Okubatizibwa Nikimanyisa Ki?
Eky’okugarukamu kuruga omu Baibuli
Kubatizibwa nikimanyisa kwibika omuntu omu maizi kandi akagarugamu. * Egi niyo nsonga habwaki Yesu yabatiziibwe omu kyambu ekikooto. (Matayo 3:13, 16) Omu mulingo nugwo gumu, omusaija Omunyaisiyopiya akasaba kubatizibwa obubaahikire nambere hali amaizi amaingi.”—Engeso Ezabakwenda 8:36-40.
Amakuru g’okubatizibwa
Baibuli erengesaniza okubatizibwa n’okuzikwa. (Abarumi 6:4; Abakolosai 2:12) Okubatizibwa omu maizi nikimanyisa omuntu kufa habw’ebibi bye ebya kara kandi akatandika obwomeezi obuhyaka nk’Omukristaayo ow’ayehaireyo hali Ruhanga. Kubatizibwa hamu n’ebintu omuntu ebyakora kusobora kukuhikaho, erintekaniza kuruga hali Ruhanga ey’esobozesa omuntu kutunga omuntu ow’omunda omurungi habw’okwikiririza omuli Yesu Kristo. (1 Petero 3:21) Nahabweki, Yesu ekeegesa ngu, abegeswa be basemeriire kubatizibwa.—Matayo 28:19, 20.
Kubatizibwa omu maizi kwogyaho ekibi?
Nangwa. Baibuli n’eyegesa ngu esagama ya Yesu niyo yonka ey’esobora kutwogyaho ekibi. (Abarumi 5:8, 9; 1 Yohana 1:7) Baitu, omuntu kusobora kugasirwa omu kicunguro kya Yesu, asemeriire kuhinduka akatandika kuhondera enyegesa za Yesu omu bwomeezi bwe, kandi akabatizibwa.—Engeso Ezabakwenda 2:38; 3:19.
Kuseesaho amaizi kihikire?
Ebigambo “kuseesaho amaizi” tibiri omu Baibuli. Nibimanyisa omukoro ogukorwa amakanisa agamu nambere “babatiza” omwana enkerembe (kurabira omu kumuseesa amaizi ha mutwe) n’okumuruka ibara.
Baibuli eyegesa ngu kihikire kubatiza enkerembe?
Nangwa. Kubatizibwa okw’Ekikristaayo kwabo abakuzire kandi abasobora kwetegereza, n’okwikiriza “ebigambo ebirungi ebyobukama bwa Ruhanga.” (Engeso Ezabakwenda 8:12) Nikitwarramu kuhurra ekigambo kya Ruhanga, kukiikiriza, hamu n’okwegarukamu—ebintu enkerembe etasobora kukora.—Engeso Ezabakwenda 2:22, 38, 41.
Ekindi, Baibuli n’eyoleka ngu Ruhanga arora abaana abato aba Bakristaayo nk’abarukwera rundi abecumi, habw’obwesigwa bw’abazaire baabo. (1 Abakolinso 7:14) Kakuba kubatiza abaana kyali ky’omugaso, abaana abo tibakwetaagire kurorwa nk’abarukwera kusigikirra ha bwesigwa bw’abazaire baabo. *
Ebisuba ebirukukwata ha kubatizibwa okw’Ekikristaayo
Ekitahikire: Kumiisira rundi kusesera omuntu amaizi nikinganaingana n’okwibika.
Ekihikire: Okubatizibwa kwona okurukubazibwaho omu Baibuli kwali nikutwarramu okwibika. Ekyokurorraho, omwegeswa Firipo obuyabatiize omusaija Omunyaisiyopiya, ‘bombi bakasirimuka omu maizi.’ Kandi hanyuma, bakaruga omu maizi.”—Engeso Ezabakwenda 8:36-39. *
Ekitahikire: Baibuli n’eyoleka ngu n’abaana abato baabatizibwaga eka yoona obuyabatizibwaga. Ekyokurorraho, n’ebazaaho omulinzi w’enkomo omu Firipi eti: “Yabatizibwa uwe nenjuye yona.”—Engeso Ezabakwenda 16:31-34.
Ekihikire: Ebyahandiikirwe ebirukubazaaho okuhinduka kw’omulinzi w’enkomo nibyolekera kimu ngu abo abaabatiziibwe boona baketegereza “ekigambo kya [Yahwe]” kandi boona bakasemererwa muno.” (Engeso Ezabakwenda 16:32, 34) Ensonga zinu nizituletera kukigymya ngu enkerembe omu ka y’omulinzi w’enkomo zitabe omuli abo abaabatiziibwe, habwokuba zaali zitasobora kwetegereza ekigambo kya Yahwe.
Ekitahikire: Yesu akegesaaho okubatiza abaana abato obuyagambire ngu Obukama bwa baana abato.—Matayo 19:13-15; Marako 10:13-16.
Ekihikire: Yesu akaba atarukubazaaho okubatizibwa obuyabalize ebigambo ebi. Oihireho, akaba n’ayoleka ngu abo abarukugonza kutaaha omu Bukama bwa Ruhanga basemeriire kuba nk’abaana abato—abaculeezi kandi abaikiriza kwegesebwa.—Matayo 18:4; Luka 18:16, 17.
^ kac. 1 Ekigambo ky’Oruyonaani ekihindura “kubatizibwa” kihindurwa kuruga omu kigambo ekirukumanyisa “kwibika.” Rora the Theological Dictionary of the New Testament, Volume I, orupapura 529.
^ kac. 6 Kusigikirra ha kitabu The International Standard Bible Encyclopedia, “kubatiza enkerembe tikurukusangwa ahantu hoona omu [Ndagaano Empyaka].” Kandi kyongera kigamba ngu engeso enu ekarugirra omu “ntekereza etahikire kandi eyahinguranizaaga omugaso gw’okubatizibwa,” habw’okutekereza ngu okubatizibwa kwogyaho ebibi.—Volume 1, orupapura 416-417.
^ kac. 8 Ekitabu New Catholic Encyclopedia hansi y’omutwe “Kubatizibwa (omu Baibuli),” nikigamba kiti: “Hataroho kugurukyagurukya okubatizibwa omu kanisa eya kara kwatwarramuga kwibikwa.”—Volume 2, orupapura 59.
Nosobora Kugonza na Binu;
EBY’OKUGARUKAMU EBY’EBIKAGUZO EBIRUKUKWATA HA BAIBULI
Amadiini Goona Nigasisana? Goona Nigahikya Hali Ruhanga?
Emiringo ebiri enyakwolekerwe omu Baibuli n’etuha eky’okugarukamu.
ENYEGESA ZA BAIBULI
Saba Kwegesebwa Baibuli
Tandika kwega Baibuli n’omwegesa owaawe ha bwawe otarukusasura sente.