Taratasy Faharoe Nisorate i Petera 3:1-18
3 Ry rahalahy teagne, intoy ty taratasy faharoe nisorateko ho anareo. Manahake i taratasiko voaloha’ey, le faniahiagne ro anairako ty fahaia’areo mandineke,
2 amy izay hotsiaro’areo ty raha nirehafe o mpaminany masigneo naho ty lily i Tompo sady Mpagnavotsey, i nambara i apostoli’areo reỳ.
3 Fantaro’areo heike zao: Amy ty andro fara’e, le hisy mpitsikike ho avy hitsikike. Mandeha arake ty fagniria’e o mpitsikike rehoe,
4 sady mirehake tie: “Aia avao ze o fagnatreha’e nampitamaegne zaò? Fa nanomboke tamy ty andro nahavilasy ty razam-bei’ay ro tsy niova ze kila raha, fa mbe manahake ty toe’e avao nanomboke tamy i famorognagneỳ.”
5 Ty anto’e, atao iareo sare tsy fantatse tie, fa nisy amparake izay i lagnitsey, le nisy tane mafe oregne soa niakatse boake agnate rano ao sady tagnivo i ranoy eo, noho ty saontsin’Agnahare.
6 Tamy ty alala o raha rehoe ty nandravagne i tontolo tamy ze fotoagne zaỳ, naho fa nalente i ranoy.
7 Tamiriegne amy ty afo amy ty alala ze rehake zay ka i lagnitsey naho ty tane misy amy izao, sady ahaja avao amparake ty hiavia i andro fitsaragne naho famonovonoagne ty ndaty tsy matahotse an’Agnaharey.
8 Faie ao toy tsy hohaligno’areo ry rahalahy teagne: Ty andro raike amy i Jehovah, le hoe arivo taogne. Ty arivo taogne, le hoe andro raike.
9 Tsy mba malaogne ty Jehovah ty magnatanterake ty fampitama’e, arake ty fihevera ty ndaty ila’e aze, fa manam-paharetagne ama’areo reke, satria tsy misy ndaty tea’e hozamagne, fa tea’e mba hibebake iareo iaby.
10 Faie ho avy manahake o mpangalatseo i andro i Jehovah-y. Amy izay, le handriogne malaky i lagnitsey, sady hagneno mafe ty fandalova’e. Le o raha mahaforogne i lagnitsey naho o taneo fa mae beio ho levogne, sady hibaribary i taney naho ty asa ama’e eo.
11 Satria areke o raha rehoe iaby ho levogne hoe izay, le dineho tie toko’e ho ndaty manao akore nareo. Toko’e ho masigne nareo amy ty findesam-bata’areo iaby sady hanao raha mba hanoroagne tie mahafoe tegna ho an’Agnahare,
12 amy inareo mandigne sady manao an-tsaigne* i fagnatreha i andro i Jehovah-ỳ. Amo o andro iohoe ty handevognagne i lagnitsey amy ty afo, sady hitsonike noho ty hafanam-bey i raha mahaforogne i lagnitsey naho o taneo rey.
13 Faie arake i fampitama’ey, le hisy lagnitse vaovao naho tane vaovao, i hanjakà* ty hamaregnagney. Izay ty lignisantikagne.
14 Satria areke nareo ry rahalahy teagne mandigne o raha rehoe, le anò ze azo’areo atao, amy izay hovazoho’e amy ty fara’e tie, tsy misy tasy* naho tsy misy tsiny sady agnate ty filongoagne* nareo.
15 Ankoatse izay, le hevero’areo ho fagnavotagne ty fahareta i Tompontikagney, manahake ty nisorate i Paoly rahalahy teantika tama’areo, arake ty fahendreagne nimeigne aze.
16 Nirehake miomba o raha rehoe reke, manahake ty natao’e amy i taratasi’e rey iaby. Faie sarotse takaregne ty raha ila’e amy i raha nisorate’e rey. Adika o ndaty tsy maharendre-draha naho tsy mioregne soao vilagne i raha rey, manahake ty atao iareo amy ty andine’e ila’e amy ty Soratse Masigne ao. Izay ty mahavy iareo hovonovonoegne.
17 Satria areke fa hai’areo mialoha ze raha rezay ry rahalahy teagne, le mitaoa nareo tsy mone ho voatarike hiala miarake amo o ndaty mandika lalàna noho ty hadisoa iareò, sady hiala amy i fa nioregna’areoy.
18 Fa inareo, ampitombo’areo avao ty hasoa fagnahy miambake azo’areo naho ty fahalalagne i Jesosy Kristy Tompontikagne sady Mpagnavotsey. Ho aze abey ty voninahitse amy izao naho nainai’e. Amena.
