WANPELA bikpela toksave i kamap: “Ol Pablisa Long Briten—Yupela i Kirap!!” (Informant, * Disemba 1937, London edisen) Liklik taitol i tok: “Namba i No Go Antap Insait Long Tenpela Yia.” Fran pes bilong nius Informant i kamapim ripot bilong wok autim tok namel long 1928 na 1937, na ripot i soim olsem ol i nidim planti moa pablisa.

Bilong wanem i no gat gutpela ripot bilong wok autim tok long Briten? Ol pablisa i no givim bel moa long mekim wok autim tok. Na tu, brens i pilim olsem 200 painia tasol bai inap long teritori bilong Briten, na ol i autim tok long ol teritori i stap longwe long taun na ol i no wok bung wantaim kongrigesen. Taim sampela moa pablisa i laik mekim wok painia, brens i tokim ol olsem ol painia i planti tumas long Briten, olsem na ol i ken i go mekim wok painia long ol narapela kantri long Yurop. Olsem na planti painia i lusim Briten na go long ol kantri olsem Frans, maski ol i gat liklik save o ol i no save long tokples bilong ol dispela kantri.

Wanpela atikol long Informant bilong 1937 i putim mak long hamas aua ol pablisa i mas winim long autim tok long 1938: Wan milion aua! Ol inap winim dispela mak sapos long olgeta wan wan mun, ol pablisa i lusim 15 aua na ol painia i lusim 110 aua long autim tok. Nius Informant i kirapim ol pablisa long oganaisim ol de we ol inap autim tok inap 5-pela aua na mekim ol gobek long ol apinun namel long wik.

Planti pablisa i amamas tru long dispela senis. Hilda Padgett * i tok: “Dispela singaut i kam long hetkota, em singaut we planti bilong mipela i wet long en, na ol gutpela samting i kamap.” Sista E. F. Wallis i tok: “Mipela i laikim tru dispela tok bilong lusim 5 aua long autim tok long olgeta wan wan de! Mipela i amamas tru long yusim de olgeta long mekim wok bilong Bikpela! . . . Maski mipela i taiet taim mipela i kam bek long haus, mipela i save amamas tru!” Wanpela yangpela man, Stephen Miller, em i pilim olsem taim i sot, olsem na em i laik tru long bihainim singaut bilong mekim wok autim tok. I no gat wanpela samting i pasim rot bilong em long mekim dispela wok! Em inap tingim yet hau ol pablisa i save raun long baisikol na autim tok inap long de olgeta, na long apinun ol i save pilaim rekoding bilong ol tok. Ol i save wokabaut raun wantaim ol bikpela pepa i gat ol tok long en, na yusim ol magasin long autim tok long strit.

Nius Informant i tok: “Mipela i nidim 1,000 painia.” Nius i kolim tu nupela lo olsem, ol painia i no ken wok ol yet, nogat, ol i mas wok bung wantaim kongrigesen, na strongim na helpim ol narapela. Joyce Ellis (née Barber) i tok: “Planti bratasista i luksave olsem ol i mas mekim wok painia. Maski  mi gat 13 krismas, mi laik tru long mekim wok painia.” Long Julai 1940, Joyce i mekim wok painia taim em i gat 15 krismas. Peter i lukim toksave long nius Informant na dispela i kirapim em long “tingting long mekim wok painia.” Bihain, Peter i maritim Joyce. Long Jun 1940, Peter i gat 17 krismas na em i ron long baisikol inap 105 kilomita na em i go kamap long taun Scarborough—em i mekim wok painia long dispela hap.

Cyril na Kitty Johnson i daunim laik bilong ol yet na mekim wok painia. Ol i salim haus na olgeta narapela samting bambai ol inap kisim mani bilong lukautim ol long wok painia. Cyril i lusim wok mani, na insait long wanpela mun tupela i redi long mekim wok painia. Cyril i tok: “Mipela i holim wanpela tingting tasol. Mipela i amamas na redi long mekim dispela wok.”

Namba bilong ol painia i go bikpela, olsem na ol brata i painim sampela rot bilong helpim ol. Long 1938, Jim Carr em zone servant (nau yumi kolim wasman sekit), na em i orait long ol brata i ken sanapim haus bilong ol painia long ol taun. Ol i makim sampela painia long serim wanpela haus bambai brens i no ken tromoi bikpela mani long lukautim ol. Long taun Sheffield, ol i rentim wanpela bikpela haus na wanpela brata i lukautim dispela haus. Ol bratasista long dispela hap i givim mani na ol tebol na sia samting olsem kontribiusen bilong helpim ol painia. Jim i tok: “Olgeta bratasista i wok bung wantaim long sapotim wok bilong ol painia.” Tenpela painia i stap long dispela taun, na ol i givim bel tru long mekim wok autim tok. “Long moning, taim ol painia i sindaun long kisim kaikai, ol i save skelim teks bilong [de],” na “go long ol teritori i stap long narapela narapela hap bilong taun.”

Long 1938, ol pablisa na ol painia i givim bel tru long autim tok winim 1 milion aua. Ol ripot i soim olsem wok autim tok i kamap bikpela tru. Insait long 5-pela yia, namba bilong ol pablisa long Briten i dabol inap 3-pela taim. Lain bilong Jehova i wok strong gen long autim tok bilong Kingdom, na dispela i redim ol long karim hevi bilong woa insait long ol yia bihain.

Klostu nau God bai kirapim pait bilong Armagedon. Tude planti moa pablisa i mekim wok painia long Briten. Insait long 10-pela yia i go pinis, namba bilong ol painia i go antap long olgeta yia. Long Oktoba 2015, namba bilong ol painia em 13,224. Ol dispela painia i luksave olsem nambawan gutpela rot bilong yusim laip bilong ol em long autim tok bilong God long olgeta de.