Taratasy Voaloha’e Nisorate i Petera 2:1-25
2 Naho izay areke, le afaho tsy ho amy ty vata’areo ey ze hene haratiagne, fitake, hasoa miatreke, fialognagne naho ze hene fagnaratiagne.
2 Manahake o ajaja menao, le anò ze hagniriagne mafe i ronono tsy mitampokey ndra i saontsỳ, amy izay nareo hitombo naho ho voavonje amy ty alala io,
3 naho toe fa nandrama’areo* tie soa fagnahy ty Tompo.
4 Niliere o ndatio i vato velogney, faie jinobogne sady sarobily aman’Agnaharey. Naho fa magnatogne aze nareo,
5 inareo mitovy amo o vato velogneò, le aoregne ho tragno ara-pagnahy mba ho mpisorogne masigne. Amy izay nareo hanolotse sorogne ara-pagnahy ankasitrahan’Agnahare, amy ty alala i Jesosy Kristy.
6 Ty anto’e, rehafe ty Soratse Masigne tie: “Mametrake vato jinobogne a Ziona ao raho, le i vato fototse sarobily an-joroy. Ze maneho finoagne io, le tsy ombia ho diso tama.”*
7 Ama’areo areke ty Jesosy ro sarobily, satria nareo mpino. Fa amo o tsy mpinò, le “ty vato niheje o mpamboatse tragnò ro hanjare vato bey an-joro amy i tragnoy”,
8 sady nanjare “vato mamingagne naho lamilamy manonta.” Voafingagne iareo, satria tsy mankatò i saontsỳ. Toe izay vata’e ty raha fa nivoatendre hanjò iareo.
9 Fa inareo, “le vahoake jinobogne, mpanjaka sady mpisorogne, firenena masigne, vahoake nataon’Agnahare ho fanagna’e manokagne, mba hagnambara mbaombao ty hasoa”* i nikanjy anareo hiala tamy ty iegne mba ho amy i hazava’e mahagagay.
10 Tsy ni-vahoan’Agnahare nareo tie taloha, faie vahoa’e tie amy izao. Tsy nanehoagne famindram-po nareo tie taloha, faie fa nahazo famindram-po nareo tie amy izao.
11 Ry rahalahy teagne, mandrisike anareo mpivahiny sady tsy hitoboke maharetse an-tane etoio raho, mba hifalia’areo o fagniria ty nofotseo, i mialy ama’areoy.
12 Mikezaha ho soa findesam-batagne avao nareo amy ty tontolo toy eto, amy izay iareo naho mirehake anareo tie mpanao raha raty, le ty maso iareo ro hahatrea ty asa fanjaka atao’areo. Ty voka’e, hagnomey voninahitse an’Agnahare iareo amy i andro fagnaraha’e masoy.
13 Noho ty amy i Tompo, le ekeo’areo ze raha finoro* o ndatio, ndra mpanjaka zay, satria ambone reke,
14 ndra o governorao, satria nirahegne mba hagnasaze o mpanao ratio iareo, fa hidera ze manao ty soa.
15 Ty anto’e, ty zoton’arofon’Agnahare, le ty hanoa’areo ty soa, amy izay nareo hampitsigne* o ndaty tsy mandineke mivolambolagne avaò.
16 Mikezaha ho ndaty afake, le ampiasao ty fahafaha’areo, tsy tihoe mba hagnetahagne* ty raha raty atao’areo, fa mba hanompoagne an’Agnahare.
17 Hajao ty karaza o ndaty iaby, teavo ty rahalahy iaby,* matahora an’Andrianagnahare, le hajao o mpanjakao.
18 Ao ze mpanompo mba hagneke naho hatahotse ty tompo iareo, le tsy o tompo soa sady mahay manahatsahatseo avao ty hanoa iareo izay, fa ndra o tompo sarotsarote’eo ka aza.
19 Ty anto’e, ankasitrahan’Agnahare ty ndaty raike naho miaretse raha sarotse* sady ampijalegne tsy ara-drare’e, noho ireke te hanagne feo ty fieretseretagne malio agnatreha’e eo.
20 Fa inogne moa ty soa hoazo’areo naho jeraegne nareo satria nanota, le miaretse izay? Fa naho miaretse fijaleagne nareo satria manao ty soa, le ankasitrahan’Agnahare nareo.
21 Toe izay vata’e o nitokavagne anareò, satria ndra i Kristy aza nijale ho anareo, le nagnomey modely anareo mba hagnoriha’areo soa ty lia’e.
22 Tsy nanota reke, sady tsy nahatreavagne fitake ty tam-bava’e teo.
23 Naho fa nambanembanegne* reke, le tsy nagnambanembane. Naho fa nijale reke, le tsy nagnorohoro, fa nagnankigne ty fiai’e amy i mitsara ara-drare’ey.
24 Nente’e niarake tamy i vata’ey tamy i boda-katae* ey i fahotantikagney. Amy izay tika homate naho amo o otao,* fa hovelogne mba hanao ty maregne, sady i fere’ey ro nahavy anareo hositragne.
25 Ty anto’e, nanahake o agnondry nitsileo nareo, faie fa niheregne amy i mpiarake sady mpiandraikitse anareoy* amy izao.
Fagnamarehagne ambane peje
^ Ndra: “nitsapa’areo.”
^ Abt: “tsy ho megnatse.”
^ Ty toetse soa’e naho ty raha atao’e fagneva ty hoderaegney ty teagne horehafegne.
^ Ndra: “naore.”
^ Abt: “hagnisy rakom-bava.”
^ Ndra: “hatao fialan-tsiny amy.”
^ Abt: “o mpiharo finoagneo.”
^ Ndra: “alahelo; fanaintaignagne.”
^ Ndra: “nisy nanivetive.”
^ Ndra: “hatae.”
^ Ndra: “ho afake amo o otao.”
^ Ndra: “ty fiaigna’areoy.”
