KIRAP long bipo yet, lain bilong Jehova i gat planti gutpela stori long ol wok bilong em ol i mekim. Ol dispela samting i stap long ol olpela rekod. Yumi inap kisim save long histori bilong yumi long ol buk na nius bilong yumi, ol poto, ol pas, ol ekspiriens bilong ol bratasista, ol samting i helpim lotu i tru, na wok autim tok. Tasol olsem wanem pasin bilong lukautim ol dispela samting inap helpim yumi long kisim save long ol samting i bin kamap bipo? Ol het bilong famili long Israel long bipo i mas stori long ol pikinini man bilong ol long ol lo na long ol gutpela wok bilong Jehova bambai ol tu inap “bilip long God.”—Sng. 78:1-7.

Ol olpela rekod em ol i bin mekim wok painimaut pinis long en i bin helpim yumi long kliagut long ol samting Jehova i tingting pinis long mekim. Olsem: Taim ol birua i laik stopim wok bilong sanapim tempel long Jerusalem, king i tokim ol kuskus long mekim wok painimaut long ol buk bilong gavman i stap long taun Ekbatana long provins Midia, na ol i painim wanpela buk i gat tok orait bilong King Sairus long sanapim tempel. (Esr. 6:1-4, 12) Olsem na i stret long laik bilong God, ol i sanapim gen tempel. Na Luk tu, em man bilong raitim Gutnius, i bin mekim wok long ol olpela rekod bilong “mekim gut wok painimaut long ol samting i bin kamap kirap long pastaim.”—Luk 1:1-4.

Gavening Bodi i tingim tru histori bilong wok tiokratik bilong yumi. Wanpela memba bilong Gavening  Bodi i stori long ol samting ol bratasista bilong bipo i bin mekim bilong helpim lotu i tru, na em i stori long wok bilong yumi long lukautim, bungim, na stori long ol dispela samting long ol nupela Witnes. Em i tok, “Ol samting yumi bin mekim bipo i givim skul long yumi na strongim yumi long wok yet i go.” Olsem na hetkota long Brooklyn, New York, i kamapim wanpela nupela dipatmen, em Akaiv Dipatmen, na i stap aninit long Komiti Bilong Raitim Tok.

FAMILI ALBAM BILONG YUMI

Taim planti yia i lus, planti bilong yumi i save ting i gutpela sapos yumi bin lukautim gut ol piksa samting bilong famili. Long Akaiv Dipatmen ol i wok long lukautim na bungim planti stori bilong wok tiokratik. Ol poto i stap long dispela dipatmen i olsem famili albam bilong yumi. Ol buk na nius bilong yumi long bipo, ol ekspiriens bilong ol bratasista, na ol samting em ol i bin yusim bilong helpim wok bilong autim gutnius, olgeta i stap long dispela dipatmen. Na ol i olsem ol samting yumi kisim long famili, we i helpim yumi long save gut long histori bilong wok tiokratik bilong yumi na i helpim yumi long bilip na wetim gutpela samting bai painim famili wanbilip bilong yumi.

Mipela i singautim yu long kisim sampela save moa long Akaiv Dipatmen long rot bilong dispela nupela hap long magasin, “Histori Bilong Yumi.” Em bai kamap long ol Wastaua bilong stadi. Olsem: Long Wastaua bihain, mipela bai kamapim stori bilong wanpela piksa we bai bekim ol dispela askim: Wilwil bilong buk Dawn em wanem samting? Husat i bin yusim dispela? Ol i yusim long wanem taim, na bilong wanem?

Olsem famili albam i gat ol gutpela memori, ol dispela olpela rekod inap helpim yumi long save gut long oganaisesen na ol bratasista bilong yumi long bipo. Em i helpim yumi long save long bilip bilong ol bratasista long bipo na pasin bilong ol long strongim bel, na ol amamas na hatwok em ol man i mekim wok bilong gutpela Papa bilong yumi long heven i kisim, na pasin bilong God long stiaim na sapotim lain bilong em. (Lo 33:27) Yumi bilip tru olsem Jehova bai blesim dispela wok bilong lukautim histori bilong oganaisesen bambai yumi ken stap wanbel na kisim strong long mekim laik bilong God.

[Blok/Piksa long pes 31]

Skelim Gut

Taim ol i redim ol buk, ol DVD, na ol arapela buk na nius bilong Baibel, ol lain bilong yumi long raitim stori, droim piksa, na mekim wok painimaut, na ol narapela, ol i kisim helpim long ol dispela olpela rekod. Akaiv Dipatmen i save mekim olgeta samting bilong lukautim gut ol kain kain olpela rekod we i kam long ol brens ofis, ol Betel dipatmen, ol kongrigesen, wan wan bratasista, na long ol arapela oganaisesen samting. Skelim sampela wok bilong dispela dipatmen:

Bungim na Skelim Gut: Ol i wok long bungim planti samting i go long Akaiv Dipatmen. Planti bratasista em famili bilong ol i bin stap gut long wok bilong Jehova inap planti yia tru, ol i givim nating ol dispela samting na sampela ol i givim na bihain ol bai kisim bek. Pasin bilong skelim gut ol dispela samting i save helpim yumi long kliagut moa long histori bilong yumi na long ol lain i bin stap long dispela taim bipo.

Lista: Dispela dipatmen i bungim pinis planti tausen olpela rekod samting, em sampela bilong ol i winim 100 yia. I gat planti kain kain samting, olsem na ol i mas wokim lista bilong olgeta wan wan na bai i no hatwok long ol i painim na yusim long mekim wok painimaut.

Stretim Bek na Lukautim: Long rot bilong gutpela save ol i bin kisim long pasin bilong stretim bek ol samting, ol inap stretim na lukautim gut ol buk na ol samting em klostu ol i laik bagarap. Ol i putim long kompiuta ol stori ol i bin bungim, ol poto, ol hap nius long niuspepa, ol piksa wokabaut, na ol rekoding. Ol i mekim olsem bambai ol dispela samting yet i no ken bagarap.

Bungim na Kisim: Ol i bungim ol dispela olpela rekod na putim stret long hap bilong en na long dispela rot ol i no inap lus, na tu, san na wara i no inap bagarapim ol. Ol i putim stori bilong ol dispela rekod long kompiuta na dispela i helpim wok bilong painimaut na kisim save long ol gutpela samting bilong yumi long bipo.

[Ol Piksa long pes 32]

1. Toksave bilong “Photo-Drama of Creation.” 2. Sabskripsen lista. 3. Kar i gat spika. 4. Fran pes bilong Epril 15, 1912, Watch Tower. 5. Kalabus pepa bilong J. F. Rutherford. 6. Maikrofon bilong WBBR. 7. Pikap. 8. Sutkes bilong ol buk. 9. Ol nouts bilong wanpela brata. 10. Telegram i go long J. F. Rutherford.