Edeke lokabeit nges asubi iboro kere. Emameotor ageunet ido mam ejaunos ka esange da. (Isabulin 90:2) Nges alibunet akiro nukajokak nuejasi Obaibuli. (1 Timoteo 1:11) Kwape ejaikina oni Edeke aijar, ekoto oni aima nges bon.​—Kosiom Apukokinio 4:11.

Emamei itunganan yen ewanyunitor Edeke naarai erai nges Emoyo, akepolou ebe ejatar nges akuwan namam eputosi keda isuban luejarete kakwap. (Yokana 1:18; 4:24) Ejasi ngun da, ipedori oni amisikin iponesioke Edeke kosuban. Kwape anyunet, araito ka aturo nuegelegela elimokinitos oni nuikamunitos amina ka acoa ke. Etiai lo akwap itodikinit oni agogong ke.​—Kosiom Iromayon 1:20.

Ipedori oni aisisiaun nuipu nuikamunitos iponesio luka Edeke kotoma aisiom Ebaibuli. Kwape anyunet, elimokinit oni nuekoto Edeke ka numam nges ekoto, epone lo eyaitor itunga, ka epone lo eyaitor itunga koponesio aluegelegela.​—Kosiom Isabulin 103:7-10.

Kotema Yesu: ‘Papakosi loejai toma akuj, ekonikiror kitalaunai.’ (Matayo 6:9) Karaida ejatar Edeke adoketa nuipu, ejatar nges ekiror ediopet bon. Kangajepisinei nuipu, enyarao ekekiror koponesio aluegelegela. Kotoma Ateso enyaritai nges “Yawe.”​—Kosiom Isabulin 83:18.

Kotoma Obaibulin luipu elemaritai ekiror Edeke kosodete aisesakin do adoketa, Ejakait arai Edeke. Konye newadikaere Ebaibuli kolo, ekiror Edeke ajai aboisio nuedolitos  7,000. Abu Yesu kitejenu ekiror loka Edeke nesisianakina nges itunga nuikamunitos Edeke.​—Kosiom Yokana 17:26.

Kosesen ebidio Ejaatar Edeke ekiror?

Aiticanitoi naipol noi itodunit kereka ebe mam Edeke erai loipodokinit oni? Iyuunitos ice itunga ebe ejalakinit nges oni aiticanitoi anu aitem oni, konye mam ngun eraas abeit.​—Kosiom Yakob 1:13.

Ijaikinit Edeke etunganan aibuses na aseun nuekot ngesi. Mam oni isialamikinit apedor wok nailajara anu aseun aijanakin Edeke? (Yosua 24:15) Konye luipu aseutu aswam iboro lukarokok nejasi luce, apolor do aiticanitoi kotunga. Itipipilit do Yawe asesene iboro lukarokok.​—Kosiom Ageun 6:5, 6.

Erai Yawe Edeke lo epodokinit oni. Ekotor nges oni aijar na aiyalama. Katipet ebuni Edeke adotor aiticanitoi kangul luiswamaete nuepali. Konye ejatar nges aomisio nukajokak nuecamakinitor nges aiticanitoi ajaut apak naedit. Kosula 8, Ibuni oni aisisiaun anyoika aomisio ngun.​—Kosiom 2 Petero 2:9; 3:7, 13.

Kinyaraunit Yawe oni aikunyakin nejai nges kotoma ailip. Emina ngesi ngin itunganan. (Isabulin 65:2; 145:18) Ekapakina nges aitim. Ejeni nges nuitamit oni aswam aisialamikin ngesi, karaida kibucanari apakio ace. Karaida mam oni irai ikadolitok, Ipedori oni adukun edicane kede Edeke.​—Kosiom Isabulin 103:12-14; Yakob 4:8.

Kwape ejaikina Yawe oni aijar, Ibusakinit oni amina nges adepar idio itunganan kere. (Marako 12:30) Itoduni ijo akonimina nejai Edeke kotoma aisisia nuikamunitos nges Obaibuli ka aswam nuekoto nges, ibuni do ijo aikunyakin cut nejai nges.​—Kosiom 1 Timoteo 2:4; 1 Yokana 5:3.