Taratasy Voaloha’e Nisorate i Petera 3:1-22
3 Hoe izay ka nareo ampela manambaly, ekeo ty vali’areo, amy izay naho misy amy iareo tsy mankatò i saontsỳ, le ho voataogne hino, faie tsy amy ty alala ty raha rehafe’areo fa amy ty alala ty findesam-bata’areo,
2 satria i vali’areo rey mahita ty findesam-batagne malio anagna’areo naho ty fagnaja’areo laleke aze.
3 Ao ty fihamina’areo tsy ho raha ivela’e etoy, agnisa izay o randragneo naho o ravake volamenao ndra o akanjo fanjakao,
4 fa toko’e ho i toetse maha ie mietake am-po aoy, i fihaminagne tsy mete lo oy, le ty toetse tsy taitaitse naho maleme fagnahy, i tena sarobily agnatrehan’Agnahare eoy.
5 Ty anto’e, tamy ty fomba hoe izay ty nihamina o ampela masigne taloha nitama an’Agnahareo. Nagneke ty vali’e iareo.
6 Hoe izay zao ty natao i Saraha, satria reke nankatò i Abrahama, le nitoka aze tihoe tompo. Afake ty hanjare ana i Saraha ka nareo, naho manohy manao ty soa avao sady tsy magneke horese ty tahotse.
7 Inareo lahilahy manambalio ka, miharoa toboke amy ty vali’areo avao, sady atorò’areo tie mahatakatse ty raha tsapa iareo nareo.* Meo fagnajagne o ampelao, manahake ty atao amo o fanake marefò, amy izay tsy ho voakalagne ty vavake atao’areo, satria iareo mpiara-mandova ama’areo ka i fagnomezagne tsy misy hoe’ey ndra i fiaignagney.
8 Fara’e, miharoa saigne nareo iaby, miaraha ore, mifankateava manahake ty mpirahalahy, miferegnesa ty hafa sady miambanea.
9 Ko mamale raty ty raty, ndra magnambanembane naho fa misy magnambanembane. Fa isalalao raha soa ze manao izay anareo, satria ty hanagna’areo ze fomba fiaignagne zay o nitokavagne anareò, amy izay nareo handova fitahiagne.
10 Ty anto’e, “ze tea fiaignagne naho te ho sambatse, le tsy maintsy miambegne ty lela’e mba tsy hirehake raha raty, naho ty sogni’e mba tsy hirehake fitake.
11 Mila miala amy ty raty reke, le manao ty soa sady hipay filongoagne vaho hiaro izay.
12 Ty anto’e, ty fihaino i Jehovah le mifantoke manokagne amy ty ndaty maregne, le ty ravembia’e mijanjigne ty vavake atao iareo, fa ty lahara i Jehovah manohetse ze manao raha raty.”
13 Ia moa ty hagnisy raty anareo naho mafana fo amy ty fanoagne ty soa nareo?
14 Faie sambatse nareo, ndra tie mijale noho i hamaregnagney aza. Ndra tie eo zay, le ko matahotse ze atahora iareo,* ndra mikorontan-tsaigne.
15 Fa hamasigno am-po’areo ao ty Kristy amy ty maha Tompo aze, le mivognona lognandro hirehake ty fiarovan-tegna’areo agnatreha ze ndaty magnontane ty anto i fanantenagne anagna’areoy. Faie anò’areo am-pahalemem-pagnahy naho am-pagnajagne laleke zay.
16 Mikezaha hanagne feo ty fieretseretagne malio, amy izay ndra inogn’ino ty raha rehafe o ndaty mpanohetseo mba hanoheragne anareo, le ho megnatse iareo noho ty findesam-batagne soa anagna’areo, amy ty maha mpanonjohy ty lia i Kristy anareo.
17 Ty anto’e, ndra aleo mijale noho inareo manao ty soa, naho zoton’arofon’Agnahare ty hagnenga izay hiseho, ta tie hijale noho inareo manao ty raty.
18 Ndra i Kristy ndaty maregne aza nimate indraike avao noho ty ota hosolo ty ndaty tsy maregne, mba hitarihagne anareo aman’Agnahare mbeo. Nofotse reke tamy ie nivonoegney, faie fagnahy reke naho fa nivelomegne.
19 Tamy izay reke ro nandeha nitory tamo o fagnahy am-pirizò agneo,
20 i tsy nankatò tamy ty andro i Noa rey, tamy i Andrianagnahare nandigne am-paharetagne* tamy i sambo beỳ mbe namboaregney. Tamy izay, le ndaty tsy ampe avao, ie, ndaty valo avao ro nente i samboy tambone i ranoy ey, le niavotse soa.
21 Ty badisa ro mifagnitsy amy io, i magnavotse anareo ka tie amy izaoy (faie tsy fagnafahagne ty fahalotoagne amy ty nofotse, fa fangatahagne feo ty fieretseretagne malio aman’Agnahare) amy ty alala ty famelomagne amy ty mate i Jesosy Kristy.
22 Ankavanan’Agnahare eo reke, satria nandeha an-dagnitse agne, sady nampagnekegne aze o anjelio naho ty fahefagne vaho ty hery.
