Taratasy Faharoe Nisorate i Petera 2:1-22
2 Faie nisy mpaminany sandoke ty tamy i vahoakey eo, le hoe izay ka fa hisy mpampianatse sandoke ty ama’areo eo. Iareo ty hanjilike moramora i sekta magnoho-dozay sady holiere iareo aza i tompo nivily iareoy. Izay ty mahavy iareo hoazo ty famonovonoagne malaky.
2 Ankoatse izay, le maro ty hagnorike i findesam-batagne tsy misy hegnatse anagna iareoy, sady noho iareo ro anivetiveagne i lala ty hamaregnagney.
3 Tsy mete afa-po ka iareo, le hagnararaotse anareo amy ty rehake mamitake. Faie tsy halaogne i fagnamelohagne iareo fa nambara taloha tagney, sady ho avy vata’e i famonovonoagne iareoy.
4 Tena tsy nisalasala ty Andrianagnahare nagnasaze i anjely nanota rey, fa nanorake iareo tamy i Tartara ao, le nandrohy seny* iareo tamy i iembeỳ ao mba handigne ty fitsaragne* iareo.
5 Tsy nisalasala ka ty Andrianagnahare nagnasaze i tontolo talohay, fa niaro i Noa mpitory ty hamaregnagne naho ty fito hafa, tamy ireke nampiavy ranobey tamy i tontolo nifeno ndaty tsy natahotse azey.
6 Nampanjare’e lavenoke ka ty tanà i Sodoma naho i Gomora mba ho fagnamelohagne iareo. Fampitaoagne hoahy ty ndaty tsy matahotse an’Agnahare amy ty raha hiseho amy ty hoavy ty raha nanjò iareo.
7 Navota’e ka ty Lota ndaty maregne, satria tena niore reke, noho ty findesam-batagne mahamegnatse nanagna o ndaty mpandika lalànao.
8 Nijale mafe o ndaty maregne iohoe isan’andro, noho ty fandikan-dalàna nitrea’e naho nirei’e tamy ireke niharo toboke tamy iareoy.
9 Hay i Jehovah areke ty magnafake o ndaty matahotse azeo amy ty fitsapagne mahazo aze, faie vita’e ka ty mitamiry o ndaty tsy maregneo mba hovonovonoegne* amy i andro fitsaragney,
10 lohotsie fa ze te handoto ty nofo ty hafa naho tsy magnaja fahefagne.*
Mahasakisaky naho mitangingigne iareo, le tsy matahotse ty manivetive o managne voninahitseo.
11 Fa ndra tie matanjake naho mahery ambone o ndaty rehoe aza o anjelio, le tsy nanao rehake manivetive iareo mba hirehafagne ty raha raty atao iareo, noho ty fagnajà iareo i Jehovah.*
12 Fa o lahilahy rehoe, le manahake o biby tsy misaigne le avy le manao avao ty raha tea’e hatao sady naterake hotsepahegne naho hovonoegneo, le manivetive ty raha tsy fanta’e. Hovonovonoegne iareo, satria mbamy i famonovonoagney mbeo ty lala iareo.
13 Fijaleagne ty hovale ty asa raty iareo.
Mieretseretse iareo tie mahafinaritse ty magnaram-po amy ty rendrarendra, ndra tie amy ty andro atoandro aza. Hoe loto naho tasy* iareo sady tena mahafinaritse iareo ty manao fampianaragne mamitake naho fa miarake mihinagne ama’areo amo o fanasagneo.
14 Feno fagnitsakitsaham-baly ty maso iareo sady tsy vita iareo ze o tsy hanota zao. Taone iareo ka ze ndaty tsy mioregne soa. Managne fo voaofagne amy ty fanagnagne fagniriagne tsy mete afa-po naho ajaja voaozogne iareo.
15 Nenga iareo i lalagne mahitsỳ, fa nitsile iareo. Nagnorike ty lala i Balama, i ana i Beoray iareo, i nitea karama amy ty fanoagne raha ratỳ.
16 Faie nanaregne reke noho ireke tsy nanao raha vantagne. Nisy biby mpinday entagne zay nanjare nirehake manahake o ndatio mba hikalagnagne o mpaminany iohoe amy ze hagegea’e zay.
17 Loharano tsy misy rano iareo sady zono ente o tiobeio. Iem-bey ty fa natokagne hoahy iareo.
18 Rehake fisengesengeagne tsy misy dika’e ro rehafe iareo. Fagniria ty nofotse naho o findesam-batagne tsy misy hegnatseo ro itaona iareo o ndaty vaho niala tamy ty findesam-batagne tsy meteo.
19 Mampitama fahafahagne o ndaty rehoe iareo, ie amy izao ty vata iareo aza ondevo o fahalotoagneo. Ty anto’e, manjare ondevo ze ndaty* maharese aze ze rese.
20 Naho toe fa niala tamy ty fahalotoa ty tontolo toy vata’e iareo noho iareo managne fahalalagne maregne miomba i Jesosy Kristy Tompo sady Mpagnavotsey, faie mbe miheregne amo o raha rehoe indraike sady rese, le tena ho raty ty hiafarà iareo naho oharegne tamy i voaloha’ey.
21 Ndra aleo iareo tsy nahafantatse soa ty lala i hamaregnagney, ta tie nahafantatse i lily masigne niazo iareoy, faie miala amy izay.
22 Tanterake amy iareo areke ty raha rehafe ty ohabolagne maregne manao tihoe toy tie: “O amboao ro miheregne amy ty loa’e, le o lambo vave’e fa niandrò ro miheregne mileveleve amo o fotakeo indraike.”
