KIITUNIT ijo apupun nuikamunitos ikatumunak iuni luu? Eebo, eraas kes ipapero luka Daniel luapotu kogiroto inyamat lumam ajokuka kanukec. Konyarata luko Babulon kes Sadurak, Mesaki ka Abednego. Kongolia kes. Kanukinyo mam kes isudedeotor aima aput na kwape kaluce? Kangicutu ber oni.

Kiitunit ijo ikisila luabu Yawe elopet kiwadik luenyaritai Aicorakineta Atomon? Nasodit kakesi nes: ‘Sirikima idekesio icie dimarai eong.’ Ikatumunak luu erimaritos ekisil lo, karaida mam erai ibore yen epatana aswam.

Nebukadenesar, ekabaka loko Babulon, enyaraut ijaka luipu ainakin angosibib nejai aput naabu ngesi kosipok. Alimoki itunga kere: ‘Naipupunioto aruo naka arupepe, ka adeudeu ka ngolipone kere loeruo, kisudedei aima aput naka esabu. Yeni mam isudedei aima, ecakakinio kiding oupa loesarani noi.’

Akaulo nakesisiauna Nebukadenesar ebe mam Sadurak, Mesak ka Abednego esudedete, konyunyurikin noi. Kicorak ayaun kes nejai ngesi. Kolimok bobo kes aisuded. Konye emunos ikatumunak Yawe. ‘Epedori Edekekosi lokijaanakini ayuun isio,’ elimokinete Nebukadnesar. ‘Konye araida mam kiyuuni sio, mam sio isudedei aima aput kon naka esabu.’

Kepupu nu, konyunyurikin Nebukadenesar adepar. Ajai eupa neyapie kosodi aicorakin: ‘Kitasaranata eupa irwan akanykaarei adepar nelem esarania!’ Kanen kicorak ikagogongok luajaas ajoreke aien Sadurak, Mesak ka Abednego kacakakin da kes toma oupa loesarani noi. Esarani eupa noi tape eyarete aipelonoreta nuka akim itunga kwi ikagogongok. Konye biai ikatumunak iuni luapotu kesi kocakakis toma?

Kongolia ekabaka toma oupa, kokurianar noi. Kingit ngesi, ‘Mam nat oni kicakakinit itunga iuni eenen toma oupa loesarani?’

Kobongokis ikejanakinak: ‘Eebo, apotu oni.’

Kotema ngesi atiar: ‘Konye aseseni itunga iwongon elosete kokiding akim. Mam kes eenen, mam akim imusungit kes. Loiwongonet esubit bala edeke.’ Kikunyak ekabaka okek loka eupa kosodi aiworoor: ‘Sadurak! Mesak! Abednego! Yes ibulesin luka Edeke Loejai Kuju kakuj kolomutu kinga!’

Kelomutu kesi kinga, kangintunganan kere eseseni ebe mam kes imusunguna. Kanen kotema ekabaka: ‘Kituritete Edeke loka Sadurak, Mesak ka Abednego! Ejuku ekemalaika ayuun kes naarai mam esudedete ka aima edio edeke kere dimarai lokec.’

Mam na erai awanyunet na ejok tetere itupi aiyuunit Yawe?