1, 2. Иса нәме үчин Мартаны говы гөрйәрди ве Мартаның бикәмил боландыгы нәмеден гөрүнйәр?

СИЗ Мукаддес Язгыларда агзалян Марта барада нәме билйәрсиңиз? Инҗилде Марта Исаның иң якын ве говы гөрән достларының арасында боландыгы айдыляр. Элбетде, Иса бейлеки Худая вепалы аяллара хем хормат гойярды. Меселем, ол өз эҗеси Меръеми, шейле-де Мартаның уясы Меръеми говы гөрйәрди (Яхя 11:5; 19:25—27). Гелиң, Исаның нәме үчин Марта улы хормат гояндыгыны билелиң.

² Иса Мартаны диңе бир мыхмансөерлиги ве зәхметсөерлиги үчин дәл-де, эйсем, онуң рухы тайдан берк аял боландыгы үчин говы гөрйәрди. Марта Исаның өвредйән затларына чын йүрекден ынанярды. Ол Исаның вада эдилен Месихдигине берк иман эдйәрди (Яхя 11:21—27). Элбетде, Марта әхли адамлар ялы бикәмилди. Бир гезек Иса Мартаның өйлерине мыхманчылыга баранда, Марта уясы Меръемиң болшуна гынанып, Исадан җигисине кәемегини хайыш эдйәр. Марта: «Я Реб! Гыз доганымың  мениң еке өзүме хызмат этдирип йөрмеги сениң первайыңа дәлми? Оңа айт, маңа көмеклешсин» дийди (Лука 10:38—42-нҗи аятлары окаң). Биз бу вакадан нәме өвренип билерис?

3, 4. Меръем хайсы маныда «оңат пайы» сайлады ве Марта ондан нәмәни өвренди? (Макаланың башындакы сурата середиң).

³ Иса Марта билен Меръемиң мыхмансөерлиги үчин олара гымматлы хакыкаты өвретди. Меръем бейик Мугаллымың айдян сөзлеринден өвренмек үчин мүмкинчилиги элден гидермеди. Шол себәпли «ол Исаның аягына якын отурып, Онуң сөзлерине гулак асярды». Марта-да шейле эдип билерди. Шонда Иса хем Мартаны оны үнсли диңләндиги үчин өверди.

⁴ Марта үйтгешик нахар биширмек ве Иса өзүни аркайын дуяр ялы, башга ишлери этмек билен башагайды. Эмма бу ишлериң бары герекмеҗек аладады ве Марта Меръеме гахарланярды. Иса Мартаның шейле көп затлары эдйәндигине үнс берип, мәхир билен оңа: «Марта, Марта! Сен көп затлара аладаланып, биынҗалык болярсың». Иса бирҗе йөнекей нахарың етерлик болҗакдыгыны айтды. Инди Иса: «Меръем өзүнден алынмаҗак оңат пайы сайлады» дийип, оны үнсли диңләндиги үчин өвди. Меръем шол агшам иен нахарыны ятдан чыкарса-да, Исаны үнсли диңләндиги үчин алан рухы иймитини ве онуң айдан өвгүли сөзлерини хич хачан унутмазды. Мундан 60 йыл геченден соңра Яхя ресул «Иса Мартаны, онуң уясыны... говы гөрйәрди» дийип язды (Яхя 11:5). Бу болса Мартаның Исаның сөйги билен берен дүзедишини кабул эдип, Ехова вепалы гуллук этмәге җан эдендигини гөркезйәр.

5. Бизиң гүнлеримиз гадымы дөвүрден нәмеде тапавутланяр ве нәхили сораг дөрейәр?

⁵ Элбетде, гадымы дөвре гараныңда, бизиң гүнлеримизде башагай эдйән затлар хас көпелди. 1958-нҗи йылың 15-нҗи сентябрында чыкан «Гаравул диңи» журналында Ехова гуллук эденде, технология билен башагай болмазлык барада доган-уялара дуйдурылды. Хатда шу вагтам хер гүн диен ялы тәзе зат чыкяр. Адамлар овадан журналлара, радио, телевизора ве кинолара гитдигиче гызыкярлар. Шол «Гаравул диңи» журналында бизиң хәзирки залым дүнйәниң соңы голайлашдыгыча «башагай» эдйән затларыңам көпелйәндиги айдылды. Догруданам, шейле дәлми нәме?! Шол себәпли ваҗып сораг йүзе чыкяр: «Әхмиетсиз затлар билен башагай болман, Меръем ялы үнсүмизи рухы затлара гөнүкдирмәге нәме көмек эдер?»

6. Ехованың халкы дүнйәниң технологиясындан нәдип пейдаланяр?

⁶ Ехованың халкы хош хабары яйратмак үчин бу дүнйәниң технологиясыны уланяр. Меселем, Биринҗи җахан уршундан өң ве уршың довамында Худайың гуллукчылары «Ярадылыш фотодрамасыны», ягны реңкли слайдлар ве сес язгылары билен багланышдырылып гөркезйәрдилер. Шейлеликде, дүрли юртларда яшаян миллионларча адамлар хош хабары эшитдилер. «Ярадылыш фотодрамасының» иң соңкы бөлүминде Иса Месихиң Мүңйыллык парахатлыкдан долы хөкүмдарлыгы гөркезилйәрди. Соңра радио аркалы Патышалык барадакы хош хабар бүтин дүнйәде яңланды. Шу гүнлер компьютер ве Интернет  аркалы дүнйәниң әхли күнҗегине, хатда чет ерлердәки адаларда яшаян адамларам хош хабары эшидйәрлер.

7. а) Дүнйәден долы пейдаланмак нәме үчин ховплы? б) Биз нәмәни унутмалы дәл? (Чыкгыда середиң).

⁷ Мукаддес Язгылар бизе дүнйәден долы пейдаланмагың ховплудыгыны дуйдуряр (1 Коринтослылар 7:29—31-нҗи аятлары окаң). Элбетде, кәбир затлара эрбет дийип болмаз, йөне олар көп вагтыңы аляр. Меселем, муңа гүйменҗе, китап окамак, телевизор гөрмек, сыяхат этмек, дүканлара айланмак, соңкы чыкан электрон энҗамлар ве гымматбаха затлар барадакы маглуматлары гөзлемек ялы ишлер дегишли. Мундан башга-да, Интернет я-да электрон почта аркалы хат алышмак ве геплешмек, хемише соңкы тәзеликлери, спорт ярышларыны гөрмек ялы затлар хем көп вагтыңы аляр. Хатда бу затлар эндик болуп галяр * (Ваг. 3:1, 6). Эгер биз ваҗып дәл затлара көп вагт сарп этсек, эсасы зада, ягны Ехова гуллук этмәге вагтымыз галмаз (Эфеслилер 5:15—17-нҗи аятлары окаң).

8. «Дүнйәдәки затлары сөймәң» диен маслахата эермек нәме үчин ваҗып?

⁸ I асырдакы ялы шу гүнлерем Шейтан бизи өзүне чекмек ве башагай этмек үчин бу дүнйәни уланмага җан эдйәр (2 Тим. 4:10). Шол себәпли бизиң әхлимиз Мукаддес Язгыларың «дүнйәдәки затлары сөймәң» диен маслахатына гулак асмалы. Шу маслахата лайыклыкда, биз хемише өзүмизи барлап, башагай болмакдан гача дурмалы. Шонда «Атамыза» болан сөйгимиз хас-да артар ве онуң ислегини ерине етирмек аңсат болар хем-де берекетлерини аларыс (1 Яхя 2:15—17).

9. Иса гөчме маныдакы гөз барада нәме дийди ве ол бизе нәхили гөрелде галдырды?

⁹ Исаның Марта сөйги билен берен маслахаты өзүниң гөрелдеси ве өвредйән затлары билен долы габат гелйәрди. Ол шәгиртлерине гөчме маныда гөзүңизи «сада сакла» диймек билен, бар үнсүңи Патышалык ишлерине гөнүкдирмәге хөвеслендирйәрди (Матта 6:22, 33-нҗи аятлары окаң). Иса бу бабатда говы гөрелде гөркезди, себәби онуң не көп зады, не  өйи, не-де ери болупдыр (Лука 9:58; 19:33—35).

10. Иса бизе нәхили говы гөрелде галдырды?

¹⁰ Иса вагыз этмәге көп зат пәсгел берип билерди, йөне ол муңа ёл бермеди. Ол гуллугына яңы башланда, Капернаумда адамлара өвредйәр ве гудрат гөркезйәр. Шондан соңра олар шәхеринде галмагы Исадан хайыш этдилер. Иса оларың хайышына нәме җогап берди? Ол: «Худайың Патышалыгының Хош Хабарыны Мен бейлеки шәхерлере-де билдирмели. Чүнки Мен мунуң үчин вагыз этдим» дийди (Лука 4:42—44). Догруданам, Иса Палестинаның әхли ерлерине айланып, вагыз эдйәрди. Иса кәмил болса-да, Худая җанаяман гуллук эдйәндиги үчин өрән ядаярды ве дынч алмак ислейәрди (Лука 8:23; Яхя 4:6).

11. Иса машгала давасыны чөзүп бермеги хайыш эден адама нәме дийди ве ол нәхили дуйдурыш берди?

¹¹ Соңра Иса шәгиртлерине ызарламалара дөз гелмек бабатда өвредип дурка, бир адам онуң сөзүни бөлүп: «Мугаллым! Доганыма айт, гой, ол мирасы мениң билен бөлүшсин» дийди. Йөне Иса оларың җеделине гошулман: «Эй адам, ким Мени сизиң казыңыз я мирас бөлүҗиңиз эдип белледи?» дийип җогап берди. Соңра Иса байлыга ковалашмагың Худая гуллук этмәге пәсгел берйәндигини дуйдурды (Лука 12:13—15).

12, 13. а) Исаның өлүмине бирнәче гүн галанда, греклериң кәбирини нәме гызыкландырды? б) Иса үнсүни совҗак болянлара нәме дийип җогап берди?

¹² Исаның ердәки яшайшының соңкы гүнлери өрән хасратлы гечди (Мат. 26:38; Яхя 12:27). Эмма ол көп ишлери этмелиди. Шейле-де ол меҗлисде кемсидилмелиди ве залымлык билен өлдүрилмелиди. Гелиң, б. э. 33-нҗи йылының нисан айының 9-на болан вакалара середелиң. Пыгамберлик эдилиши ялы, Иса Иерусалиме тайхарлы гелйәр ве мәреке оны «Реббиң адындан гелйән Патыша» диен сөзлер билен гаршылаяр (Лука 19:38). Эртеси гүн Иса ыбадатхана барып, ол ердәки ачгөз сөвдагәрлери мертлик билен ковяр. Себәби олар Худайың өйүнде затлары гымматбахадан сатып, бейлеки ехудылары талаярдылар (Лука 19:45, 46).

¹³ Шонда Иерусалимде грек прозелитлер хем барды. Олар Исаның эден ишлерине хайран галып, Филипуса Месих билен душурмагы хайыш этдилер. Эмма Иса этмели иң ваҗып зада кимдир бириниң пәсгел бермегине ёл бермеди. Элбетде, ол ат-абрай газанып, төлег гурбаныны бермекден йүз өвүрмек ислемейәрди. Шол себәпли ол тизден өлдүрилҗекдигини Андреас билен Филипуса дүшүндиренден соңра: «Җаныны сөййән оны йигренйәндир, бу дүнйәде җаныны йигренйән болса оны эбеди яшайыш үчин саклаяндыр» дийди. Иса греклери билесигелиҗи болман, өзүниң җанаямазлык хәсиетинден гөрелде алмага хөвеслендирди. Иса: «Маңа хызмат эдени Атам хорматлар» дийди. Элбетде, Филипус греклере Исаның айдан сөзлерини етирен болмалы (Яхя 12:20—26).

14. Иса вагыз ишини биринҗи ерде гойса-да, өзүни пайхаслы алып барандыгы нәмеден гөрүнйәр?

¹⁴ Иса эсасы зада, ягны хош хабары вагыз этмәге хич бир задың пәсгел бермегине ёл бермесе-де, ол хемише өзүне табшырылан юмуш барада ойланып йөрмеди. Бир сапар Иса тоя баранда гудрат билен сувы шераба өврүп, мыхманлары шатландырды (Яхя 2:2, 6—10). Шейле-де Исаны якын достлары ве хош хабар билен  гызыкланян адамлар агшамлык нахарына чагыранда, ол йүз өвүрмеди (Лука 5:29; Яхя 12:2). Эмма Иса көпленч Ехова дога этмәге, ойланмага ве дынч алмага вагт тапыпдыр (Мат. 14:23; Мар. 1:35; 6:31, 32).

15. Павлус ресул нәхили маслахат берди ве бизе нәхили гөрелде галдырды?

¹⁵ Павлус ресул «хер хили йүки... ташлалың» диенде, өзүни Ехова багыш эден месихчилери узак аралыга ылгаян түргенлер билен деңешдирди (Еврейлер 12:1-и окаң). Павлус өвредйән затларыныны диңе бир сөзде дәл, эйсем иш йүзүнде гөркезйәрди. Ол еврей дининиң берҗек ёкары везипесинден, шөхратындан ве байлыгындан йүз өвүрди. Павлус үнсүни «иң ёкары затлара» гөнүкдирип, Худая ыхлас билен гуллук эдйәрди ве тутуш Сирияда, Кичи Азияда, Македонияда, Яхудада вагыз эдйәрди. Павлус гөкде эбеди яшамак умыды барада шейле языпды: «Ыздакы затлары унудып, өңдәкилере эл узадып... байрага мынасып болмак үчин пеллехана тарап ылгаярын» (Флп. 1:11; 3:8, 13, 14). Павлус ресул «пикирини дагатман, Реббе берлер ялы» саллахлыгындан долы пейдаланды (1 Кор. 7:32—35).

16, 17. Биз дурмуш гурсак-да, гурмасак-да Павлусдан нәдип гөрелде алып билерис? Мысал гетириң.

¹⁶ Павлус ресул ялы кәбир месихчилерем өзүни Патышалык ишлерине багыш этмек үчин дурмуш гурмаярлар (Мат. 19:11, 12). Себәби дурмуш гуран месихчилериң көп машгала борчлары боляр. Эмма биз дурмуш гурсак-да, гурмасак-да, хер биримиз башагай болман Худая гуллук этмек үчин гөчме маныда «хер хили йүки... ташламалы» болярыс. Шонуң үчин биз ваҗып дәл затлара берйән вагтымызы Ехова көпрәк гуллук этмек үчин сарп этмели.

¹⁷ Гелиң, Уэльсде яшаян Марк билен Клэр атлы әр-аял билен болан вака середелиң. Оларың икисем мекдеби тамамландан соңра пионер гуллугына башладылар ве дурмуш гурансоңам оны довам этдилер. Марк шейле диййәр: «Биз халкара гурлушык ишлерине гатнашмак үчин дурмушымызы хас садалашдырып, улы җайымыздан ве ярым гүнлүк ишимизден гечдик». Олар соңкы 20 йылың ичинде Африканың дүрли күнҗегинде Патышалык залының гурлушык ишлерине гатнашдылар. Бир сапар Марк билен Клэриң бары-ёгы 15 доллары галанда, Ехова оларың аладасыны этди. Клэр шейле гүррүң берйәр: «Биз хер гүн Ехова гуллук эдип, өзүмизи багтлы дуйярыс. Биз энчеме достлары тапдык ве хич зада зар болмадык. Ехова долы вагтлы гуллук этмегиң берйән шатлыгыны бизиң терк эден затларымыз билен деңәп болмаяр». Долы вагтлы гуллук эдйән көп доган-уяларам шу сөзлере гошулярлар *.

18. Биз хайсы сораглара серетсек говы болар?

¹⁸ Биз барада нәме дийсе болар? Башагайлык себәпли Патышалык ишине ыхласымызың говшандыгыны биленимизде нәме эдерис? Эгер биз Мукаддес Язгылары окамага ве шахсы окувыны чуңңур өвренмәге вагт сарп этсек, оңа җогап тапарыс. Муны нәдип эдип билерис? Бу барада индики макалада гүррүң эдерис.