ŴANTHU mamiliyoni nganandi achitaku cha mwambu wa Khrisimasi. Kumbi atuvwa wuli chifukwa cha vo akusankha? Kumbi yiwu awona kuti apambana ndi vinthu vamampha? Kumbi ŵana ŵawu awona kuti anoleka vinthu vamampha? Wonani vo Akaboni aku Yehova akamba pa nkhani yeniyi.

Kukumbukiya Yesu Khristu: “Ndeche ndaje Kaboni waku Yehova ndalutangaku kaŵikaŵi cha ku tchalitchi. Ndalutanga ku tchalitchi pa nyengu ya Khrisimasi pamwenga Isitala pe. Chinanga kuti ndalutanga ku tchalitchi kweni ndaŵanaŵaniyangaku cha vakukwaskana ndi Yesu Khristu. Pasonu panu ndikondwere cha Khrisimasi kweni ndiluta ku maunganu kaŵi pa sabata ndipu ndisambiza so anyangu vo Bayibolu likamba vakukwaskana ndi Yesu!”—EVE AUSTRALIA.

Munthu wakondwa asani wapaska: “Ndikondwa ukongwa asani ŵanthu andipaska mphasu pa nyengu yo ndakhazanga cha. Nditiziyanja ukongwa mphasu zenizi! Nditanja so kupanga makadi ndipuso kujambula vithuzi ndi kupaska ŵanthu chifukwa vitiŵawovya kuti akondwengi, naniso vitindiwovya kuti ndikondwengi.”—REUBEN, NORTHERN IRELAND.

Kovya akavu: “Titanja kubikiya chakurya ŵanthu wo atama. Nyengu zinyaki titiŵapaska maluŵa, makeki pamwenga timphasu timanatimana kuti akondwengi. Titanja kuchita venivi chifukwa titende ŵanthu nyengu yeyosi yo takhumba.”—EMILY, AUSTRALIA.

Banja losi likumana pamoza: “Asani tosi takumana pamoza mu banja lidu kweniso kucheza, ŵana ŵidu atiŵaziŵa umampha awisewu ara, awisewu amana, asibweni ŵawu, anyinawu ara, azichi ŵa awisewu, ambuyawu, asiŵani ŵawu ndi abali ŵawu anyaki. Chifukwa chakuti palivi zuŵa la holide lo tikujalikiska, tichita kuchichizgika cha kuti tikawoni abali ŵidu ndipu nawu aziŵa kuti tiluta kuchiŵawona chifukwa chakuti titiŵayanja.”—WENDY, CAYMAN ISLANDS.

Chimangu: “Viwoneka kuti panyengu ya khrisimasi ŵanthu atangwanika ukongwa mwakuti mbamanavi ukongwa wo awanawaniya va chimangu. Ndasambira vo Bayibolu lilayizga ŵanthu ndipu ndituvwa umampha ukongwa. Ndiziŵa kuti ŵana ŵangu azamukondwa ndi umoyu wamampha kunthazi.”—SANDRA, SPAIN.