Hebreos 1:1-14

  • Dios najmiuu A̱ʼdióo mu maʼthúlú (1-4)

  • Ada̱ gíʼdoo itháán numuu ki xóo ángeles (5-14)

1  Asndu nákha wajyúuʼ Dios nijmiuu profetas* mu muthún wajin xiʼñúlú, niʼthún mbaʼa nuthu ga̱jma̱a̱ mbaʼa enii xóo niʼthún.+ 2  Mú náa iwáá mbiʼi rígi̱, nijmiuu A̱ʼdióo mu maʼthúlú,+ bi̱ nigíiʼ mu magruigúu xúgíʼ dí rígá+ ga̱jma̱a̱ bi̱ nijmiuu mu maʼniwíi xúgíʼ dí rígá mekhuíí ga̱jma̱a̱ náa tsu̱du̱u̱ ku̱ba̱ʼ.*+ 3  Ikhaa nasngájma gamajkhu ndrígóo Dios+ ga̱jma̱a̱ ikhaa nasngájma xóo phú nindxu̱u̱ Dios,+ ma̱ngaa naguajtuun mbá xúgíʼ ga̱jma̱a̱ ajngóo rí gíʼdoo tsiaki̱i̱. Ga̱jma̱a̱ nda̱wa̱á rí niguámbóo niʼni kaʼwi̱i̱ aʼkhúlú,+ nigi̱ʼi̱ náa níjñu mújúunʼ Dios bi̱ phú Mba̱a̱ náa mekhuíí.+ 4  Ikhaa ni̱jkha̱nú ninindxu̱u̱ bi̱ itháán gíʼdoo numuu náa ángeles,+ numuu rí ni̱jkha̱nú nikhánáá mbiʼyuu rí itháán májánʼ ki xóo ikhiin.+ 5  Mbá xkri̱da, tsáá lá ángel bi̱ Dios niʼthúu̱n mbá miʼtsú: “Ikháán nindxa̱a̱ʼ a̱ʼdióʼ, ga̱jma̱a̱ xúgi̱ ni̱jkhánú ninindxu̱ʼ ana̱a̱ʼ* rá.”+ O ma̱ngaa: “Ikhúún mani̱ndxu̱ʼ anu̱u̱, ikhaa mani̱ndxu̱u̱ a̱ʼdióʼ rá.”+ 6  Ga̱jma̱a̱ índo̱ gáʼkha̱a̱ ka̱ya̱a̱ mbu̱júu̱ A̱ʼdióo bi̱ giʼnii+ náa tsu̱du̱u̱ ku̱ba̱ʼ, ikhaa naʼthí: “Xúgíinʼ ángeles ndrígióo Dios gusmbati̱gu̱u̱n náa inuu”. 7  Ma̱ngaa naʼthí ga̱jma̱a̱ numún ángeles: “Naʼni rí ángeles ndrígióo muguáʼdáá tsiaki̱i̱* ga̱jma̱a̱ xa̱bi̱i̱+ xóo riʼyu̱u̱ aguʼ”.+ 8  Mú rígi̱ rí naʼthí ga̱jma̱a̱ numuu A̱ʼdióo: “Dios nindxu̱u̱ xília̱a̱ʼ*+ asndu kámuu, ma̱ngaa Maratañájunʼ xó má kaʼyoo. 9  Nindaaʼ xtayáá dí májánʼ ga̱jma̱a̱ niwi̱ya̱a̱ʼ xtayáá dí ra̱májánʼ.* Ikha jngóo, Dios ndrígia̱a̱ʼ niraʼwíín+ ga̱jma̱a̱ aceite rí gagi, itháan ikháán ki xóo a̱ngia̱a̱nʼ”.+ 10  Ma̱ngaa naʼthí: “Nákha ginii, ikháán Tátá, nitagíʼ ku̱ba̱ʼ ga̱jma̱a̱ ñawáanʼ nitani̱ mekhu. 11  Rígi̱ ma̱ndoo mandáti̱ga̱a̱, mú ikháán maraxtaa má xúʼko̱, ikhiin mani̱ndxu̱ún xó mbá xtíin rí naguuʼ 12  ikháán matambríʼiin xóo mbá xtíin, ikhiin maguánú maxtiʼkuiín xó má mbá xtíin. Mú ikháán xátriʼkuminaʼ ga̱jma̱a̱ nditháan xátumuu tsiguaaʼ”.+ 13  Mú, tsáá lá ángel niʼthúu̱n mbá miʼtsú: “Araʼwún náa níjniú mújúnʼ asndu índo̱ gáni̱ rí xa̱bu̱ sia̱nʼ ndrígáaʼ mani̱ndxu̱ún xóo ixi̱ náa matasngutámáʼ rajkuáaʼ rá.”+ 14  Lá raʼkháa xúgíinʼ ikhiin ni̱ndxu̱ún ángeles bi̱ nuni̱ mbá ñajunʼ kaʼwu náa Dios,+ bi̱ waxúʼmiin mu mumbañún bi̱ maguma káwíin ráʼ.

Mbaʼa nota

^ O “gaʼyee”, “bi̱ nuthi dí marigá”.
^ O “mbiʼi”. Atayáá glosario, mbiʼi xúgi̱.
^ O “tátiáaʼ”.
^ Náa ajngáa griego naʼthí, “espíritu”.
^ O “trono ndrígáaʼ”.
^ Náa ajngáa griego naʼthí, “nanújngurámún xtángoo”, xóo muʼthá, tsíñún gúyáá xtángoo ndrígóo Dios.

Copyrights ndrígóo i̱yi̱i̱ʼ rígi̱