Taratasy Faharoe Nisorate i Petera 1:1-21
1 Boake amy i Simona Petera mpanompo naho apostoly i Jesosy Kristy ty taratasy toy. Hoahy ze fa nahazo i finoagne sarobilỳ manahake anay, tamy ty alala ty hamaregna i Andrianagnaharentikagney naho i Jesosy Kristy Mpagnavotse:
2 Hampitomboegne abey ty hasoa fagnahy miambake naho ty fiadagnagne haseho ama’areo, noho inareo managne fahalalagne maregne miomba an’Agnahare naho i Jesosy Tompontikagne.
3 Ty anto’e, ty herin’Agnahare ro nagnomey* antika ze raha iaby hagnampe antika hahafoe tegna ho an’Agnahare amy ty fiaignagne, noho itika managne fahalalagne maregne miomba i nikanjy antikagney, tamy ty alala ty voninahi’e naho ty hasoa toetse’e.
4 Tamy ty alala o raha rehoe ro nagnomea’e* antika i fanantenagne sarobily naho tena lahibeỳ. Amy izay amy ty alala o raha rehoe ka ro hahavy anareo hanahake an’Agnahare. Nanao izay reke, satria fa nialà’areo ze raha raty fatao ty ndaty amy ty tontolo toy eto.* Boake amy ty fagnirian-draty* iareo i raha rey.
5 Anò areke ze raha azo’areo atao naho izay, le ty finoa’areo ampeo hasoa toetse, le ty hasoa toetse’areo ampeo fahalalagne,
6 le ty fahalala’areo ampeo fifehezan-tegna, le ty fifehezan-tegna’areo ampeo fiaretagne, le ty fiareta’areo ampeo fahafoezan-tegna ho an’Agnahare,
7 le ty fahafoezan-tegna’areo ho an’Agnahare ampeo hatea rahalahy, le ty hatea’areo o rahalahio ampeo hatea ze kila ndaty.
8 Ty anto’e, naho managne o toetse rehoe nareo sady managne ireo maro, le hampiasa ty fahalalagne maregne anagna’areo miomba i Jesosy Kristy Tompontikagne, fa tsy henga ireo hitobotoboke avao ndra tsy hahavokatse.
9 Fa naho misy ndaty tsy managne o toetse rehoe, le goa reke sady akipe’e mba tsy hahatrea i hazavagney ty maso’e.* Fa nihaligno’e ka tie fa niliovegne ho afake amy ty fahotagne natao’e taloha reke.
10 Naho izay areke ry rahalahy, le anò ze azo’areo atao mba hoazo antoke i fitokavagne anareoy naho i fijobognagne anareoy, satria naho manao o raha rehoe avao nareo, le tsy ombia hiala amy ty finoagne.
11 Ty fanoa’areo o raha rehoe ro hagnengagne anareo hizilike amam-boninahitse amy i Fanjakagne nainai’ey ao, i ahy i Jesosy Kristy Tompontikagne sady Mpagnavotsey.
12 Izay ty mahavy ahy vognogne avao ty haniahy anareo o raha rehoe, ndra tie fa fanta’areo aza, sady fa mioregne soa amy i hamaregnagne nianara’areoy nareo.
13 Faie mieretseretse raho tie, naho mbe amy ty tragnolay* toy ato, le mete ty maniahy anareo mba hanaitairagne anareo,
14 satria haiko tie tsy ho ela, le hafahagne amako ty tragnolaiko toy, arake ty fa nambara i Jesosy Kristy Tompontikagne tamako.
15 Hanao ze azoko atao avao raho, amy izay naho fa tsy eo raho, le hovita’areo ty haniahy ty vata’areo o raha rehoe.
16 Tsy ty tantara tsy maregne niforognegne taman-kafetseagne ro norihe’ay naho fa izahay nampahafantatse anareo ty hery naho ty fagnatreha i Jesosy Kristy Tompontika, fa tena nahatrea maso ty voninahi’e zahay.
17 Ty anto’e, nahazo voninahitse naho haja boake aman’Andrianagnahare Rae reke. Niseho zay naho fa nisaontsy ty rehake retoa* tama’e i fara izay ty bey voninahitsey: “Io i Ana-dahikoy tena teakoy, i ankasitrahakoy!”
18 Ie, naharey o rehake rehoe boake an-dagnitse agne zahay, tamy izahay niarake tama’e tamy i vohitse masigney teoy.
19 Managne i rehake faminaniagne vao mainke natao azo antokey areke tika, sady soa naho mandineke io nareo, manahake ty atao amo o jiro mamilepiletse amy ty toeragne maiegne am-po’areo aoy, amparake ty anjiriha i androy naho ty iakara i fanjirỳ.
20 Ty anto’e, hai’areo soa tie, ze faminaniagne agnate ty Soratse Masigne ao, le tsy boake amy ty heve o ndatio manokagne.
21 Mbe tsy nisy faminaniagne boake amy ty sitrapo o ndatio, fa ty hafatse boake aman’Agnahare ro rehafe o ndatio, arake ze nitariha* i fagnahy masigney iareo.
Fagnamarehagne ambane peje
^ Ndra: “nagnomey maimaim-poagne.”
^ Ndra: “nagnomea’e maimaim-poagne.”
^ Abt: “ty halò ty tontolo toy.
^ Ndra: “fagniriagne mafe te hila ndaty anagna.”
^ Ndra ka va’e: “goa, le tsy mahita lavitse.”
^ I vatagne ara-nofotse ama’e eỳ ty teagne horehafegne.
^ Abt: “hoe feo.”
^ Abt: “nindesa i.”
