Misy horohoron-tane agnarivo’e eo ho eo miseho, isan-taogne. Ndra tie tsy loho mahery aza ty ila’e amo o horohoron-taneo rehoe, le mahavita manimba raha maro, mampijale naho mamono ndaty. Mateteke o horohoron-taneo ro miterake tsonamy (riake miakatse amy i tanàgney), le mandravarava raha maro naho mamono ty ndaty mipetrake marine i riakey ey. Fa nirehake mialoha vao ty Baiboly tie hisy horohoron-tane mafe?

Hotreantikagne ato tie

•  Fa nirehake mialoha vao ty Baiboly tie hisy horohoron-tane?

•  Magnatanterake ty faminania ty Baiboly vao ty horohoron-tane misy amy izao?

•  Ino ty dika i faminaniagne miomba ty horohoron-tane rey amantika?

•  Ino ty heve-diso o ndatio miomba ty faminania ty Baiboly naho ty horohoron-tane?

 Fa nirehake mialoha vao ty Baiboly tie hisy horohoron-tane?

 Misy faminaniagne nirehafe i Jesosy amy Baiboly ao mirehake miomba ty horohoron-tane. Izao ty nirehafe’e:

 “Hisy firenena haname aly amy ty firenena, hisy ka fanjakagne haname aly amy ty fanjakagne ila’e. Hisy keré naho horohoron-tane amy ty toeragne sambe hafa.”​—Matio 24:7.

 “Hisy firenena haname aly amy ty firenena, hisy ka fanjakagne haname aly amy ty fanjakagne ila’e. Hisy horohoron-tane amy ty toeragne sambe hafa; sady hisy keré.”​—Marka 13:8.

 “Hisy horohoron-tane mafe, naho aretegne manjamagne vaho keré ty amy ty toeragne sambe hafa agne.”​—Lioka 21:11.

 Fa nirehake mialoha areke ty Jesosy fa hisy “horohoron-tane mafe” hiseho “amy ty toeragne sambe hafa” sady hisy aly, keré, naho arete manjamagne. Naho fa o raha rehoe ro miseho, le midika zay tie fa marine ty “fara ty tontolo toy”, ndra fa miaigne “amy ty andro fara’e” tika. (Matio 24:3; 2 Timoty 3:1) Naho ty Baiboly ro henteagne, le nanomboke tamy ty taogne 1914 ty “andro fara’e” sady mbe mitohy hatrake amy izao.

 Magnatanterake ty faminania ty Baiboly vao ty horohoron-tane misy amy izao?

 Eka. Tanterake amy ze andro iaignantika zao i faminaniagne nirehafe i Jesosy rey, agnisa izay i faminaniagne miomba ty horohoron-taney. Nanomboke tamy ty taogne 1914, le nisy horohoron-tane niiake 1 950 niseho, le ndaty roe tapetrisa mahery ty nimate. a Mareho moa ty raha niseho retoa.

 2004: Oseana Indiana. Nisy horohoron-tane nirefe 9,1 richter nahavy tsonamy, le tanàgne 12 eo ho eo ty nisimbà’e sady ndaty 225 000 ty nimate’e.

 2008: Chine. Nisy horohoron-tane nirefe 7,9 richter, nanimba tanàgne maro, le 90 000 te ho eo ty nimate, 375 000 ty naratse, le ndaty an-tapetrisa’e ty nanjare tsy nanan-tragno hitobohagne.

 2010: Haiti. Nisy horohoron-tane nirefe 7,0 richter. Tafara izay, nisy horohoron-tane tsy le nimafe faie mbe namono ndaty mihoatse ty 300 000, sady an-tapetrisa’e ka ty tsy nanan-tragno hitobohagne.

 2011: Japon. Nisy horohoron-tane nirefe 9,0 richter naho tsonamy namono ndaty 18 500 teo ho eo le an-ketse’e ty ndaty nafindra toeragne. Nipoake ty orinasa i Fukushima satria nisy fitaovagne niklera namboaregne ty tao, le vata’e nagnoho-doza. Ndaty 40 000 ro mbe tsy afake niheregne amy ty toeragne nisy aze marine o orinasa iohoe satria mbe nisy taratse nahafate ty tey.

 Ino ty dika i faminaniagne miomba ty horohoron-tane rey amantika?

 Mampahafantatse antika ty raha hiseho amy ty hoavy i faminania ty Baiboly miomba ty horohoron-tane rey. Hoe ty Jesosy: “Naho fa trea’areo ka fa miseho ze raha zay, le ko haligno fa antitotse ty Fanjakàn’Andrianagnahare.”​—Lioka 21:31.

 Rehafe ty Baiboly fa fitondram-panjakagne tena misy an-dagnitse agne ty Fanjakàn’Andrianagnahare, le i Jesosy ty mpanjaka’e.​—Matio 6:10.

 Naho fa ty Fanjakàn’Andrianagnahare ro minday ty tane toy, le tsy hisy loza arake ty natiora sasa, agnisa izay o horohoron-tane mampijale ndatio. (Isaia 32:18) Fagnampe izay, ho foagna’e tsy hisy sasa ty voka-draty o horohoron-taneo tamo o ndatio. Agnisa izay ty voka-drati’e ara-batagne naho ara-pihetsehampo. (Isaia 65:17; Apokalypsy 21:3, 4) Naho te hahafantatse ty raha mbe hatao i Fanjakàn’Andrianagnaharey rehe, le vakio ty lahatsoratse tihoe “Inona no Hataon’ny Fanjakan’Andriamanitra?”