VELOGNE mihoatse ty 500 taogne taloha ty niterahagne i Jesosy ty Daniela mpitoky. Faie ty fagnazavagne nimey i Jehovah aze ty  nagnampe aze hamantatse ty andro nagnorizagne ndra nanendreagne i Jesosy ho Mesia, ndra i Kirisity. Izao ty rinehake tamy i Daniela: “Soa ho fanta’o naho ho azo’o soa fa manomboke amy ty andro hiboaha ty lily hagnasoagne i Jerosalema naho hamboaragne aze, ampara ty hiavia i Mesia Mpitarike, le hisy 7 heregnandro naho 62 heregnandro.”—Daniela 9:25.

Mba hahafantaragne ty date niavia i Mesia, le toko’e ho fantatse hey tie ombia ty ‘niboaha ty lily hagnasoagne naho hamboaragne i Jerosalema.’ Nirehake ty Nehemia, mpanoratse Baiboly fa “tamy ty taogne faharoa-polo nanjakà i Aritakiserisesy” ty niboaha ty lily hamboaragne ty manda i Jerosalema. (Nehemia 2:1, 5-8) Magnamafe ty mpahay tantara fa nanomboke nanjaka ty  Aritakiserisesy tamy ty taogne 475 T.K. Izay ty ahafantaragne fa ty taogne 455 T.K. ty taogne faharoa-polo nanjakà’e. Ty taogne 455 T.K., ty date hanombohagne mba hahafantaragne ty fiavia ty Mesia nitokie i Daniela.

Nirehafe i Daniela ty halava i andro zay manomboke eo, le hatrake amy ty fiavia i “Mesia Mpitarike.” Nirehake reke tie haharetse “7 heregnandro naho 62 heregnandro”, ndra 69 heregnandro naho atambatse. Fire ty fahareta izay? Baiboly dikan-drehake maro ty mirehake fa tsy heregnandro misy fito andro o heregnandro iohoe fa heregnandron-taogne. Magnomey fito taogne ty heregnandro tsikiraidraike. Fa nahazatse ty Jiosy taolo ty miomba o heregnandron-taogne iohoe. Niambegne ty taogne sabata iareo isake fito taogne. (Eksodosy 23:10, 11) Mazava amy izay, fa misy 7 taogne iaby ty tsikiraidraike amy i 69 heregnandroy. Magnomey 483 taogne ty fiharoa’e (69x7).

Hikonte aze amy izay tikagne. Naho magnisake 483 taogne tikagne manomboke amy ty taogne 455 T.K., le avy amy ty taogne 29 A.K. Tamo o taogne iohoe ty nanoagne badisa i Jesosy, le tamy izay reke vaho Mesia! * (Lioka 3:1, 2, 21, 22) Tsy mahalatsa vao ty mahatrea fa avy eo iaby ty tsikiraidraike amy ty raha tokie ty Baiboly?