Hebreos 13:1-25

  • Iwáá consejo ga̱jma̱a̱ narajxi̱ín (1-25)

    • “Xámbumala rí mundriguíin ga̱jma̱a̱ májánʼ eʼwíinʼ” (2)

    • Guyamajkuíí rí nidamijná xa̱bu̱ (4)

    • Gunimbala ku̱ñu̱u̱n bi̱ nuxnala ikha (7, 17)

    • Guxnájxi̱ mbá tsigijñaʼ rí maʼni mba̱a̱ Dios (15, 16)

13  Gaʼndala kuyamíjna̱ má xúʼko̱ xóo kaníkháanʼla.+ 2  Xámbumala rí mundriguíin ga̱jma̱a̱ májánʼ eʼwíinʼ,+ numuu rí núma̱a̱ má dí xúʼko̱ nini̱ tikhuun asndu túyáá rí ángeles nindriguíin.+ 3  Garmáʼáan a̱jkia̱la kuñu̱u̱n bi̱ tri̱ʼi̱i̱n guʼwá e̱jua̱nʼ,*+ gu̱ni̱ rí asndu xóo ikháanʼ traʼáan gajmiála+ ga̱jma̱a̱ xúʼko̱ má bi̱ naguma ngíníin, gu̱ni̱ rí asndu xóo kuwáanʼ rumíniiʼ gajmiála.* 4  Xúgíinʼ guyamajkuíí rí nidamijná xa̱bu̱, nimbáa ga̱jma̱a̱ ni má ikhiin xúni̱ gachíí xia̱wún,+ numuu rí Dios mandi̱ʼi̱i̱n cuenta bi̱ nubúúnʼ xkawiʼ kayuuʼ gajmiún eʼwíinʼ,* xúʼko̱ má bi̱ nuni̱ aʼkhá gajmiún eʼwíinʼ.+ 5  Gusngajmá rí tséyala ku̱ya̱a̱ mbújkha̱a̱+ ga̱jma̱a̱ gakuwáanʼ gagi ga̱jma̱a̱ rí kuaʼdáá.+ Numuu rí ikhaa niʼthí: “Nditháan xániʼñáánʼ ga̱jma̱a̱ nimbá miʼtsu xániʼñátíga̱a̱n”.+ 6  Ikha jngóo ma̱ndoo muʼthá ga̱jma̱a̱ xúgíʼ a̱jkiu̱lú: “Jeobá* nindxu̱u̱ bi̱ nambáyuʼ. Xámíñúʼ. Ndiéjunʼ lá gándoo maʼniuʼ mbáa xa̱bu̱ú rá.”+ 7  Garmáʼáan a̱jkia̱la eni̱ bi̱ nuxnala ikha,+ bi̱ ni̱tala ga̱jma̱a̱ numuu ajngóo Dios, gu̱ya̱a̱ májánʼ rí xú káʼnii eni̱ ga̱jma̱a̱ guyaridáá fe ndrígu̱ún.+ 8  Jesucristo nindxu̱u̱ ikháá má xóo ri̱xi̱, xúgi̱ ga̱jma̱a̱ asndu kámuu. 9  Xúniʼñámíjná rí magajnútiyala gáʼni kiʼsngáa rí nindxu̱u̱ i̱mba̱ nuthu ga̱jma̱a̱ rí tséjmaʼnuuʼ, numuu rí itháan májánʼ mu̱ʼni̱ gakhi̱i̱ a̱jkiu̱lú ga̱jma̱a̱ rí májánʼ wéñuuʼ a̱jkiu̱u̱n Dios,* raʼkháa ga̱jma̱a̱ numuu ganitsu* rí tsémbáñún bi̱ i̱ndó nundxaʼwamíjná ga̱jma̱a̱ numuu ganitsu.+ 10  Ikháánʼlú kuaʼdáá mbá náa nakarámáʼ tsigijñaʼ, rí bi̱ nuni̱ ñajunʼ rí mitsúʼkháan náa guʼwá xtíin xándoo* mu̱phu̱ dí rígá ikhí,+ 11  numuu rí xuñúúnʼ xujkhúʼ ga̱jma̱a̱ eʼdiún, ndxajkun bi̱ phú kayá edxu̱u̱ na̱jkha̱ kayóo náa rí mikaʼwu xóo tsigijñaʼ ga̱jma̱a̱ numuu aʼkhá, rí nakha náa rexo̱o̱ rí nagún ratrigi̱i̱n.*+ 12  Jesús ma̱ngaa nimínuuʼ náa rexo̱o̱ riejuun xuajin,+ mu xúʼko̱ maʼni kaʼwi̱ín xa̱bu̱ xuajin ga̱jma̱a̱ eʼdiuu.+ 13  Ikha jngóo guʼgualú náa ikhaa, náa rexo̱o̱ dí nagún ratrigi̱i̱n ga̱jma̱a̱ gaʼngulú náa ma̱jti̱ʼ dí ikhaa niraʼnuu,+ 14  numuu dí gi̱i̱ na̱nguá kuaʼdáá mbá xuajin dí marigá má xúʼko̱, kuwáánʼ raguáʼti̱i̱n ga̱jma̱a̱ xúgíʼ a̱jkiu̱lú mbá xuajin rí ma̱ʼkha̱.+ 15  Ga̱jma̱a̱ numuu Jesús ndayóoʼ rí mu̱ʼni̱ mba̱a̱ má xúʼko̱ Dios, rígi̱ nindxu̱u̱ xóo mbá tsigijñaʼ dí nuxnáá ikhaa,+ gajmulú rawunlú mu mu̱ʼni̱ rí eʼwíinʼ muniʼnuuʼ mbiʼyuu.+ 16  Ma̱ngaa xámbumala mu̱ni̱ dí májánʼ, ga̱jma̱a̱ rí muxnu̱u̱ dí kuaʼdáála eʼwíinʼ+ numuu dí tsigijñaʼ xóo rígi̱ nanigu̱u̱ʼ wéñuuʼ Dios.+ 17  Gunimbala ku̱ñu̱u̱n ga̱jma̱a̱ gunimbaníí rí nuthi bi̱ nuxna ikhala,+ numuu rí ikhiin kúwá ruñewanla ga̱jma̱a̱ mixtandiʼíín cuenta ga̱jma̱a̱ numuu rúʼko̱,+ mu xúʼko̱ ikhiin muni̱ ga̱jma̱a̱ gagi ma̱ngaa rí xájmáan a̱jkiu̱ún numuu dí á mu tséni, rúʼko̱ maʼni gínáanʼla. 18  Gutajkháan má xúʼko̱ ga̱jma̱a̱ numuxu̱, numuu rí ndu̱ya̱a̱xu gajkhun rí kuáʼdááxu mbá ku̱ma̱ májánʼ ga̱jma̱a̱ nanduxu mu̱tha̱ rí gajkhun náa xúgíʼ.+ 19  Mú rí itháan, nanda̱ʼa̱la rí mutajkháan mu ikhúún matangaán nacha̱ náa kuwáanʼla. 20  Dios bi̱ gíʼdoo rí tsímáá, nikujxi̱i̱* náa majñu̱únʼ bi̱ nikháñún, baxtúu bi̱ itháan májáanʼ ndrígu̱ún mugu̱,+ bi̱ nindxu̱u̱ Tátá ndrígúlú, Jesús, núma̱a̱ má ga̱jma̱a̱ numuu eʼdiuu nimbánuu dí ndajyúuʼ asndu kámuu. Ga̱jma̱a̱ rí xúgi̱ Dios bi̱ gíʼdoo rí tsímáá, 21  maxnála xúgíʼ rí gáʼyala mu mu̱ni̱ rí nandoo, ga̱jma̱a̱ numuu Jesucristo, gaʼni ga̱jma̱á nindxu̱xu̱ rí nanigu̱u̱ʼ. Náa ikhaa gáʼga gamajkhu asndu kámuu. Xúʼko̱ gáʼni.* 22  Dí xúgi̱ a̱ngui̱nʼ, natakháñala rí maʼngo̱o̱ a̱jkia̱la mudxawíín ajngáa rí naxná tsiaki̱i̱ rígi̱. Numuu rí ninirámáʼ náa inala mbá chíʼgíiʼ* i̱yi̱i̱ʼ rígi̱. 23  Nandoʼ rí mbu̱ya̱la dí ndxájulú Timoteo nigájnáa má, á mu na̱ʼkha̱ nacha̱, mbóó gúʼguaxu gúyala. 24  Guthu̱u̱n dí narajxi̱ín xúgíinʼ bi̱ nuxnala ikha, ga̱jma̱a̱ xúgíinʼ bi̱ Dios niraʼwíin. A̱ngiu̱lú bi̱ kúwá náa Italia+ nurajxáanʼla. 25  Rí májánʼ wéñuuʼ a̱jkiu̱u̱n Dios garigá ga̱jma̱á nindxa̱la.

Mbaʼa nota

^ Náa ajngáa griego naʼthí, “bi̱ kaxtuʼwún ga̱jma̱a̱ cadena”.
^ Náa ajngáa griego naʼthí, “numuu rí mangáanʼ kuwáanʼla náa mbóó xuwiʼ”.
^ Atayáá glosario, nubúúnʼ xkawiʼ kayuuʼ.
^ Atayáá apén. A5.
^ Xóo muʼthá, awan ga̱jma̱a̱ numuu ganitsu.
^ Atayáá glosario, rí májánʼ wéñuuʼ a̱jkiu̱u̱n.
^ Náa ajngáa griego naʼthí, “ñajunʼ mu”.
^ O “campamento”.
^ O “niʼniga̱bi̱i̱”, “niʼni mbaʼya̱a̱”.
^ O “Amén”.
^ O “lajuíin”.

Copyrights ndrígóo i̱yi̱i̱ʼ rígi̱