Lucas 18:1-43
18 Anto ti yayile jun slajelal sbʼaja stʼilanil yiʼoj bʼa mok yaʼekan skʼulajel orasyon sok bʼa mok el sganaʼe.
2 Yala yabʼye: «Bʼa jun chonabʼ ajyi jun jues bʼa mi xiwyuj ja Dyosi sok mi skisa ja kristyano.
3 Sok ja bʼa chonabʼ jaw cha ti ajyi jun biuda bʼa tikʼanxta wa xwaj yile sok wa xyala yabʼi: ‹Akʼulajuki ja bʼa toj ja bʼa kʼumal it soka jkontra›.
4 Pe bʼa jun tyempo, ja yeʼn mini skʼana oj skoltay, pe tsaʼan yala sbʼaj: ‹Ama mi la xiwyonyuj ja Dyosi sok mi xkisa ja kristyano,
5 pe yuja mi xyaktayonkan ja biuda it, ojni kil akʼulajukyi ja bʼa toji bʼa jachuk mixa oj jakuk sok ojxa yaktayonkani›».
6 Anto ja Jesús tixa yalaʼa: «Ama mi tojuk ja juesi, ¿awabʼyex maʼ ja jas yala?
7 Anto, ¿mi maʼ yeʼn oj yil ja Dyos bʼa oj kʼulajukyile ja bʼa toj ja matik stsaʼuneji bʼa kʼakʼu akwal wa spataweyi skʼujol akoltajuke? Ja yeʼn cha ojni ajyuk spasensya soka yeʼnleʼi.
8 Wa xkalawabʼyex: yeʼnani oj yil bʼa wego akʼulajukyile ja bʼa toji. Pe yajni xjul ja Yunin ja Winiki,* ¿oj maʼ staʼ ja tikʼe skʼuʼajel* jaw ja bʼa luʼumi?».
9 Jaxa yeʼn cha yala yabʼye ja slajelal it jujuntik ja matik wa skʼuʼan sbʼaje toje sok wa spensarane mi xmakuniye ja tuki.
10 «Chabʼ winike wajyekʼe bʼa templo bʼa skʼulajel orar: ja juni fariseo, jaxa juni tsoma kontribusyon.
11 Ja fariseo kʼe tekʼan sok kʼe skʼul orar ja bʼa skʼujoli. Sok yala: ‹Kala Dyos, wa xkawi tsʼakatal yuja mi jachukon jastal ja tuki: ja matik wa sloʼlaye ja kristyano bʼa yijelkan ja jastik sbʼaji, mi tojuke, wa xchʼaykʼujolane ja nupaneli..., cha mini jachukukon jastal ja tsoma kontribusyon it.
12 Wa xtekʼa waʼin chabʼ ekʼele ja semana sok wa xkaʼa ja lajune parte bʼa yibʼanal ja jas wa xtaʼa›.
13 Pe ja tsoma kontribusyoni, bʼa najat tekʼan oche, asta mini xkʼan sjach ja sat ja bʼa satkʼinali, wa smakʼtsun* ja yaltsili sok wa xyala: ‹Kala Dyos, naʼa jyajulal yujni mulanumon›.
14 Wa xkalawabʼyex: yajni kumxi koʼ ja winik it ja bʼa snaji, masni toj kʼot iljuk ja bʼa stiʼ sat ja Dyosi ke yuja fariseo. Yujni yibʼanal ja maʼ niwan wa xyaʼa sbʼaji ojni ajuk kʼixwuk, pe ja maʼ chʼin wa xyaʼa sbʼaji ojni ajuk niwanbʼuk».
15 Ja kristyano cha wa xyiʼajejanyi ja yal yuntikile bʼa oj yayi kajan ja skʼabʼi.* Pe yajni yilawe ja it ja nebʼumaniki, och yut-e.
16 Pe ja Jesús skʼana aʼijukjanyi ja yal untiki sok yala: «Aʼawikan amojxuke jmok ja yal untiki. Moka leʼex modo stimjel, yujni ja sGobyerno ja Dyos yeʼn sbʼaje ja matik jachuke jastal yeʼnle.
17 Wa xkalawabʼyex meran lek: ta ay maʼ mi skʼulan resibir ja sGobyerno ja Dyosi, jastal jun yal untik wa skʼulan resibir ja jastiki, mini nunka oj ochuk ja tiwi».
18 Jun mandaranum ja bʼa judíoʼik sjobʼoyi: «Lekil Maestro, ¿jasa tʼilan oj jkʼuluk bʼa oj jtaʼ ja sakʼanil bʼa tolabida?».
19 Jaxa Jesús yala yabʼi: «¿Jas yuj waxa walakabʼ lekil Maestro? Mini maʼ lek, kechani june, jaʼitani ja Dyosi.
20 Ja weʼn waxa naʼa ja mandariki: moka chʼaykʼujoluk ja nupanel, mok milwanan, mok elkʼanan, moka leyi lom smul ja tuki, kisa jawa tat sok jawa nani».
21 Anto ja yeʼni yala: «Jkʼuʼunej yibʼanal ja jastik jaw man jchʼinil».
22 Yajni chʼak yabʼ ja it, ja Jesús tixa sjakʼayiʼa: «Wanto skʼulanawuj palta jun jasunuk, kax chono ja jasa wiʼoji sok pilayi ja matik pobre ja janekʼ oja taʼi; jachuk oj ajyukawuj jastik junuk jel chaʼanyabʼal ja bʼa satkʼinal. Tixa la jaka sok kʼotan jnochuman».
23 Yajni yabʼ ja it, ja winiki jel och stristeʼil, yujni jel riko.
24 Ja Jesús skʼela sok yala: «¡Jelni wokol oj yabʼye ochel ja bʼa sGobyerno ja Dyos ja matik jel yiʼoje takʼini!
25 Pes masni pasil oj ekʼuk jun camello bʼa sjotol jun tsʼistakʼin ke yuj jun riko oj ochuk ja bʼa sGobyerno ja Dyosi».
26 Ja matik yabʼye ja it sjobʼowe: «Anto, ¿machunkiluk oj bʼobʼ staʼ sakʼanil?».
27 Ja yeʼn sjakʼa: «Ja jastik mini tʼun oj bʼobʼuk ja bʼa stiʼ sat ja kristyano, sbʼaja Dyosi wani xbʼobʼi».
28 Ja Pedro yala yabʼi: «¡Kʼela! Ja keʼntikon kaʼunejtikonkan ja jastik jbʼajtikon bʼa oj jnochatikon».
29 Jaxa yeʼn yala yabʼye: «Wa xkalawabʼyex meran lek: spetsanil ja maʼ yaʼunejkan snaj, xcheʼum, yermano, snantat ma yuntikil yuja sGobyerno ja Dyos
30 ojni ajyukyujile mas jitsan ja bʼa tyempo* it, jaxa bʼa tyempo jakumi, sakʼanile bʼa tolabida».
31 Anto tixa yiʼaj el pilan ja 12 sjekabʼanumik sok yala yabʼye: «Kʼelawik, ti wajumotikʼe bʼa Jerusalén, sok ojni kʼot smeranil yibʼanal ja jas stsʼijbʼanekan ja alumanik sbʼaja Yunin ja Winiki.
32 Jun sjejel, oj ajuk bʼa skʼabʼ ja matik mi judíoʼuki, oj skʼuluke burlar, oj yixtalaʼuke sok oj stsujbʼuke.
33 Sok yajni yawetayi tsʼuʼum,* oj smil-e, pe ja bʼa yoxil kʼakʼu oj sakʼwuk».*
34 Pe ja yeʼnleʼi mini yabʼye stojol ja jastik it, yujni nakʼjiyile ja jas wa stojolan ja yaljelik it. Ja yeʼnleʼi mini yabʼye stojolil ja jas alxi.
35 Yajni wan mojxel ja Jesús ja bʼa Jericó, ti kulan ekʼ bʼa stiʼ bʼej jun winik mi xyila kʼinal sok wan skʼanjel limosna.
36 Yuja yabʼ ti ekʼum jun nole kristyano, ti och sjobʼ jas wan ekʼel.
37 Ti yalawe yabʼa: «¡Ti ekʼum ja Jesús ja Nazareno!».
38 Yajni yabʼi, awani: «¡Jesús, Yunin ja David,* naʼa jyajulal!».
39 Ja matik bʼajtan ayeʼi kʼe yut-e sok wa xyalawe yabʼ achʼajbʼajuk. Pe ja yeʼn masto och awanuk: «¡Yunin ja David,* naʼa jyajulal!».
40 Anto ja Jesús kʼot tekʼan sok yala aʼijukjanyi ja winiki. Yajni mojxita ja winiki, ja Jesusi tixa sjobʼoyiʼa:
41 «¿Jasa waxa kʼana oj jkʼulukawiʼi?». Ja yeʼn sjakʼayi: «Kajwal, ajamxuk ja jsati».
42 Ja yuj ja Jesús yala yabʼi: «Ajamxuk jawa sati; tojbʼiyata yuja waxa kʼuʼani».
43 Sok wegoxta cha yila kʼinal, jaxa yeʼn och snoch ja Jesús sok wanxta stoyjel ja Dyosi. Yajni yibʼanal ja chonabʼ yila ja it, cha stoyowe ja Dyosi.
Notaʼik
^ Kʼela ja bʼa Yaljelik cholubʼal.
^ Jach kanel ja bʼa griego: «ja skʼuʼajel».
^ Ma «stumtsin».
^ Wa xkʼan alxuk, bʼa oj ya koʼyi slekilale.
^ Kʼela ja bʼa Yaljelik cholubʼal, Ja jastal wa xtax ja tyempo.
^ Kʼela ja bʼa Yaljelik cholubʼal, Yajel tsʼuʼum.
^ Jach kanel ja bʼa griego: «oj kʼeʼuk».
^ Kʼela ja bʼa Yaljelik cholubʼal.
^ Kʼela ja bʼa Yaljelik cholubʼal.
