Ityav Cieryol Kpishi
Ityav man ayôôso ka a bende a ior i vihi kpen kpen. Ushoja kua ior mbagenev mba ityav mbi bende a ve yô nenge er ityav mbi cieryol kpishi yô.
USHOJA
“Hanma shighe yô, ka u nengen er i lu wuan ior shi vihin mbagenev iyol kehelee yô. Ka u henen a hen mwar wou.”—Mkaanem ma Gary, or u ken Britain.
“Yange i ker gbuuka, igbo va tam ken ijime, igen tam sha ishi, shi m nenge i wua ior kpishi, mbayev kua mbaganden cii. Ityav ka mbi na yô, ican man ku ve kera bee u kwagh ga.”—Mkaanem ma Wilmar, or u ken Colombia.
“Ka a ta or gbuuka sha ashe a ou yô, mayange kwagh la hungur we ga. Ka u zer umbur er yange nan lu ngoron shi kinen la gbem. Kwagh u nan hungur we sha won ga.”—Mkaanem ma Zafirah, kwase u ken Amerika.
IOR MBAGENEV
“Yange lum er a tsa kpa a kera saan mo iyol ga nahan. Ka i cier we iyol er a va wua u shin mba hen tsombor gayô azende a ou nahan.”—Mkaanem ma Oleksandra, kwase u ken Ukraine.
“Yange se wa nongo u ngohol kwaghyan i hemba ahwa 20, nahan i cier se iyol kpishi er a va ker igbo ia va ta se nahan.”—Mkaanem ma Daler, or u ken Tajikistan.
“Yange ityav wua mbamaren av. Kwagh ne na m hingir ancôghol, m ngu a or u surun mo ishima shin nengen sha a mo ga.”—Mkaanem ma Marie, kwase u ken Rwanda.
Er ityav mbi bende a ior mba se ter mkaanem vem sha heen ne nahan kpa, ve zua a msurshima. Man u hemban cii je yô, mba a vangertiôr ér ica a kera gba ga tsô ityav man ayôôso cii aa kera lu ga. Iyoukura ne ia pase er Bibilo i kaa ér kwagh la una er yô.
