10-нҗы бап

Рухы шахсыетлер бизе нәхили тәсир эдйәр?

Перишделер адамлара көмек эдйәрми?

Залым рухлар адамлара нәхили тәсир эдйәр?

Залым рухлардан горкмалымы?

1. Биз нәме үчин перишделер барада билмели?

БИР адам билен якындан танышмакчы болсак, илки билен, онуң машлагасы билен танышярыс. Ехова Худайы хем якындан танамак үчин, онуң перишделерден ыбарат болан гөкдәки машгаласы билен танышмалы. Мукаддес Язгыларда перишделере «Худайың огуллары» дийилйәр (Эйюп 38:7). Худайың ниетинде оларың нәхили орны бар? Олар адамзат тарыхына тәсир этдилерми? Бизиң дурмушымыза тәсир эдйәрлерми? Тәсир эдйән болсалар, нәдип?

2. Перишделери ким яратды ве оларың саны нәче?

² Мукаддес Язгыларда перишделер барада йүзлерче сапар агзаляр. Гел, олар барада көпрәк билер ялы, кәбир аятлара середели. Перишделери ким яратды? Колоселилер 1:16-да шейле дийилйәр: «Гөкдәки ве ердәки... затларың барыны... шол [Иса Месих] яратды». Гөршүмиз ялы, Ехова Худай әхли перишделери Иса Месих аркалы яратды. Гөкде нәче перишде барка? Мукаддес Язгылар оларың йүзлерче миллиондыгыны ве өрән гүйчлүдигини айдяр (Зебур 103:20) *.

3. Эйюп 38:4—7-нҗи аятларда перишделер барада нәме айдыляр?

 ³ Мукаддес Язгылар Ер ярадыланда «Худайың әхли огуллары шатланды» диййәр (Эйюп 38:4—7). Диймек, перишделер энтек ынсан ве Ер ярадылманка ярадылды. Рухы шахсыетлериң дуйгулары хем бар, себәби ёкардакы аятда перишделериң «билеликде шатланандыгы» айдыляр. Үнс берен болсаң, «Худайың огулларының хеммеси» билеликде шатланды. Диймек, шол вагт перишделериң хеммеси агзыбир машгала болуп Ехова гуллук эдйәрди.

ПЕРИШДЕЛЕР ГОЛДАВ БЕРЙӘР ВЕ ГОРАЯР

4. Перишделериң адамзадың дурмушы билен гызыкланяндыгыны Мукаддес Язгылар нәдип гөркезйәр?

⁴ Ынсан ярадыландан бәри, вепалы перишделер адамзада ве Худайың ниетиниң ер йүзүнде ерине етишине сын эдип гелйәр (Сүлейманың тымсаллары 8:30, 31; 1 Петрус 1:11, 12). Вепалы перишделер көп адамларың сөйгүден долы Ярадыҗыдан йүз өврүп, оңа гуллук этмейәнини гөрдүлер. Элбетде, бу олары гаты гынандырандыр. Йөне бир адам тоба эдип Ехова доланса, «перишделериң арасында шатлык боляр» (Лука 15:10). Перишделер адамлар хакда алада эдйәр. Шонуң үчин Ехова ердәки вепалы гуллукчыларыны голдамак ве горамак үчин перишделери энчеме гезек иберипди (Еврейлер 1:7, 14). Гел, кәбир мысаллара середели.

5. Мукаддес Язгылардан билшимиз ялы, перишделер адамлары нәдип голдаярды?

⁵ Ики перишде Лут атлы догры адамы ве онуң гызларыны халас этмек үчин, Содом ве Гомора диен худайсыз шәхерден алып чыкдылар (Барлык 19:15, 16). Йүзлерче йылдан соң, Даниел пыгамбер ёлбарслы чукурдан аман-саг чыкып: «Мениң Худайым өз перишдесини иберип, ёлбарсларың агзыны баглады» дийди (Даниел 6:22). Б. э. I асырында бир перишде Петрус ресулы түрмеден  бошатды (Ресулларың ишлери 12:6—11). Шейле-де Иса пыгамбер ер йүзүнде гуллуга башланда, перишделер оны голдадылар (Маркус 1:13). Иса Месихиң өлүминиң өң янында, бир перишде гөрнүп, «Оны гүйчлендирди» (Лука 22:43). Дурмушының иң бир мөхүм пурсатында перишделериң голдавы Иса үчин, гөр, нәхили теселли боландыр!

6. а) Шу гүнлер перишделер Худайың халкыны нәдип гораяр? б) Биз хайсы соваллара середерис?

⁶ Шу гүнлер перишделер ынсан кешбине гирип, Худайың халкына гөрүнмейәр. Олар гөзе гөрүнмесе-де, Худайың халкыны хемишекиси ялы гораяр. Эсасанам, рухы тайдан гораярлар. Мукаддес Язгылар шейле диййәр: «Реббиң перишдеси Ондан горкянларың дашында дүшелге гуряндыр, олары халас эдйәндир» (Зебур 34:7). Бу сөзлер бизе гөр, нәхили теселли берйәр! Себәби бизи хеләк этҗек болян залым перишделерем бар. Олар кимлер? Олар ниреден пейда болдулар? Бизе нәдип зыян етирҗек болярлар? Бу совалларың җогабыны билмек үчин, адамзат тарыхының башлангыҗында нәме боланыны билели.

ПЕРИШДЕЛЕРДЕН КИМ БИЗЕ ДУШМАН?

7. Шейтан максадына етҗек болуп, хачандан бәри адамлары Худайдан дашлашдырып гелйәр?

⁷ 3-нҗи бапдан билшимиз ялы, бир перишде хеммелериң үстүнден хөкүм сүрҗек болуп, Худая гаршы чыкды. Соңра оңа Шейтан Иблис диен ат берилди (Ылхам 12:9). Шейтан эрбет максадына етҗек болуп, Хов энәни алдады. Шондан бәри 16 асырың довамында Абыл, Ханох ве Нух ялы кәбир вепалы гуллукчылардан башга әхли адамлары диен ялы Худайдан дашлашдырды (Еврейлер 11:4, 5, 7).

8. а) Кәбир перишделер нәдип җын болдулар? б) Нухуң тупанындан халас болмак үчин, җынлар нәме этди?

⁸ Нух пыгамбериң дөврүнде башга-да кәбир перишделер  Ехованың гаршысына чыкдылар. Олар гөкдәки өйлерини гоюп, адам кешбине гирип ере дүшдүлер. Нәме үчин? Барлык 6:2-де шейле дийилйәр: «Худай огуллары адам гызларының овадандыгыны гөрдүлер ве бүтин сеченлеринден өзлерине аял алдылар». Эмма Ехова оларың эрбетлигине ве адамлары аздырмагына чыдамады. Ол залым адамларың хеммесини ёк эдип, вепалы гуллукчыларыны халас этмек үчин, ер йүзүне бүтиндүнйә тупаныны иберди (Барлык 7:17, 23). Питне турзан перишделер, ягны җынлар ынсан тенини ташлап, гөге доландылар. Олар «җынларың ханы» болан Иблисиң тарапына гечдилер (Матта 9:34).

9. а) Җынлар гөге гайдып баранларында нәме болды? б) Биз нәмә середерис?

 ⁹ Питне турзан перишделер гөге гайдып баранларында, бир вагт Шейтаның ковлушы ялы, олар хем Худайың гөкдәки машгаласындан ковулдылар (2 Петрус 2:4). Олар хәзир ынсан тенине гирип билмеселер-де, адамлары аздырмагы довам эдйәрлер. Шейтан җынлар аркалы «бүтин дүнйәни аздыряр» (Ылхам 12:9; 1 Яхя 5:19). Җынлар адамлары алдамак үчин, хер хили усул уланяр (2 Коринтослылар 2:11). Гел, оларың кәбирлерине середели.

ҖЫНЛАР АДАМЛАРЫ НӘДИП АЛДАЯР?

10. Спиритизм нәме?

¹⁰ Җынлар адамлары алдамак үчин спиритизми уланяр. Спиритизм — җынлар билен гөс-гөни я-да арачы аркалы гатнашык сакламак. Мукаддес Язгылар спиритизм билен мешгулланмагы язгаряр ве онуң билен баглы затлара баш гошмазлыгы үндейәр (Галатялылар 5:19—21). Балыкчыларың гурчук уланышы ялы, җынлар хем спиритизми уланяр. Олар хер хили балык тутмак үчин, дүрли затлары уланяр. Шонуң ялы җынлар хем спиритизмиң дүрли гөрнүшлерини уланяр.

11. Палчылык нәме ве онуң билен баглы затлардан нәме үчин гача дурмалы?

¹¹ Җынларың уланян усулларының бири — палчылык. Палчылык нәме? Бу гелеҗеги я-да нәбелли зады билҗек болмаклык. Палчылыга астрология, карт, җадылы даш ве элиң аясына середип пал атмаклык хем-де ырымдыр дүйшлери ёрмаклык гирйәр. Көп адамлар пал атмаклыга зыянлы иш дәл дийип дүшүнселер-де, Мукаддес Язгылар палчылар билен җынларың билеликде иш салышяндыгыны айдяр. Меселем, Ресулларың ишлери 16:16—18-нҗи аятларда бир гыза билгичлик этдирйән «палчы рух» барада айдыляр.  Эмма ол гыздан җын чыканда, билгичлик укыбыны йитирди.

12. Өлүлере йүз тутмак нәме үчин ховплы?

¹² Җынларың адамлары алдамак үчин уланян ене бир усулы, өлүлере йүз тутмак. Көпленч бу алдава доган-гарындашының өлүмине хасрат чекйән адамлар дүшйәр. Олар өлен адамлар билен гүрлешип боляндыр өйдйәрлер. Җынлар билен гатнашык саклаян адамлар, өлен адамлардан хабар етирйәрлер я-да оларың сесине меңзедип гүрлейәрлер. Шонуң үчин көплер адам өленден соңам яшаяндыр өйдйәрлер ве олар билен гүрлешсең теселли тапяң диййәрлер. Эмма шейле «теселли» ялан ве ховплы. Нәме үчин? Себәби җынлар өлен адамың сесине өйкүнип билйәр ве олар хакда маглумат хем берйәр (1 Патышалар 28:3—19). Шейле-де 6-нҗы бапдан билшимиз ялы, адам өленсоң яшамаяр (Зебур 115:17). Шонуң үчин «өлүлери чагырян» адамлар җынлара өзлерини алдадып, Худайың кануныны бозярлар (Кануның  гайталанышы 18:11; Ишая 8:19). Җынларың алдавына дүшмекден әгә бол.

13. Җынлардан горкуда яшан адамлар нәмәни башардылар?

¹³ Залым рухлар адамлары диңе бир алдаман, эйсем, олары горкузярларам. Шейтан хем-де җынлар «вагтының азлыгыны» ве басым хөкүм эдилҗегини билйәрлер. Шонуң үчин хәзир олар хас-да гахарлы (Ылхам 12:12, 17). Муңа гарамаздан, залым рухлардан яңа озал горкуда яшан мүңлерче адамлар оларың тәсиринден азат болдулар. Нәдип? Спиритизм билен мешгулланян адамлар нәме этмели?

ЗАЛЫМ РУХЛАРА НӘДИП ГАРШЫ ДУРМАЛЫ?

14. Залым рухларың тәсиринден гутулмак үчин, Эфесдәки месихчилериң гөрелдесине эерип нәме этмели?

¹⁴ Мукаддес Язгылар залым рухлара нәдип гаршы дурмалыдыгыны ве оларың тәсиринден нәдип гутулып боляндыгыны дүшүндирйәр. I асырда Эфес шәхериндәки месихчилериң нәхили гөрелде галдыранына середелиң. Месихчи болмазындан өң, оларың кәбирлери спиритизм билен мешгулланярды. Спиритизмден гутулмак үчин олар нәме этдилер? Мукаддес Язгыларда: «Җадыгөйлик билен мешгулланянларың бир топары китапларыны үйшүрип, хеммәниң гөзүниң алнында якды» дийилйәр (Ресулларың ишлери 19:19). Бу тәзе шәгиртлер җадыгөйлиге дегишли китапларыны ёк эдип, залым рухлардан гутулмак ислейәнлере говы гөрелде гөркездилер. Ехова гуллук эдеси гелйән адамлар спиритизме дегишли затларыны ёк этмели. Муңа спиритизм билен мешгулланмага хөвеслендирйән ве оны гызыклы эдип гөркезйән китаплар, җурналлар, фильмлер, плакатлар ве айдым-сазлар гирйәр. Шу затлара бела-бетерден горанмак үчин дакынылян дога-тумар, дагдан, монҗук ве башга затлар хем дегишли (1 Коринтослылар 10:21).

15. Залым рухлара нәдип гаршы дурмалы?

 ¹⁵ Эфесдәки месихчилериң җадыгөйлиге дегишли китапларыны яканларындан соң, бирнәче йыл геченде, Павлус ресул олара: «Чүнки бизиң сөвешимиз... яманлыгың гөкдәки рухы гудратларына гаршыдыр» дийди (Эфеслилер 6:12). Гөршүмиз ялы, җынлар үстүн чыкмак үчин дынгысыз гөрешйәрди. Онда месихчилер нәдип гаршы дурмалы? Павлус олара шейле маслахат берди: «Буларың әхлисиниң үстесине-де, иман галканыны эле алың! Онуң билен Шейтаның бүтин отлы окларыны өчүрмеги башарарсыңыз» (Эфеслилер 6:16). Иман галканымыз нәче берк болса, залым рухлара шонча-да үстүнликли гаршы дуруп билерис (Матта 17:20).

16. Иманымызы нәдип беркитмели?

¹⁶ Иманымызы нәдип беркитмели? Мукаддес Язгылары өвренмеги довам эт. Галаның берклиги онуң фундаментине баглы. Шонуң ялы-да иманымызың берклиги хем онуң фундаменти болан Мукаддес Язгылары билшимизе баглы. Биз Мукаддес Язгылары хер гүн окап, өвренсек иманымыз беркәр. Шейле иман берк гала кимин, бизи залым рухлардан горар (1 Яхя 5:5).

17. Залым рухлардан горанмак үчин ене нәме этмели?

¹⁷ Эфесдәки месихчилер ене нәме этмелиди? Олара башга-да гораг герекди, чүнки олар җынлардан долы шәхерде яшаярдылар. Павлус: «Хер хили дога ве дилег билен, хемише Рухда дога эдиң» дийди (Эфеслилер 6:18). Шу гүнлер хем дүнйә җынлардан долы боланы үчин, бизи залым рухлардан горар ялы, Ехова эрҗеллик билен дога этмели. Дога эденимизде Ехованың адыны тутмалы (Сүлейманың тымсаллары 18:10). Бизи Шейтан Иблисден гутарар ялы, Худайдан көмек сорамалы (Матта 6:13). Ехова бизиң ак йүрекден эдйән догаларымыза хөкман җогап берер (Зебур 145:19).

18, 19. а) Залым рухлардан үстүн чыкмага саңа нәме көмек эдер? б) Индики бапдан хайсы сорагың җогабыны билерис?

 ¹⁸ Залым рухлар ховплы болса-да, биз олардан горкуп йөрмели дәл. Мунуң үчин Иблисе гаршы дурмалы ве Худайың ислегини берҗай эдип, оңа якынлашмалы (Якуп 4:7, 8). Залым рухларың гүйҗи чәкли. Нухуң гүнлеринде олар җезаландырылыпды, инди болса ахыркы хөкүме гарашярлар (Яхуда 6). Бизи Ехованың гүйчли перишделериниң гораяндыгыны хем унутма (4 Патышалар 6:15—17). Бу перишделер залым рухлар билен гөрешде, бизиң берк дурмагымызы ве оларың азгын тәсирине гаршы дуруп билмегимизи ислейәрлер. Вепалы перишделер башгача айданыңда бизи рухландырярлар. Шонуң үчин гелиң, Еховадан ве онуң вепалы перишделеринден дашламалың хем-де спиритизмиң әхли гөрнүшлеринден гача дуруп, Худайың Сөзүндәки маслахатлара хемише эерелиң (1 Петрус 5:6, 7; 2 Петрус 2:9). Бу бизе залым рухлара гаршы гөрешде үстүн чыкмага көмек эдер.

¹⁹ Йөне Худай бу залым рухларың яшамагына хем-де адамларың хорлук чекмегине нәме үчин ёл берйәркә? Бу сорагың җогабыны индики бапдан билерис.

[Чыкгыт]

МУКАДДЕС ЯЗГЫЛАР НӘМЕ ӨВРЕДЙӘР?

▪ Вепалы перишделер Ехованың гуллукчыларына көмек этмәге хемише тайын (Еврейлер 1:7, 14).

▪ Шейтан хем-де җынлар адамлары алдап, олары Худайдан дашлашдырҗак болярлар (Ылхам 12:9).

▪ Сен Худайың ислегини ерине етирип, Иблисе гаршы дурсаң, ол сенден «гачар» (Якуп 4:7, 8).

[Макаланың сораглары]

[99 Сахыпадакы сурат]

«Мениң Худайым перишдесини иберип, ёлбарсларың агзыны баглады» (Даниел 6:22)

[101 Сахыпадакы сурат]

Җынлар адамлары хер хили усул билен алдаяр

 [102 Сахыпадакы сурат]

ЗАЛЫМ РУХЛАРА НӘДИП ГАРШЫ ДУРМАЛЫ?

[102 Сахыпадакы сурат]

▪ Спиритизме дегишли затлары ёк этмели

▪ Мукаддес Язгылары өвренмели

▪ Худая дога этмели