Mekim Stadi i Givim Amamas na i Karim Gutpela Kaikai

Olsem wanem yumi ken kisim amamas taim yumi stadi long Baibel? Olsem wanem stadi bilong yumi inap karim gutpela kaikai? Yumi ken skelim 3-pela bikpela samting bilong helpim yumi kisim save gut moa long Baibel taim yumi mekim stadi bilong yumi yet.

1 BETEN: Namba wan samting long mekim, em yumi mas beten. (Sng. 42:8) Bilong wanem? Yumi mas tingim pasin bilong stadi long Tok Bilong God i olsem hap lotu bilong yumi. Olsem na yumi mas askim Jehova long redim bel na tingting bilong yumi long kisim ol tok na askim em long givim yumi holi spirit. (Luk 11:13) Barbara i mekim wok misineri inap longpela taim, em i tok: “Olgeta taim mi save beten paslain long mi ritim o mi stadi long Baibel. Bihain long dispela, mi pilim olsem Jehova i stap wantaim mi na em i orait long samting mi mekim.” Pasin bilong beten paslain long stadi i save redim bel na tingting bilong yumi long kisim gut tok bilong God.

2 TINGIM TINGIM LONG BEL: Sampela i no gat taim, olsem na ol i ritim tasol Tok Bilong God. Dispela i mekim na ol i no kisim gutpela helpim taim ol i stadi long Baibel. Carlos, husat i mekim wok bilong Jehova winim 50 yia, i luksave olsem i bikpela samting long makim hap taim bilong tingim tingim long bel ol tok em i stadi long en bambai stadi bilong em i karim gutpela kaikai. Em i tok: “Mi no save ritim planti pes bilong Baibel olsem bipo, nogat. Nau mi save ritim 2-pela pes samting long olgeta wan wan de. Long dispela rot, mi inap lusim bikpela taim moa long tingim tingim long bel ol tok mi ritim bambai mi inap kisim skul long ol bikpela samting.” (Sng. 77:12) Taim yumi lusim sampela hap taim bilong tingim tingim long bel ol samting, dispela bai helpim yumi long kisim sampela save moa long laik bilong God.—Kol. 1:9-11.

3 BIHAINIM: Sapos yumi luksave long olsem wanem wanpela wok inap kamapim gutpela samting, dispela inap helpim tru yumi. Dispela i stret long taim yumi stadi long Baibel. Gabriel, em wanpela yangpela brata husat i save bihainim gut sediul bilong em long stadi long Baibel, em i tok: “Stadi i save helpim mi long karim ol hevi i kamap long i stap bilong mi long olgeta de, na i redim mi long helpim ol narapela.” Em i tok moa: “Mi traim long bihainim olgeta samting mi bin lain long en.” (Lo 11:18; Jos. 1:8) Tru tumas, i gat planti gutpela save bilong God i stap na yumi ken lain long en na bihainim.—Snd. 2:1-5.

RIVIU: Em i gutpela samting tru olsem yumi inap kisim gutpela save em Jehova i givim long yumi, em As bilong olgeta savetingting! (Rom 11:33) Olsem na neks taim yu laik stadi, no ken lusim tingting long beten pastaim long Jehova na askim em long redim bel na tingting bilong yu long kliagut long ol tok, na askim long holi spirit. Na lusim sampela hap taim bilong tingim tingim long bel ol samting yu ritim. Na tu, wok strong long bihainim ol dispela tok long laip bilong yu. Taim yu mekim ol dispela bikpela samting, yu bai kisim amamas na stadi bilong yu bai karim gutpela kaikai.