Efesios 2:1-22
2 Ikháanʼla, Dios niʼni rí mbu̱yala maski má nikáñala ga̱jma̱a̱ numuu dí raʼkhí ma̱ngaa numuu aʼkhá rí ni̱nila+
2 nákha ginii, índo̱ kuwáanʼla ru̱ni̱ xó má nandoo numbaaʼ rígi̱,*+ ni̱nila xó má nandoo xa̱bu̱ ñajunʼ bi̱ naʼtáñajuunʼ giñánʼ+ ga̱jma̱a̱ espíritu+ dí naxkajxi̱i̱n xa̱bu̱ bi̱ tsénimbu̱u̱n.
3 Xúʼko̱ má e̱ʼni̱ mangáánʼ nákha ginii, nu̱ʼni̱ xó má eni̱ ikhiin xó má nagua̱ʼa̱ xuyulúʼ,+ nu̱ʼni̱ xóo rí nandoo xuwiʼ ga̱jma̱a̱ rí nundxa̱ʼwa̱míjna̱.+ Asndu nákha nigumáanʼ ikháanʼ ni̱ndxu̱lú e̱ji̱i̱n sia̱nʼ+ xó má eʼwíinʼ.
4 Mú Dios bi̱ ra̱ʼkhá tháán egáwíinʼ a̱jkiu̱u̱n+ nindoo kaʼyulú wéñuuʼ,+
5 niʼni rí mbu̱ʼya̱a̱ gajmiúlú Cristo maski ajndu nikháñulú ga̱jma̱a̱ dí ra̱májánʼ rí nu̱ʼni̱,+ ikháanʼ nindoo nikáwáanʼla ga̱jma̱a̱ numuu rí májánʼ wéñuuʼ a̱jkiu̱u̱n Dios maski ajndu ra̱káʼyala.*
6 Niʼni rí mbu̱ʼya̱a̱* gajmiúlú ikhaa ga̱jma̱a̱ nigruigáánʼ mbóó gajmiúlú Cristo Jesús+ náa mekhuíí
7 mu náa mbiʼi rí na̱ʼkha̱* ikhaa masngájmulú rí májánʼ wéñuuʼ a̱jkiu̱u̱n índo̱ gáxnulú rí gíʼdoo numuu rí kuwáánʼ mbóó gajmiúlú Cristo Jesús.
8 Numuu rí májánʼ wéñuuʼ a̱jkiu̱u̱n Dios maski ajndu rakáʼyala, ikháanʼ nindoo nikáwáanʼla ga̱jma̱a̱ numuu fe rí kuaʼdáá.+ Raʼkháa numuu rí ikháanʼ niʼngala̱ nidaaʼ nindxu̱u̱ numuu rí Dios nimínáaʼla.
9 Mú raʼkháa ga̱jma̱a̱ numuu ñajunʼ rí ikháanʼ ni̱nila,+ ikha jngóo nimbáa xándoo maʼnimbamínáʼ ga̱jma̱a̱ numuu nimbá.
10 Ni̱ndxu̱lú ñajunʼ rí Dios niʼni ga̱jma̱a̱ ñawúunʼ, niʼniwáánʼlú+ mu makuwáánʼ mbóó gajmiúlú Cristo Jesús,+ mu mu̱ʼni̱ ñajunʼ dí májánʼ rí Dios má niʼthí asndu nákha wapháá rí mu̱ʼni̱.
11 Garmáʼáan a̱jkia̱la rí ikháanʼ asndu nákha nigumáanʼla, nindxa̱la xa̱bu̱ numbaaʼ, nigumbiʼyala “xa̱bu̱ bi̱ na̱nguá nithu xtóo xuyuuʼ tsáʼkhún” numuu rí xúʼko̱ nixnambiʼyala “xa̱bu̱ bi̱ nithu xtóo xuyuuʼ tsáʼkhún” rí nuni̱ xa̱bu̱ú náa xuwiʼ.
12 Nákha mbiʼi rúʼko̱ Cristo ndawa̱a̱ náa ikháanʼla, na̱nguá kuwáanʼla mbóó gajmiála xuajin Israel, rakáʼyala mundrígúu dí nijuiʼtá náa nimbánúún,+ kuwáanʼ náa numbaaʼ nda̱a̱ rí kua̱ʼthi̱i̱n ni má Dios ndawa̱a̱ náa ikháanʼla.+
13 Mú rí xúgi̱ kuwáanʼla mbóó jnduʼ gajmiála Cristo, ikháanʼla rí nákha ginii kuwáanʼ mitsínguánʼ nindoo nijkuánú nikuwáanʼ mijngii ga̱jma̱a̱ numuu eʼdiuu Cristo.
14 Numuu rí ikhaa ni̱ʼkha̱ kayóo rí tsímáá,+ niʼni rí nájma̱ enii xa̱bu̱ makuwá mbóó jnduʼ+ ga̱jma̱a̱ niʼni gámbáa xtájtsí rí ka̱ʼwa̱n tu̱mba̱a̱ dí naʼni wájíinʼ.+
15 Ga̱jma̱a̱ numuu xuyuuʼ niʼni gámbáa rí naʼni marigá sia̱nʼ, ikhaa nindxu̱u̱ Xtángoo ndrígóo Moisés rí gíʼdoo mbaʼa kiʼtáñajunʼ, mu maʼni rí nájma̱ enii xa̱bu̱ bi̱ kúwá mbóó gajmiún ikhaa+ maʼni̱i̱ mbawíí ga̱jma̱a̱ xúʼko̱ marigá rí tsímáá,
16 rí nijuiʼdujmaa náa ixi̱,*+ niʼni rí nájma̱ xuajin rígi̱ maʼni imbóó mu xúʼko̱ mambajxíín gajmiún Dios ga̱jma̱a̱ rí ikhaa nikháñuu niʼni gámbáa sia̱nʼ+ dí rígá náa ikhiin.
17 Ikhaa ni̱ʼkha̱, niʼthála ajngáa májánʼ dí tsímáá náa ikháanʼla bi̱ kuwáanʼ mitsínguánʼ ga̱jma̱a̱ bi̱ kúwáanʼ mijngii,
18 ga̱jma̱a̱ numuu ikhaa, a̱jma̱ xuajin rígi̱ nda̱a̱ dí gárikhúún dí muxuʼmamijná náa Anu̱lú* náa majñu̱u̱ʼ mbóó espíritu.
19 Ikháanʼ na̱nguá nindxa̱la xa̱bu̱ bi̱ naguwaáʼ,+ nindxa̱la xa̱bu̱ bi̱ kúwá mbóó xuajin+ gajmiála xa̱bi̱i̱ Jesús ma̱ngaa nindxa̱la bi̱ kuwáanʼ náa goʼwóo Dios,+
20 ikháanʼ nindxa̱la xóo guʼwá dí nigumarámáanʼ náa tsu̱du̱ún apóstoles ga̱jma̱a̱ profetas*+ numuu rí ikhiin ni̱ndxu̱ún xóo rajkúu ga̱jma̱a̱ Cristo nindxu̱u̱ xóo itsí rí itháan gíʼdoo numuu dí nigi̱ʼi̱ ga̱jma̱a̱.+
21 Náa Cristo, guʼwá rígi̱ kuajtuminaʼ xúgíʼ,+ ikha jngóo na̱jkha̱ raʼni mba̱a̱ asndu maʼga̱nú mani̱ndxu̱u̱ mbá guʼwá rí kaxtaʼwíí mu mani̱ndxu̱u̱ goʼwóo Jeobá.*+
22 Numuu rí kuwáanʼ mbóó jnduʼ gajmiála Cristo, Dios nigímbáanʼla gajmiála eʼwíinʼ náa mbá guʼwá rí ikhaa xtáa, numuu dí ikhí rígá espíritu ndrígóo.+
