Joel 3:1-21
3 “¡Gu̱ya̱a̱! Mbiʼi ma rúʼko̱ ga̱jma̱a̱ tiempo rúʼko̱,índo̱ gáʼkháaʼ kagui̱i̱n xa̱bu̱ Judá ga̱jma̱a̱ Jerusalén,
2 ma̱ngaa magímbíin xúgíinʼ xa̱bu̱ xuajinma̱ni̱ rí maguajtáa náa mata* ndrígóo Jehosafat.*
Ikhí mandi̱ʼi̱i̱n cuentaga̱jma̱a̱ numuu rí nini̱i̱ xuajñunʼ Israel, rí ikhúún kaʼyoʼ.
Numuu rí ikhiin nini̱ rí majuidriʼiin náa majñu̱únʼ xa̱bu̱ xuajinga̱jma̱a̱ nixuitamijnáá ku̱bo̱ʼ.
3 Numuu dí niri̱ya̱ʼ suerte* mu muxuiʼta̱a̱ xuajñunʼ,nugujua̱a̱ mbáa dxámá chíʼgíiʼ* mu muni̱ numáá mbáa a̱ʼgu̱ bi̱ nagujuamínáʼma̱ngaa nugujua̱a̱ mbáa ndxáʼgú chíʼgíiʼ mu mutsi ga̱jma̱a̱ vino rí muwa̱a̱n.
4 Tiro ga̱jma̱a̱ Sidón ma̱ngaa xúgíʼ ku̱ba̱ʼ ndrígóo Filistea.
Xú káʼnii eʼngo̱o̱ a̱jkia̱la mu̱niu̱ʼ xígi̱ kaʼnii rá.
Lá nu̱niu̱ʼ rígi̱ ga̱jma̱a̱ numuu mbá dí raʼkhí ninia̱la ráʼ.
Á mu ikháanʼ nuni̱la ga̱jma̱a̱ numuu rígi̱,ikhúún mbá nacha̱ ma̱ni̱ dí xúgíʼ rí nu̱niu̱ʼ matanga̱a̱ náa ikháanʼla.
5 Numuu rí ikháanʼla ni̱jkua̱ kudala plata ga̱jma̱a̱ oro ndrígóʼma̱ngaa nijkua̱ kudala rí gíʼdoo numuu dí ikhúún gúʼdoo náa guʼwá rí nduyamajkhún dioses ndrígala.
6 Ikháanʼla nugujui̱i̱n xa̱bu̱ Judá ga̱jma̱a̱ xa̱bu̱ Jerusalén náa xa̱bu̱ griegosmu xúʼko̱ mu̱ni̱ tsíngu̱u̱nʼ náa ku̱bu̱únʼ.
7 Ikhúún maʼkháaʼ kagui̱i̱n náa ku̱ba̱ʼ rí ikháanʼla nigujui̱i̱n,ga̱jma̱a̱ ma̱ni̱ rí matanga̱a̱ náa ikháanʼla xó má rí ikháanʼ niniu̱u̱n.
8 Magujui̱i̱n náa xuajin Judá jiámiala ga̱jma̱a̱ waʼxialaga̱jma̱a̱ ikhiin mugujui̱i̱n náa xa̱bekha bi̱ kúwá náa Saba,* náa mbá xuajin rí naguanúu mitsínguánʼnumuu rí Jeobá ma niʼthí.
9 Gu̱tha̱ rígi̱ náa majñuuʼ i̱ʼwáʼ xuajin:
‹¡Gu̱ni̱ ratamijnála* mu muxmíjná! ¡Guxuʼmíinʼ magún xa̱bu̱ bi̱ xkujiinʼ!
¡Ga̱jma̱a̱ xúgíinʼ soldados guxuʼmíinʼ magún! ¡Guniʼñúúnʼ magún mu muxmíjná!
10 Arado* ndrígu̱ún gurtajxi̱i̱la espada ga̱jma̱a̱ ajua̱nʼ dí narujtu ra̱jxa̱ gurtajxi̱i̱la kudú.*
Bi̱ na̱nguá xkujiiʼ gaʼthí: “Xkujñúnʼ rá”.
11 ¡Aguwaʼ gúmbáyumíjnála xúgiáanʼ xuajin rí tri̱ga̱ mijngii! ¡Gagimbáanʼla!›”.
Jeobá, atani̱ rí maguájtaa xa̱bia̱a̱ʼ bi̱ xkujiinʼ náa mbaaʼ rúʼko̱.
12 “Xa̱bu̱ bi̱ kúwá náa i̱ʼwáʼ xuajin gatsimún náa mata ndrígóo Jehosafat.
Ikhí maʼgúnʼ mu mandi̱ʼi̱i̱n cuenta xúgíinʼ xa̱bu̱ bi̱ kúwá náa xuajin dí rígá mijngii.
13 Gu̱xpatráʼálá chídí xngaa numuu rí nikhi̱i̱ má rí nijuiʼdu.
Kajtíí uva náa nuduunʼ vino, ikha jngóo guguajtaa ga̱jma̱a̱ gujngapríga.
Náa ga̱jnu̱ʼ vino asndu nagadírígúu, xúʼko̱ má mba̱a̱ dí raʼkhí nini̱ ma̱ngaa.
14 Ra̱ʼkhá tháan mbaʼin xa̱bu̱ kúwá náa mata rí Niwaxtaʼwíí dí marigá,numuu rí mbiʼi ndrígóo Jeobá na̱ʼkha̱ mijngii má, náa mata rí Niwaxtaʼwíí dí marigá.
15 Makhañúu a̱jkha̱ʼ ga̱jma̱a̱ gu̱nʼ,a̱ʼgua̱a̱n ní xámbiʼiin.
16 Jeobá mandxaʼwá asndu náa Sion,makujxi̱ aʼwóo asndu náa Jerusalén.
Mekhu ga̱jma̱a̱ ku̱ba̱ʼ maʼba̱a̱n,mú Jeobá mani̱ndxu̱u̱ náa mumbáyúmíjná xa̱bu̱ xuajñuu,mbá xtájtsí náa mambáyuminaʼ Israel bi̱ nindxu̱u̱ xuajñuu.
17 Ikháanʼ muʼgua̱nú mbuya̱a̱ rí ikhúún nindxu̱ʼ Jeobá Dios ndrígala ikhúún xtáá náa Sion, náa kúbá ndrígóʼ rí kaʼwu.
Jerusalén mani̱ndxu̱u̱ mbá mbaaʼ rí kaʼwu,xa̱bu̱ bi̱ naguwaáʼ nimbá míʼtsú ni xanújngún ikhí.
18 Mbiʼi rúʼko̱ náa kúbá matsuwarígúu vino nuxi̱ʼ,ga̱jma̱a̱ náa bíjní magadítígúu yáʼdúma̱ngaa náa xúgíʼ mata ndrígóo Judá marigá iyaʼ.
Náa goʼwóo Jeobá maku̱mu̱u̱ mbá iduu iyaʼrí maxíjyooʼ mata náa rígá ixi̱ Acacia.
19 Mú Egipto mani̱ndxu̱u̱ mbá mbaaʼ dí niguanáaga̱jma̱a̱ Edom mani̱ndxu̱u̱ mbá ku̱ba̱ʼ mijxooʼ*numuu rí nini̱ ngínáa xuajin Judá,ga̱jma̱a̱ náa mbaaʼ rúʼko̱ niradíin xa̱bu̱ bi̱ nda̱a̱ aʼkhúún.
20 Mú náa Judá, makuwá má xúʼko̱ xa̱bu̱,ma̱ngaa náa Jerusalén, makuwá má xúʼko̱ bi̱ maguwáʼ rakúwá nda̱wa̱á.
21 Ma̱ni̱ jngudi̱i̱ aʼkhúún* maski má nákhá ginii guáʼdáá aʼkhúún.
Ga̱jma̱a̱ Jeobá maxtáa náa Sion”.
Mbaʼa nota
^ O “bóo”.
^ Rí nandoo gáʼthúu̱n ‹Jeobá bi̱ naʼni mbánúu xkujndu›.
^ O “lajuíin”.
^ O “Seba”.
^ Náa ajngáa hebreo naʼthí, “Guni̱ kaʼwumijnáaʼla”.
^ Náa ajngáa hebreo naʼthí, “Reja ndrígóo arado”.
^ O “lanza”.
^ O “desierto”.
^ Náa ajngáa hebreo naʼthí, “Mba̱yo̱o̱ rí nda̱a̱ aʼkhúun eʼdiún”.
