Raga̱jma̱ i̱yi̱i̱ʼ rí niʼnirámáʼ Pedro 1:1-21
1 I̱yi̱i̱ʼ rígi̱ niʼnirámáʼ Simón Pedro, ñumbáá ga̱jma̱a̱ apóstol ndrígóo Jesucristo, mu maʼga inún bi̱ niʼngu̱u̱n niguáʼdáá mbá fe dí raʼkhá tháán gíʼdoo numuu xóo ndrígúlú ikháánʼ numuu rí Dios ndrígúlú ga̱jma̱a̱ Jesucristo bi̱ Naʼni káwáánʼlú nindxu̱ún jmbiin:
2 Gundrígú má xúʼko̱ rí tsímáá ga̱jma̱a̱ rí májánʼ wéñuuʼ a̱jkiu̱u̱n Dios* ga̱jma̱a̱ numuu ku̱ma̱ jmbu+ ndrígóo Dios ma̱ngaa ndrígóo Jesús bi̱ nindxu̱u̱ Tátá ndrígúlú,
3 numuu rí nijmuu tsiaki̱i̱ ndrígóo mu maxnúlú xúgíʼ rí ndayúlú mu makuwa̱a̱nʼ ga̱jma̱a̱, mu xúʼko̱ ma̱ndoo mbuʼyamajkuíí Dios náa majñu̱u̱ʼ ku̱ma̱ jmbu ndrígóo bi̱ nindxaʼwúlú+ mu mbuʼyáá nguáthá mba̱a̱ nindxu̱u̱ ga̱jma̱a̱ rí májáanʼ a̱jkiu̱u̱n.
4 Ga̱jma̱a̱ numuu rígi̱, ikháánʼlú nindrígú rí ikhaa nikudaminaʼ maxnúlú rí gíʼdoo wéñuuʼ numuu ga̱jma̱a̱ rí mitsaanʼ* wéñuuʼ,+ núma̱a̱ má ga̱jma̱a̱ numuu rígi̱ ikháanʼla ma̱ndoo maguajtha̱a̱nʼ espíritu xó má Dios.+ Nda̱wa̱á rí nikáwáanʼla náa mbá numbaaʼ xkawiʼ náa xa̱bu̱ i̱ndó nagua̱ʼa̱ muni̱ dí raʼkhí.*
5 Ikhaa numuu rígi̱ jngóo gunimíjnala asndu xó má eʼngo̱o̱,+ mu maguaʼdáála fe ma̱ngaa rí mani̱ndxa̱la májáanʼ xa̱bu̱.+ Gu̱ni̱ tsiakimíjnala mu maguaʼdáála ku̱ma̱,+
6 ga̱jma̱a̱ rí muñewa̱a̱n rí mu̱ni̱,+ gu̱ni̱ tsiakimíjnala mu maʼnga̱la ga̱jma̱a̱ rí mu̱ni̱ má xúʼko̱ ñajuunʼ Dios,+
7 gu̱ni̱ tsiakimíjna rí maʼndala kuyamíjna̱ ga̱jma̱a̱ rí maguaʼdáála ngajua.+
8 Á mu rígá wéñuuʼ rígi̱ náa ikháanʼla, maʼni rí majmala májánʼ ku̱ma̱ jmbu ndrígóo Jesucristo bi̱ nindxu̱u̱ Tátá ndrígúlú ga̱jma̱a̱ maʼni rí xáʼskala ni má xánindxa̱la xóo mbá ixi̱ rí tséjma̱a̱ xndúu.+
9 Numuu rí asndu tsáa bi̱ na̱nguá gíʼdoo rígi̱ tsékruigo̱o̱, narugoo iduu mu xáʼyoo aguʼ*+ ga̱jma̱a̱ nimbumuu rí Dios niʼni mba̱a̱ a̱jkiu̱u̱n kaʼyoo aʼkhá rí nikudaminaʼ+ nákha ginii.
10 Ikha jngóo a̱ngui̱nʼ, gu̱ni̱ tsiakimíjna̱ rí maguajúnla jmbu ga̱jma̱a̱ dí makuwa̱a̱nʼ má xúʼko̱ náa bi̱ Dios niraʼwíin ga̱jma̱a̱ nindxaʼwúún.+ Á mu nu̱ni̱ má xúʼko̱ rígi̱ nditháan xájngradaanʼla.+
11 Mu xúʼko̱ maguma tsajkurámáanʼla wéñuuʼ, xóo muʼthá, rí ma̱ndoo mataʼa̱a̱ʼla náa rí Jesucristo bi̱ nindxu̱u̱ Tátá ndrígúlú ga̱jma̱a̱ bi̱ Naʼni káwáánʼlú+ maʼtáñajunʼ asndu kámuu.+
12 Ikhaa rúʼko̱ numuu rí nandoʼ ma̱ni̱ marmáʼáan má xúʼko̱ a̱jkia̱la rígi̱, maski ajndu ikháanʼla nduya̱a̱ má, ga̱jma̱a̱ kuwáanʼ má xúʼko̱ náa rí gajkhun dí nijmañala.
13 Numuu rí nda̱yo̱o̱ rí gíʼdoo numuu manikuma̱a̱ʼla+ ga̱jma̱a̱ rí ma̱tala nákha xóó xtáá náa guʼwá xtíin* rígi̱,+
14 numuu rí nda̱yo̱o̱ rí inu má magajnáaʼ náa guʼwá xtíin rígi̱, xó má Jesucristo bi̱ nindxu̱u̱ Tátá ndrígúlú niʼni mba̱yo̱o̱.+
15 Ma̱ni̱ má xúʼko̱ asndu xó má eʼngo̱o̱ mu nda̱wa̱á rí gáʼgaaʼ, ikháanʼla ndajkuáanʼ majmáanʼ marmáʼáan a̱jkia̱la xúgíʼ rígi̱.
16 Ikháanʼxu tájmuxu cuento rí minduwaʼ rí ni̱ni̱ májáánʼxu ikháanʼ mu mu̱tala ga̱jma̱a̱ numuu tsiaki̱i̱ ma̱ngaa rí xóo nikujmaa Jesucristo bi̱ nindxu̱u̱ Tátá ndrígúlú. Ikháanʼ mínáanʼ ndi̱ya̱a̱xu nguáthá mba̱a̱ nindxu̱u̱.+
17 Numuu rí ikhaa nigruigú gamajkhu rí Dios bi̱ nindxu̱u̱ Anu̱u̱* nixnúu, nirígá rígi̱ índo̱ Dios bi̱ phú mba̱a̱ niʼthúu̱n ajngáa rígi̱:* “Bugi̱ nindxu̱u̱ A̱ʼdióʼ bi̱ nandoʼ ka̱yo̱o̱, bi̱ naʼni rí maʼdxuu a̱jkiu̱nʼ”.+
18 Xúʼko̱, ikháanʼxu nidxáwíinxu rí nijuiʼthá ajngáa rígi̱ rí ni̱ʼkha̱ mekhuíí índo̱ kúwáanʼ gajmiúxu ikhaa náa kúbá ndrígóo Dios.
19 Ikha jngóo nduya̱a̱xu gajkhun dí mambanúu ajngáa rí nijuiʼtáriya̱ʼ, májánʼ má eni̱la rí nuxnatíʼñamijná mudxawíín má xúʼko̱ rígi̱, rí nindxu̱u̱ xóo mbá lámpara+ rí nambiʼi náa mikína (asndu índo̱ gájtsiriga̱ ga̱jma̱a̱ índo̱ gátujxu̱u̱ a̱ʼgua̱a̱n najtsi)+ náa a̱jkia̱la.
20 Ginii kayuuʼ, xó má ikháanʼ eya̱a̱la rí xúgíʼ rí nijuiʼtáriyaʼ rí na̱ʼkha̱ náa Kiʼniraʼmáʼ na̱nguá ni̱ʼkha̱ náa mbáa xa̱bu̱.
21 Numuu rí nimbá miʼtsú na̱nguá nijuiʼtáriyaʼ rí xóo nindoo mbáa xa̱bu̱.+ Espíritu santo* nixkajxi̱i̱n* xa̱bu̱ rí muthi ga̱jma̱a̱ numuu Dios.+
