emitima yabo ijwire omururu. Bali baana abakyenerwe. 15  Balekereho omuhanda ogutereekeriire, baahabisibwa. Bahondiire omuhanda gwa Bbaramu, mutabani wa Beyoli ayagondeze empeera ey’okukora ekibi, 16  baitu akahanwa habw’okukora ekitahikire, endogoya ey’etabaza obu yabalize omu iraka ery’omuntu yatanga nabbi ogu kuhondera omuhanda ogw’iraro. 17  Banu bali maziba agatarumu maizi n’ekiho ekitwarwa ekiyaga eky’amaani, kandi omwirima kasira* gubaahuliirwe. 18  Babaza ebigambo eby’okwehaisa ebitarumu. Kandi kuraba omu kwegomba okw’omubiri hamu n’engeso ezijunzire, basoonasoona abantu abaakaruga kwecwaho abo abakora engeso embi. 19  Noobu kiraaba ngu babaraganiza obugabe, bo bonyini bali bairu b’ekibi; habwokuba omuntu obu asingurwa omuntu ondi, afooka mwiru we.* 20  Nahabweki, hanyuma y’okuruga omu kusiisikara okw’ensi, kuraba omu kumanya okuhikire okwa Mukama waitu kandi Omujuni waitu Yesu Kristo, bongera beejumbira omu bintu binu byonyini kandi basingurwa, enyikara yabo ey’okumalirra esiisikarra kimu kukira ey’okubanza. 21  Kyakubaire kirungi kakuba bataramanyire omuhanda ogw’okuhikirra omu kiikaro eky’okugumanya kandi hanyuma bakaruga ha kiragiro ekirukwera eki baatungire. 22  Orufumo runu orw’amananu ekirurukugamba nikyo kibahikireho: “Embwa egarukiire ebitanaki byayo, n’empunu ei boogeze eyongiire yayejulinga omu saabu.”

Obugambo Obuli Hansi

^ Rundi, “ebikorwa byabo ebirukuswaza.” Omu Ruyonaani a·selʹgei·a. Rora, Kusoborra Ebigambo; “Engeso ezijunzire.”
^ Rundi nikisobora kuhindurwa, “yababohera omu kiina.”
^ Rundi, “omu mwirima omwingi muno.”
^ Nkooku kiri, “batemweho.”
^ Rundi, “omwirima omwingi muno.”
^ Rundi, “asingurwa ekintu, afooka mwiru wakyo.”