Timbá libro rí niʼnirámáʼ Samuel 11:1-15
11 Nahás xa̱bu̱ ammonita+ nitsimuu gajmíi̱n xa̱bi̱i̱ mu magi̱ʼi̱i̱n ga̱jma̱a̱ muxmijná gajmiún xa̱bu̱ Jabés, náa Galaad. Xúgíinʼ xa̱bu̱ Jabés nitháán Nahás:+ “Gambanáʼ ga̱jma̱á nindxu̱xu̱ ga̱jma̱a̱ mu̱ni̱xu̱ʼ ñajuaanʼ”.
2 Nahás xa̱bu̱ ammonita niriʼñúún: “Mambanúʼ ga̱jma̱á nindxa̱la, mú rígá mbá rí ma̱niala: Magúwíi idala májánʼ. Xúʼko̱ ma̱ni̱ majthi̱i̱nʼ mbá xúgíinʼ xa̱bu̱ Israel”.
3 Bi̱ kuya̱ edxu̱u̱ náa Jabés nitháán: “Atatsíñuxu̱ mbá juwan mbiʼi mu ma̱ndoo muxuʼmiinxu bi̱ magún kuñu̱u̱n ajngáa náa mbá xúgíʼ mbañúúnʼ xa̱bu̱ Israel. Á mu dí nimbáa tséʼkha̱ gáʼni káwáanʼxu, muniʼñámíjnaxu náa ikháán”.
4 Índo̱ bi̱ nagún kuñu̱u̱n ajngáa niguánú náa Guibeá+ náa xtáa Saúl, nithúún xa̱bu̱ xuajin dí xtáa rarígá, mbá xúgíinʼ nigi̱ʼdi̱i̱ nimbiya ngínún.
5 Saúl na̱ʼkha̱a̱ xanáá kaguíin xedi̱. Ikhú nirajxi̱: “Dí lá niguáʼníí xa̱bu̱ xuajin. Náá numuu dí xúgíinʼ kúwá rumbi̱ya̱ʼ.” Ikhú nitháán dí nithi xa̱bu̱ Jabés.
6 Índo̱ Saúl niʼdxuun rígi̱, ikhú espíritu santo* ndrígóo Dios niʼni dí magiʼdoo tsiaki̱i̱,+ ga̱jma̱a̱ ikhaa ra̱ʼkhá tháán nikiʼnáa.
7 Ni̱jkha̱ gágui̱i̱n a̱jmi̱i̱n xedi̱, nirujkuiin ga̱jma̱a̱ nixnúún xuiʼtóo rígi̱ muda gágún bi̱ magún kuñu̱u̱n ajngáa náa mbá xúgíʼ mbañúúnʼ xa̱bu̱ Israel, bi̱ nithi: “¡Rígi̱ dí gágíʼnuu xediu̱u̱ bi̱ tsémbáyúu Saúl ga̱jma̱a̱ Samuel!”. Ikhú mbá xúgíinʼ xa̱bu̱ xuajin nimíñúún kuyáá Jeobá, ga̱jma̱a̱ nigíʼdi̱i̱ nigún mbá kambájxu̱u̱n.
8 Ikhú Saúl nigíʼdúu niguxnii náa Bézec: Kúwá mbá 300,000 israelitas ga̱jma̱a̱ mbá 30,000 xa̱bekha bi̱ naguwáʼ náa Judá.
9 Nithúún bi̱ nigún kuñu̱u̱n ajngáa: “Guthu̱u̱nla xa̱bekha Jabés, bi̱ kúwá náa Galaad: ‹Gájtsíí ta̱pha̱ mbiʼi* maguma káwáanʼla›”. Ikha jngóo bi̱ nigún kuñu̱u̱n ajngáa nithúún xa̱bu̱ Jabés, ga̱jma̱a̱ ikhiin ra̱ʼkhá tháán nidxún.
10 Ikhú xa̱bu̱ Jabés nithúún ammonitas: “Gájtsíí muniʼñámíjnaxu ga̱jma̱a̱ ikháanʼla ma̱ndoo mu̱niuxu xó má májánʼ gúya̱a̱la ikháanʼ”.+
11 I̱mba̱ néjtsuu Saúl nirui̱ʼti̱i̱n xa̱bi̱i̱ náa mbá ajtsú grupo. Nákha xóó tséjtsi,* nigájnún náa tapo̱o̱ dí gíi̱nʼ ga̱jma̱a̱ nigi̱ʼdi̱i̱ niradíin ammonitas+ asndu índo̱ niʼni ta̱pha̱ mbiʼi.* Bi̱ nikáwíin nigáñún ga̱jma̱a̱ nigadríʼiin rí asndu tágún majmi̱i̱n.
12 Ga̱jma̱a̱ xa̱bu̱ nitháán Samuel: “Tsíín nindxu̱ún bi̱ nithi rí tsíñún dí Saúl mani̱ndxu̱u̱ rey ndrígúxu̱ rá.+ Guxnajxíinla mu muradíinxu”.
13 Mú Saúl niʼthí: “Nimbáa xa̱bu̱ xáʼyóoʼ makhañúu xúgi̱,+ numuu dí Jeobá nindxu̱u̱ bi̱ niʼni káwíin xa̱bu̱ Israel”.
14 Nda̱wa̱á Samuel niʼthún xa̱bu̱ xuajin: “Gu̱ʼgua̱lú náa Guilgal+ mu musngajmálú mbu̱júu̱ dí Saúl nindxu̱u̱ rey”.+
15 Ikha jngóo mbá xúgíinʼ xa̱bu̱ xuajin nigún náa Guilgal, ga̱jma̱a̱ ikhí nigíiʼ Saúl mu mani̱ndxu̱u̱ rey náa inuu Jeobá. Nda̱wa̱á nixnajxi̱ tsigijñaʼ dí tsímáá*+ náa inuu Jeobá, Saúl gajmíi̱n xúgíinʼ israelitas asndu nadxún nini̱ ndxa̱a̱ mbiʼi rúʼko̱.+
