KOANY! ejai ataker ationis! Abilibiluun! Iwany ijo itunga luasomakinos akipi? Icie kakesi apedosi adolere neonit. Erai Paul ngol kangina? Angicutu ber oni nunyoika iswamakina nges.

Kiit, adaun ikar iarei aenitai Paul ko Kaisarea. Kanen kitodokarai Paul ka ienan icie ataker alosit Rome. Ne etorotor kesi eiduny kapujan nako kurete, kokut ekwam lokagogong. Kokut ekwam noi tapi ikiliok emeni aikwang ataker. Mam apedorete aanyun akolong paaran arai aacer kware. Akaulo napaarasia nuipu, kodaun luaja toma amun kere naka aitajario.

Kanen kobwo Paul kotema: ‘Emameun yenetwaniari akeijar; dimarai ataker bon. Naarai kware abu emalaika loka Edeke kobu neajai eong kobala ebe, “Paul, sirikikurianar! Ibusakinit ijo aibwo kakonyen nuka Kaisar epugan loka Rome. Ido itajari Edeke ngul kere lueupas kajo.”’

Bala kiding kware aparan na 14 akaulo nageunia ekwam, koanyut ikekwangak ebe mam bob akipi idulok noi! Kanu akuriau anangakin amor kware aso kijesutu idoboi kec. Kiwala akwap koanyut agule. Kinerut aitam aikwangar ataker ngina agule.

Aso, keaputu neeonit, kipok ataker kasinge, kiminaikin. Kogeut akip adipidip ataker, kobilibilun. Kotema esirikalet lokapolokinit ebe: ‘Yes kere luipedorete aidu kosomakinos angolol kobeasi neeonit. Yesi da ngul luce kotupakisikesi ido kikamuntu amunyumunyen luka ataker aiting aingarak yesi.’ Kiswamautu kwapekwangin. Kwangin kokuata itunga kere 276 neonit, kwape esumunitor emalaika.

Enyaritai apujan Melita. Esiaka itunga noi, ido kisukunyutu ngul lukataker. Ne ebusuna akwap, kibwaikinai Paul ataker acie koyangarete Rome.