Mateo 18:1-35
18 Ja bʼa ekʼele jaw, ja nebʼumaniki mojxiye soka Jesús sok sjobʼoweyi: «¿Machunkiluk ja mas niwan ja bʼa Gobyerno bʼa satkʼinali?».
2 Ja yeʼn tixa spaya jun yal kerem, sok ti yaʼa bʼa yoj snalane
3 sok yala yabʼye: «Wa xkalawabʼyex meran lek: ta mixa tukbʼesa bʼajex sok mixa waʼabʼajex jastal yal untik, nunka oj ochanik ja bʼa Gobyerno bʼa satkʼinali.
4 Ja yujil, ja maʼ wa xyaʼa sbʼaj chʼinil jastal ja yal kerem it yeʼnani ja mas niwan ja bʼa Gobyerno bʼa satkʼinali;
5 sok ja maʼ wa skʼulan resibir jun yal kerem jastal it ja bʼa jbʼiʼili cha wani skʼulanon resibir ja keʼn.
6 Pe ja maʼ wa xya slok yok* june ja bʼa yal chʼinik it bʼa ayiʼoje skʼuʼajel bʼa keʼn, masni lek oj ajukyi lokan ja bʼa snukʼ june ja stojnal ja molino ja it wa xya sututuk ja burro sok amukxuk bʼa yoj mar.
7 ¡Pobre ja kristyanoʼik ja bʼa luʼumkʼinal it yuja wa xyawe slok yok* ja tuki! Meran, mini xbʼobʼ timxuk ja mi oj ajyuk lok okili, pe ¡pobre ja winik maʼ wa xyaʼa ja lok okili!
8 Ja yuj, ta jawa wok ma jawa kʼabʼ wa sloko awok,* kʼutsu ele sok jipa el najat. Masni lek meyuk juna kʼabʼ ma juna wok oja taʼ jawa sakʼanili yuja xchabʼila kʼabʼ ma xchabʼila wok oj jipjan ja bʼa kʼakʼ mi xbʼobʼ tupuki.
9 Chomajkil, ta jawa sat wa sloko awok,* bʼoyo ele sok jipa el najat. Masni lek oja taʼ jawa sakʼanil sok juna sat yuja xchabʼila sat oj jipjan ja bʼa skʼajkʼal ja Gehena.*
10 Talnabʼajik bʼa moka wilex menos june ja bʼa yal chʼinik it, yujni wa xkalawabʼyex ja yanjele bʼa satkʼinali tolabida wa xyilawe ja sniʼ sat ja jTat tey bʼa satkʼinali.
11 *
12 ¿Jas la chiyex? Lekbʼi jun winik ayiʼoj 100 chejik sok xchʼay june, ¿mi maʼ ojni yakan ja 99 ja bʼa witsik sok oj sleʼ ekʼ ja chej chʼayeli?
13 Sok ta staʼa, wani xkalawabʼyex meran lek: masto jel oj gustoʼaxuk yuja chej jaw yuja 99 mi chʼayeluki.
14 Jachni wa xcha ekʼ soka jTat* tey bʼa satkʼinali: ja yeʼn wa skʼana mini june oj chʼayuk ja yal chʼinik it.
15 Ja yujil, ta juna wermano xkoʼ mulala mok, kax taʼa loʼila tuchʼil sok a-snaʼ ja spalta.* Yujkʼa smaklaya, watani kumxuk jawa wermano.
16 Pe yujkʼa mi smaklaya, kumxan sok june ma chabʼ wa moj, yujni soka jas oj yal-e ja chawane ma oxwane testigo oj ilxuk ja smeranili.
17 Yujkʼa ja yeʼn mi smaklay ja yeʼnleʼi, alayabʼ ja kongregasyon. Sok ta ja yeʼn mi smaklay ja kongregasyon, anto ila jastal june mi kʼuʼumanuk Dyos sok jastal jun tsoma kontribusyon.
18 Wa xkalawabʼyex meran lek: yibʼanal ja jastik wa xmochxi ja bʼa luʼumi mochanxa oj ajyuk ja bʼa satkʼinali, sok yibʼanal ja jastik wa xtukxi ja bʼa luʼumi tukanxa oj ajyuk ja bʼa satkʼinali.
19 Cha wa xkalawabʼyex meran lek: ta chawane bʼa weʼnlex ja bʼa luʼumi akuerdo aye bʼa skʼanjel jun jasunuk tʼilan, ojni ajukyile yuja jTat tey bʼa satkʼinali.
20 Yajni tsomane chawane ma oxwane bʼa jbʼiʼil, tini oj ajyukon soka yeʼnleʼi».
21 Anto tixa mojxi ja Pedro sok sjobʼo: «Kajwal, ta ja kermano sleʼa smul jmok, ¿janekʼ ekʼele tʼilan oj ka perdon? ¿Kechan maʼ juke ekʼele?».
22 Ti sjakʼa ja Jesús: «Miyuk, mi kechanuk juke ekʼele, asta 77 ekʼele.
23 Ja yuj ja Gobyerno bʼa satkʼinali oj bʼobʼ slaj jastal jun rey bʼa skʼanayi a-stup ja sjele ja smosoʼiki.
24 Yajni kʼe skʼani, ijijanyi june bʼa sjelunej 10,000 talento.*
25 Pe yuja mey yiʼoj bʼa oj stupi, ja yajwali yaʼa mandar achonjuk ja yeʼn, ja xcheʼumi soka yuntikili. Cha jachuk yibʼanal ja jastik yiʼoji, bʼa jachuk oj tupuk ja sjeli.
26 Ja mosoʼali koʼ mekʼan bʼa stiʼ sat ja yajwali sok spatayi skʼujol: ‹Tekʼawontʼani sok oj jtupawi yibʼanal›.
27 Ja it jel nikjiyi skʼujol ja ajwalali, ja yuj sijpan ja smoso sok yayi perdon ja sjeli.
28 Pe el ja mosoʼal jaw sok staʼa june ja smoj mosoʼili, bʼa jelubʼalyi 100 denario.* Anto ti syamaʼa sok kʼe stsʼotyi ja snukʼi. Yala yabʼ: ‹¡Tupuki yibʼanal jawa jeli!›.
29 Jaxa smoj mosoʼili koʼ mekʼan bʼa stiʼ sat sok spatayi skʼujol: ‹Tekʼawontʼani sok oj jtupawi›.
30 Pe ja yeʼn mini smaklay. Tixa waja sok yaʼa mandar a-xchʼike bʼa preso man xchʼak stup ja sjeli.
31 Yajni ja tuk mosoʼalik yabʼye ja jas ekʼeli, mini tʼun lek yabʼye, sok waj yal-e yabʼ ja yajwale yibʼanal ja jas ekʼeli.
32 Anto ja yajwali sjeka spayjel sok yala yabʼi: ‹¡Mosoʼal jel malo! Ja keʼn kaʼa perdon yibʼanal jawa jeli yajni apataki jkʼujoli.
33 ¿Mi maʼ tʼilanukni oja naʼ syajulal ajyi jawa moji jastalni jnaʼa yajulal ja weʼni?›.
34 Jaxa yajwali jelni kʼe ja skoraja sok yayi bʼa skʼabʼ ja talna presoʼik bʼa oj ajyuk lutan man stupu yibʼanal ja sjeli.
35 Jachni oj cha skʼulukawilex ja jTat bʼa satkʼinali ta mixa waʼawex perdon spetsanila kʼujolex jawa wermanoʼexi».
Notaʼik
^ Kʼela ja bʼa Yaljelik cholubʼal, Lok okal.
^ Kʼela ja bʼa Yaljelik cholubʼal, Lok okal.
^ Ma «wa xya koʼan mulal».
^ Ma «wa xya koʼan mulal».
^ Kʼela ja bʼa Yaljelik cholubʼal.
^ Kʼela ja nota bʼa Mateo 17:21.
^ Ma bʼobʼta «wa Tatex».
^ Jach kanel ja bʼa griego: «sok tojo».
^ Ja it kʼotel 60 miyon bʼa denario. Kʼela ja nota bʼa bersikulo 28.
^ Jun denario jani ja stsʼakol wa xtupji june bʼa jun kʼakʼu aʼtel.
