Taratasy Voaloha’e Nisorate i Petera 4:1-19
4 Satria ty Kristy nijale tamy ty nofotse tao, le anò’areo ka ze hahavy anareo hanagne toe-tsaigne hoe izay.* Ty anto’e, ty ndaty fa nijale tamy ty nofotse tao, le fa niala tamo o fahotagneo.
2 Amy izay ty andro sisa iaigna’e amy i nofotsey ao tsy hagnatanteraha’e ty fagniriagne amy ty maha olombelogne aze sasa, fa hanoa’e ty zoton’arofon’Agnahare.
3 Fa ampe ze fotoagne nagnatanteraha’areo ty fagniria o ndaty amy ty tontolo toy etò zay. Tamy izay nareo, le nanagne findesam-batagne mahamegnatse, filagne tsy voafehe, ninon-toake losotse, nanao fete baranahigne, nifaninagne ninon-toake naho nanao fanompoan-tsampy tsy ara-dalàna.
4 Sahiran-tsaigne iareo tie amy izao, satria nareo tsy miarake lomay amy iareo sasa mbamy i fomba fiaignagne feno filibagney mbeo, hafarà iareo mirehake raha raty miomba anareo.
5 Faie mbe hotsarae i vognogne hitsara ty velogne naho ty matey o ndaty rehoe.
6 Naho ty maregne aza, le izay ty mahavy i talily soay nitoriegne tamo o mateo, amy izay iareo hanagne fomba fiaignagne mifagnarake amy i fagnahỳ arake ty fomba fiheven’Agnahare, ndra tie hotsaraegne amy ty nofotse ao arake ty fomba fiheve o ndatio.
7 Fa marine ty fara ze kila raha iaby. Naho izay areke, le mikezaha hisaigne soa naho hitao,* sady ko haligno ty mivavake.
8 Ambone ze kila raha, le mifankateava amy ty fo, satria ty hatea mandrongogne fahotagne maro.
9 Mifampiantragnoa, le ko asiagne figneogneogne.
10 Ampiasao’areo mba hifanompoagne ze fagnomezagne nimeigne anareo, arakarake ze niazo’areo. Amy ty maha mpanompo fanjaka anareo, le inareo ro magnampe ty hafa mba handrambe soa boake amy i hasoa fagnahy miambake nasehon’Agnahare tamy ty fomba maro sambe karaza’ey.
11 Naho misy mirehake, le toko’e hirehake mitovy amy tihoe magnambara hafatse boake aman’Agnahare reke. Naho misy manompo, le toko’e hiantehetse amy ty hery mean’Agnahare reke naho fa manao izay, amy izay hahazo voninahitse amy ty alala i Jesosy Kristy ty Andrianagnahare. Ho aze nainai’e nainai’e abey ty voninahitse naho ty hery! Amena.
12 Ry rahalahy teagne, ko gaga nareo amo o fitsapagne mafe atrehe’areò, ndra tie hoe hafahafa zay aza ty raha manjò anareo.
13 Mifanohetse amy izay aza, fa mifalea avao noho inareo miatreke ty fijaleagne natrehe i Kristy, amy izay nareo ho fale sady vao mainke ho feno hafaleam-bey agnate i fotoagne ampibaribariagne ty voninahi’ey.
14 Sambatse nareo naho haratiratiegne* noho ty agnara i Kristy, satria ama’areo eo i fagnahy ty voninahitsey ndra i fagnahin’Agnaharey.
15 Ndra tie eo zay, le ao tsy hisy ama’areo hijale, satria mpamono ndaty, ndra mpangalatse, ndra mpanao raha raty, ndra mpizilike amy ty fiaigna ty ndaty hafa.
16 Fa naho misy mijale satria Kristiana, le tsy toko’e ho megnatse reke, fa toko’e hagnomey voninahitse an’Agnahare avao, amy ie minday o tahinagne iohoey.
17 Ty anto’e, izao ty fotoagne fa tinondro hanombohagne ty fitsaragne amy ze agn’anjomban’Agnahare ao. Naho itika ty hanombohagne aze, le akore ty hanjò ze tsy mankatò ty talily soan’Agnahare?
18 “Naho ohatse sarotse ty hahavoavonje ty ndaty maregne, le ino ty hanjò o ndaty tsy matahotse an’Agnahare naho mpanotao?”
19 Naho izay areke, ao ze mijale noho ty fanoagne ty zoton’arofon’Agnahare, le hagnankigne ty fiaigna’e avao amy i Mpamorogne tsy mivalikey sady hanao ty soa avao.
