Timbá i̱yi̱i̱ʼ rí na̱jkha̱ inún Corintios 6:1-20
6 Á mu mbáa dí ikháanʼ gíʼdoo xkujndu ga̱jma̱a̱ ndxájuu,+ náá numuu dí najkua náa inún xa̱bu̱ ñajunʼ bi̱ nuni̱ dí ra̱májánʼ ga̱jma̱a̱ raʼkháa náa inún xa̱bi̱i̱ Dios bi̱ kaʼwiin rá.
2 Lá tséya̱a̱ rí bi̱ kaʼwiin gúnimbáníí xkujndu náa numbaaʼ ráʼ.+ Á mu ikháanʼ gúnimbáníí xkujndu náa numbaaʼ, lá xájmáanʼ gúnimbáníí mbá xkujndu dí ragíʼdoo wéñuuʼ numuu ráʼ.
3 Lá tséya̱a̱ dí muʼnimbáníí numún ángeles ráʼ.+ Á mu xúʼko̱, náá numuu dí xájmáanʼ gúnimbáníí xkujndu dí rígá náa kuwáanʼ rá.
4 Ikha jngóo á mu ndayóoʼ munimbáníí xkujndu náa kuwáanʼ,+ náá numuu dí nduʼñíinʼ xa̱bu̱ mu munimbáníí xkujndu ndrígala, bi̱ a̱ngiu̱lú náa nagimbáanʼ tséyamajkún rá.
5 Na̱tala rígi̱ mu mati̱ya̱la. Lá ndawa̱a̱ nimbáa bi̱ nakro̱ʼo̱o̱ náa ikháanʼla mu maʼnimbánuu xkujndu dí narígá náa a̱ngui̱i̱n ráʼ.
6 Rí phú nuni̱la, najkua kudamijná kaníkháanʼ náa xa̱bu̱ ñajunʼ, ¡bi̱ tsénimbu̱ún kuyáá Cristo!
7 Raʼkhí má nindxu̱u̱ rí magiʼdala kaníkháanʼ náa inún xa̱bu̱ ñajunʼ. Lá raʼkháa itháan májánʼ dí muniʼñamíjná rí muniala dí ra̱májánʼ xáʼ.+ Lá raʼkháa itháan májánʼ dí muniʼñámíjná rí munikuʼwála xáʼ.
8 Mú ikháanʼ nindxa̱la bi̱ nuniu̱u̱n dí ra̱májánʼ, ¡ga̱jma̱a̱ nu̱ni̱ kúʼwúnʼ a̱ngia̱la!
9 Lá tséya̱a̱ rí bi̱ nuni̱ dí ra̱májánʼ xátaʼa̱án náa naʼtáñajunʼ Xa̱bu̱ Ñajunʼ ndrígóo Dios* ráʼ.+ Xúninduwamijná. Xa̱bu̱ bi̱ nubúúnʼ xkawiʼ kayuuʼ gajmiún eʼwíinʼ,*+ xa̱bu̱ bi̱ nduyamajkhún xándú,+ bi̱ nubúnʼ gajmiún bi̱ raʼkháa guʼñu̱ún o ajmbiu̱ún,+ xa̱bekha bi̱ a̱jma̱ ñajúúnʼ,+ xa̱bekha bi̱ nubúúnʼ gajmiún xa̱bekha,+
10 bi̱ nuni̱ kuʼwáʼ, bi̱ nanigu̱u̱nʼ maguaʼdáá wéñuuʼ,+ bi̱ najngi̱i̱n,+ bi̱ nuta wéñúúnʼ eʼwíinʼ ga̱jma̱a̱ bi̱ nuni̱ kuʼwúnʼ eʼwíinʼ xátaʼa̱án náa maʼtáñajunʼ Xa̱bu̱ Ñajunʼ ndrígóo Dios.+
11 Xúʼko̱ ni̱ni̱la tikuáanʼ dí ikháanʼ nákha ginii. Mú rí xúgi̱ niguma kaʼwáanʼ,+ nijuaxtaʼwáanʼ,+ ga̱jma̱a̱ mbiʼyuu Tátá Jesucristo ga̱jma̱a̱ espíritu santo* ndrígóo Dios nijuiʼthá dí ikháanʼ nindxa̱la xa̱bu̱ jmbii.+
12 Xúgíʼ ma̱ndoo ma̱ni̱, mú raʼkháa xúgíʼ gáyambáá.+ Xúgíʼ ma̱ndoo ma̱ni̱ mú xániʼñáminaʼ dí mani̱ndxu̱ʼ ñumbáá ndrígóo.
13 Ganitsu nindxu̱u̱ mu majkuáa náa awúnlu, awúnlu nindxu̱u̱ mu majkuáa ganitsu, mú Dios maʼni gámbáa mbá nájma̱.+ Xa̱bu̱ ragíʼmaa majmuu xuyuuʼ mu mabóoʼ xkawiʼ kayuuʼ gajmíi̱n eʼwíinʼ,* gíʼmaa majmuu mu maʼni ñajuunʼ Tátá+ ga̱jma̱a̱ Tátá nañewu̱u̱n xuyuuʼ xa̱bu̱.
14 Mú Dios niʼniga̱bi̱i̱* Tátá+ ga̱jma̱a̱ mangáanʼ makuxáanʼ ga̱jma̱a̱ tsiaki̱i̱ ndrígóo+ náa majñu̱únʼ wajinʼ.+
15 Lá tséya̱a̱ rí xuyala kuajtuminaʼ mbóó ga̱jma̱a̱ xuyuuʼ Cristo ráʼ.+ Ikha jngóo, lá ma̱ndoo maríguíi mbáa náa Cristo mu maruwa̱a̱ ga̱jma̱a̱ mbáa a̱ʼgu̱ bi̱ nagujuamínáʼ ráʼ. ¡Xándoo mi̱ʼni̱ rígi̱!
16 Lá tséya̱a̱ rí asndu tsáa bi̱ naruwaminaʼ ga̱jma̱a̱ mbáa a̱ʼgu̱ bi̱ nagujuamínáʼ na̱jkha̱nú nanindxu̱u̱ mbóó xuwiʼ ga̱jma̱a̱ ikhaa xáʼ. Numuu dí ikhaa naʼthí: “Nájmi̱i̱n maguánú mani̱ndxu̱ún mbóó xuwiʼ”.+
17 Mú, asndu tsáá bi̱ naruwaminaʼ ga̱jma̱a̱ Tátá na̱jkha̱nú nandxa̱ʼwáminaʼ* xóo ikhaa.+
18 ¡Xúbala* xkawiʼ kayuuʼ gajmiála eʼwíinʼ!*+ Asndu xú káʼnii aʼkhá rí nakudaminaʼ mbáa na̱nguá eʼni aʼkhá náa xuyuuʼ, mú bi̱ naʼni aʼkhá ga̱jma̱a̱ mbáa naʼni gachúu xuyuuʼ.+
19 Lá tséya̱a̱la dí xuyala nindxu̱u̱ xóo goʼwóo Dios+ náa rígá espíritu santo ga̱jma̱a̱ rí Dios naxnála ráʼ.+ Ma̱ngaa ikháanʼla nánguá etañajumijná,+
20 numuu rí mba̱a̱ dí nijuiʼni numáá ga̱jma̱á numala.+ Ikha jngóo gajmala xuyala+ mu mu̱ni̱ mba̱a̱ Dios.+
