Mateo 25:1-46
25 «Anto ja Gobyerno bʼa satkʼinali oj bʼobʼ slaj jastal lajune soltera. Ja yeʼnleʼi yiʼaje ja skandile sok waj staʼe ja nobioʼali.
2 Sok ay joʼwane mi spensarane lek* sok joʼwane wa spensarane lek.*
3 Ja matik mi spensarane leki yiʼaje ja skandile pe mi yiʼaje mas aseyte,
4 jaxa matik wa spensaran leki, mi kechan yiʼaje ja skandile, cha yiʼaje mas aseyte bʼa jun yeʼtal.
5 Yuja albʼi ja nobioʼali, jakni swayele sok ochkan swayele.
6 Pe ja bʼa nalan akwali abʼxi jun awanel: ‹¡Tixa ay il ja nobioʼali! ¡La taʼawik!›.
7 Anto tixa chʼak kʼeʼuke ja solteraʼiki sok xchapawe ja skandile.
8 Jaxa matik mi spensarane leki ti yalawe yabʼ ja matik wa spensarane leki: ‹Akitikon tʼunuk jawa waseyteʼexi, yujni ojxta tupuk ja jkandiltikoni›.
9 Jaxa matik wa spensarane leki, ti sjakʼaweʼa: ‹Ta katikonawilex, bʼobʼta mi oj yaʼ ja jbʼajtikoni. Mas lek kaʼaxik soka matik wa xchonowe sok manawik›.
10 Pe yajni wajume smanjeli, jul* ja nobioʼali. Ja solteraʼik bʼa chapan ayeʼi ochye soka yeʼn ja bʼa lugar bʼa boda, jaxa puerta lutxi.
11 Tixa julye ja tuk solteraʼiki sok yalawe: ‹¡Kajwal, kajwal, jamakitikon!›.
12 Pe ja yeʼn sjakʼayile: ‹Wani xkalawabʼyex meran lek: mini xnaʼabʼajex›.
13 Ja yuj tolabida kʼelan jakan ajyanik, yujni mixa naʼawex ja skʼakʼujil sok ja yoraʼili.
14 Yujni ja Gobyerno bʼa satkʼinali jach jastal jun winik waj bʼa jun najtil lugar. Yajni ojxta wajuk, sjeka spayjel ja smosoʼiki sok yakanyi bʼa skʼabʼe ja jastik sbʼaji.
15 Ja juni yayi joʼe talento,* jaxa juni chabʼe sok jaxa juni yayi june, yayile ja janekʼ wa xlajxiyujileʼi, sok tixa waj ja bʼa najtil lugari.
16 Ja maʼ ajiyi joʼeʼi wegoxta waji, ya aʼtijuk sok skʼulan ganar joʼe smoj.
17 Cha jachni ja maʼ ajiyi chabʼeʼi, skʼulan ganar chabʼe smoj.
18 Pe ja maʼ kechan ajiyi juneʼi, waji sok ti sjokʼo jun kʼeʼen sok snakʼayi ja stakʼin* ja yajwali.
19 Ekʼ jitsan tyempo, tixa kumxi* ja yajwale ja mosoʼik jaw sok skʼana oj yil ja jas skʼulane soka stakʼini.
20 Tixa jak ja maʼ ajiyi joʼe talento sok yiʼajan joʼe talento smoj. Ja yeʼn yala: ‹Kajwal, awankanki bʼa jkʼabʼ joʼe talento, sok kʼela, jkʼulan ganar joʼe talento smoj›.
21 Tixa aljiyabʼ yuja yajwali: ‹¡Jel leka kʼulan, lekil mosoʼal sok toj! Yuja toj ajyiya soka tʼusan jastik junuki, oj kaʼ bʼa wa kʼabʼ jitsan jastik. Laʼ sok ajyan gusto soka wa wajwali›.
22 Tixa cha jak ja maʼ ajiyi chabʼ talento sok yala: ‹Kajwal, awakanki bʼa jkʼabʼ chabʼ talento, sok kʼela, jkʼulan ganar chabʼ talento smoj›.
23 Tixa yala ja yajwali: ‹¡Jel leka kʼulan, lekil mosoʼal sok toj! Yuja toj ajyiya soka tʼusan jastik junuki, oj kaʼ bʼa wa kʼabʼ jitsan jastik. Laʼ sok ajyan gusto soka wa wajwali›.
24 Sok tixa jak ja maʼ ajiyi jun talento sok yala: ‹Kajwal, wani xnaʼa jun winika jel la tʼenwani juntiro, waxa tulu ja bʼa mi weʼna tsʼunu sok waxa tsomo ja bʼa mi weʼna chija.
25 Ja yuj xiwyon sok waj jnakʼ jawa talento bʼa luʼum. Kʼela, itul ja jas weʼna bʼaji›.
26 Tixa aljiyabʼ yuja yajwali: ‹Mosoʼal jel malo sok jaragan. ¿Konke waxa naʼa ajyi wa xtulu ja bʼa mi keʼn jtsʼunu sok wa xtsomo ja bʼa mi keʼn jchija?
27 Anto ojnike awiʼoch ajyi ja jtakʼin* bʼa banco. Bʼa jachuk ja yajni la julyoni,* oj ajuk kumxuki sok yolom›.*
28 Tixa yalaʼa: ‹Japawikyi ja talento sok awikyi ja maʼ yiʼoj ja lajune talento.
29 Yujni yibʼanal ja maʼ ayiʼoji ojni ajukyi mas, sok oj ajyukyuj jitsan lek; pe ja maʼ mey yiʼoji, asta ojni japjukyi ja jas yiʼoji.
30 Jaxa mosoʼal mi jas yaʼteli, awik eluk bʼa juera, bʼa kʼikʼinal. Ja yeʼn ti oj okʼuk tiw sok ti oj ya jetsʼetsʼuk ja yeji›.
31 Yajni xlijpixta xjak ja Yunin ja Winiki,* sok smoj yibʼanal ja anjeliki, anto tixa oj kulanuk ja bʼa strono xlijpixta.
32 Sok ojni tsomjuk bʼa stiʼ sat yibʼanal ja chonabʼiki, jaxa yeʼn oj spil ja kristyanoʼik bʼa chabʼ kʼole, jastalni ja talnachej wa spila ja chejik ja bʼa chiboʼik.
33 Jaxa yeʼn oj ya ja chejik bʼa stojol skʼabʼ, jaxa chiboʼiki bʼa surdaʼil skʼabʼ.
34 Jaxa Reyi oj yalyabʼ ja matik tey bʼa stojol skʼabʼi: ‹Laʼik ja weʼnlex matik akʼubʼal koʼuka lekilalex yuja jTati, bʼajinik ja sGobyerno ja Dyos chapubʼalawilex man kujlaji ja luʼumkʼinali.
35 Yujni kabʼ waʼin jaxa weʼnlexi awawexki jwaʼel. Taki jtiʼ jaxa weʼnlexi awawexki kaʼal. Ama mixa naʼawex jbʼaj sok mi xtaʼa bʼa oj kankona, jaxa weʼnlexi awawex ochkon ja bʼa wa najexi.
36 Bʼasan* ajyiyon jaxa weʼnlexi akʼutesonex. Koʼyon chamel jaxa weʼnlexi wa talnayonex. Lutjiyon bʼa preso jaxa weʼnlexi jaka wilonex›.
37 Anto, tixa oj yal-e ja matik toji: ‹Kajwal, ¿jas ora kilatikon waʼin xa wabʼi sok katikona waʼel, ma takin atiʼ sok katikona waʼal?
38 ¿Jas ora kilatikon mixa taʼa bʼa oj kanan jaxa keʼntikon katikon ochan ja bʼa jnajtikoni? ¿Jas ora kilatikon bʼasan aya sok jkʼutesatikon?
39 ¿Jas ora koʼya chamel ma ajyiya bʼa preso sok waj kilatikon?›.
40 Jaxa Reyi oj sjakʼyile: ‹Wa xkalawabʼyex meran lek: yibʼanal ja jasa kʼulanexyi june ja bʼa yal chʼinik kermanoʼik it keʼnani akʼulanexki›.
41 Anto tixa oj yalyabʼ ja matik tey bʼa surdaʼil skʼabʼi: ‹Jitsanik ja bʼa jtsʼeʼeli, ja matik taʼubʼalex tiʼal malo* yuja Dyosi. Kaʼaxik ja bʼa kʼakʼ mi xbʼobʼ tupuki bʼa chapubʼalyi ja Dyablo soka yanjeliki.
42 Yujni kabʼ waʼin, pe mi awawexki jwaʼel. Taki jtiʼ, pe mi awawexki kaʼal.
43 Mi jtaʼa bʼa oj kankona,* pe mi awawex ochkon ja bʼa wa najexi. Bʼasan ajyiyon, pe mi akʼutesonex. Koʼyon chamel sok lutjiyon bʼa preso, pe mi atalnayonex›.
44 Jaxa yeʼnle ojni cha yal-e: ‹Kajwal, ¿jas ora kilatikon waʼin xa wabʼi ma takin atiʼ, mixa taʼa bʼa oj kanan, ma bʼasan ajyiya ma koʼya chamel ma ajyiya bʼa preso sok mi jtalnayatikon?›.
45 Anto ja yeʼn tixa oj sjakʼyileʼa: ‹Wa xkalawabʼyex meran lek: ja jas mi akʼulanexyi june ja bʼa yal chʼinik kermanoʼik it keʼnani mi akʼulanexki›.
46 Ja it jumasaʼ ojni chʼayjuk snajele* bʼa tolabida, pe ja matik toji oj ajukyile ja sakʼanile bʼa tolabida».
Notaʼik
^ Ma «mi biboʼuke».
^ Ma «biboʼe».
^ Ma «jak».
^ Jun talento griego yalal 20 kilo sok 400 gramo.
^ Jach kanel ja bʼa griego: «plata».
^ Ma «tixa jak».
^ Jach kanel ja bʼa griego: «plata».
^ Ma «la jakyoni».
^ Ma «yal».
^ Kʼela ja bʼa Yaljelik cholubʼal.
^ Ma «Mey mas jkʼu».
^ Kʼela ja bʼa Yaljelik cholubʼal, Tawanel tiʼal malo.
^ Ma «Mixa naʼawex jbʼaj».
^ Jach kanel ja bʼa griego: «oj kʼutsjuke-el».
