Lucas 16:1-31
16 Tsaʼan, ja Jesús cha yala yabʼ ja snebʼumaniki: «Ajyi jun winik riko bʼa ajyiyuj jun smayordomo.* Ja it lejiyi smul bʼa lom xchʼaka ja jastik sbʼaj ja yajwali.
2 Jaxa winiki spaya sok yala yabʼi: ‹Mini lekuk ja jas wanon yabʼjel bʼa weʼni. Kaʼax sok tsʼijbʼan jasa kʼulan soka jastik jbʼaji, yujni mixa xbʼobʼ ajyuk bʼa wa kʼabʼ ja jnaji›.
3 Anto ja mayordomo yala sbʼaj: ‹¿Jas oj jkʼuluk ja wego yuja mixa ti oj ya ajyuk bʼa jkʼabʼ ja snaj ja kajwali? Mixani ay lek kip bʼa oj aʼtijukon bʼa alaj sok wala kʼixwiyon skʼanjel limosna.
4 ¡Ah!, jnaʼata jasa oj jkʼuluk bʼa oj yawe ochkon bʼa snaje ja kristyano ja yajni mixa ti oj ajyuk bʼa jkʼabʼ ja naʼitsi›.
5 Tixa spaya jujune ja matik ay sjel soka yajwali. Ti sjobʼoyi ja bʼajtani: ‹¿Janekʼ jawa jel soka kajwali?›.
6 Ja yeʼn sjakʼayi: ‹Ay jelsok 100 bʼis* aseyte bʼa olivo›. Jaxa mayordomo yala yabʼi: ‹Tey ja sjuʼunil jawa jeli. Nutsubʼaj, kulanan sok tsʼijbʼan 50›.
7 Tixa cha sjobʼoyi pilan maʼ ay sjel: ‹Jaxa weʼn, ¿janekʼ jawa jeli?›. Jaxa yeʼn sjakʼa: ‹Ay jel 100 niwak medida* bʼa trigo›. Jaxa mayordomo yala yabʼi: ‹Tey ja sjuʼunil jawa jeli. Tsʼijbʼan 80›.
8 Jaxa ajwalali stoyo ja mayordomo, pes ama mini tojuk, spensaraʼan lek ja jas skʼulani. Yujni ja kristyano ja bʼa tyempo* it, ja bʼa jastal wa xyila sbʼaje soka smoj kʼiʼeleʼi, mastoni listoʼe bʼa yajel makunuk ja sbiboʼile yuja matik teye bʼa ijlabʼi.
9 Cha wa xkalawabʼyex: awik ajyuk awamigoʼex yajel makunuk ja rikesaʼik yiʼoj ja luʼumkʼinal it,* bʼa jachuk yajni skʼulan payari, oj ajan ochanik ja bʼa lugarik bʼa ti ajyel tolabida.
10 Ja kristyano toj ja bʼa tʼusani cha tojni ja bʼa jitsani, jaxa kristyano mi tojuk ja bʼa tʼusani cha mini tojuk ja bʼa jitsani.
11 Ja yujil, ta ja weʼnlexi mi toj ajyelukex yajel makunuk ja rikesaʼik yiʼoj ja luʼumkʼinal it,* ¿maʼ oj sjip skʼujola mokex ja meran rikesaʼili?
12 Sok ta mi toj ajyelukex yajel makunuk ja jas sbʼaje ja tuk kristyano, ¿maʼ oj yawilex ja jas chapubʼala wilexi?
13 Mini jun aʼtijum wa xbʼobʼ ajyuk mosoʼil bʼa chabʼ ajwalal, yujni oj yilkʼujoluk june sok oj syajtay ja juni, ma oj ajyuk toj sok june sok mi oj skis ja juni. Ja weʼnlexi mi xbʼobʼ ajyanik smoso ja Dyosi sok cha smoso ja Takʼini».
14 Ja fariseoʼiki, bʼa jel syajtaye ja takʼini, wane smaklajel yibʼanal ja jastik it sok och switsʼniʼuke.*
15 Jaxa Jesusi yala yabʼye: «Weʼnlexni ja matik waxa walawex kʼotelex toj ja bʼa stiʼ sat ja kristyano, pe ja Dyosi wani snaʼa sbʼaj jawa kʼujolexi. Yujni ja jas jel chaʼanyabʼalil xyila ja kristyano mini jas xmakuni xyila ja Dyosi.
16 Ja Ley sok ja Alumaniki cholxi man Juan. Man tyempo jaw kʼe cholxuk ja sGobyerno ja Dyosi jastal lekil rasonik, sok tuktukil tikʼe kristyano jel wa skʼujolane ochel ja tiw.
17 Ja smeranili, masni pasil oj chʼayuk ja satkʼinal soka luʼumi, pe mini oj chʼayuk jun xen yal letra ja bʼa Ley masan oj chʼak kʼot smeranil.
18 Spetsanil ja maʼ wa skʼutsu ja snupanel soka xcheʼumi sok xnupanisok pilan ixuk wani xchʼaykʼujolan ja snupanel,* jaxa maʼ wa xnupani sok jun ixuk bʼa skʼutsunej ja snupanel soka statami wani xchʼaykʼujolan ja nupaneli.
19 Ajyi jun winik riko bʼa lino ja skʼuʼi sok chakal morado,* sok ayiʼoj jun lekil sakʼanil sok jitsan jastik.
20 Pe mojan ja bʼa spuertaʼi kʼajyel wa xwaj yaʼekan jun kʼana limosna sbʼiʼil Lázaro bʼa bʼutʼel sbʼaj jun tikʼe yaga*
21 sok yuja waʼini wani x-okʼ skʼujol oj yabʼ ja jas wa xmokʼ ja bʼa smesa ja riko. Asta ja tsʼiʼiki wa xjak slekʼeyi ja syaga.
22 Yajni ekʼ ja tyempo, cham ja kʼana limosna sok jaxa anjeliki ti yiʼaje bʼa stsʼeʼel* ja Abrahán.
Chomajkil ja riko chami sok mukji.
23 Jaxa bʼa Kʼeʼeni,* yajni wan yijel wokoli, sjacha ja sati sok najato yila ja Abrahán sok tey bʼa stsʼeʼel* ja Lázaro.
24 Ja yuj skʼuman sok yala yabʼi: ‹Tatal Abrahán, naʼa jyajulal sok jeka ja Lázaro bʼa oj ya poxuk ja sniʼ skʼabʼi sok oj ya chebʼuk ja kakʼi, yujni jel chamkʼujol* ayon ja bʼa yajlubʼil ja kʼakʼ iti›.
25 Pe ja Abrahán sjakʼayi: ‹Kala kerem, ajuluka kʼujol ja weʼni mi atekʼa bʼa jastik lek ja bʼa wa sakʼanili, pe ja Lázaro jelni yiʼaj wokol. Pe ja wego tixani ay il wan ajel kulan skʼujol, pe ja weʼni chamkʼujol aya.
26 Cha mi kechanuk ja jaw, cha akʼubʼal jun niwan chaʼanil ukʼum wa spilawotik, bʼa jachuk, ja matik teye jmoktikoni wankʼa skʼanawe oj ekʼuke och ja bʼayexi, mini oj bʼobʼyujile, cha mini oj bʼobʼ ekʼukejan ja bʼaytikon ja kristyano teya mokexi›.
27 Anto ja riko yala yabʼi: ‹Ta jachkʼa tatal Abrahán, wa xkʼanawi oja jek bʼa snaj jtat,
28 yujni ay joʼe kermanoʼik, bʼa jachuk oj xchol yabʼye tsʼikan lek bʼa mi oj cha ochuke ja yeʼnle ja bʼa lugar it bʼa yijel wokoli›.
29 Jaxa Abrahán sjakʼayi: ‹Tini aysoke ja Moisés sok ja Alumaniki; a-smaklaye yeʼnle›.
30 Anto ja yeʼn yala: ‹¡Miyuk, miyuk, tatal Abrahán! Ta june ja bʼa matik chamelexa xwaj ja bʼayeʼi, ojni sutxuk skʼujole›.
31 Pe ja Abrahán sjakʼayi: ‹Ta mi smaklaye ja Moisés sok ja Alumaniki, cha mini oj kʼokxuke ta ay maʼ kʼejan ja bʼa chamwiniki›».
Notaʼik
^ Ma «jun winik yeʼn wa xyila ja snaji».
^ Ma «batoʼik». Jun bato ayiʼoj 22 litro.
^ Ma «coroʼik». Jun coro ayiʼoj 220 litro.
^ Kʼela ja bʼa Yaljelik cholubʼal, Ja jastal wa xtax ja tyempo.
^ Jach kanel ja bʼa griego: «rikesaʼik bʼa mi tojuk».
^ Jach kanel ja bʼa griego: «rikesaʼik bʼa mi tojuk».
^ Ma «och xchʼiwniʼuke».
^ Kʼela ja bʼa Yaljelik cholubʼal, Xchʼaykʼujolajel ja nupanel.
^ Jach kanel ja bʼa griego: «púrpura».
^ Ma «úlcera».
^ Jach kanel ja bʼa griego: «sniʼ yaltsil».
^ Ma «Hades». Wa xkʼan alxuk, ja lugar wa senyaʼan ja bʼa wane jijlel ja chamwiniki. Kʼela ja bʼa Yaljelik cholubʼal.
^ Jach kanel ja bʼa griego: «sniʼ yaltsil».
^ Ma «wokol».
