Timbá i̱yi̱i̱ʼ rí na̱jkha̱ inún Corintios 16:1-24

  • Nugimbóó rí mixnún cristianos bi̱ kúwá náa Jerusalén (1-4)

  • Awan ndrígóo Pablo rí xóo maʼga (5-9)

  • Rí ndiʼkúú maʼga Timoteo ga̱jma̱a̱ Apolos (10-12)

  • Consejos ga̱jma̱a̱ narajxi̱ín (13-24)

16  Ga̱jma̱a̱ numuu rí naxtágímbóó mixnún a̱ngiu̱lú,*+ gunimbáníí xóo awan dí nixnu̱u̱n a̱ngiu̱lú bi̱ nagimbíi̱n* náa Galacia. 2  Mámbá mbiʼi rí ndayáa xmáná, mámbáa dí ikháanʼla garíyaʼ wájííʼ* xó má eʼngo̱o̱ maxná, mu xáʼyóoʼ mugímbóó índo̱ ikhúún gáʼgánú. 3  Índo̱ gáʼgánú ikhí, makuʼnguíinʼ náa Jerusalén xa̱bu̱ bi̱ ikháanʼ gúta náa i̱yi̱i̱ʼ ndrígala+ mu magún kudúún dí ikháanʼla gúxna̱. 4  Á mu ndayóoʼ rí mangúún maʼgá, maʼgá gajmíʼ. 5  Maʼgá gáyala índo̱ gánújngoʼ náa Macedonia, numuu rí mbaʼyóoʼ maʼgá ikhí ma̱ngaa,+ 6  mbáa maguanúʼ ikhí ga̱jma̱á nindxa̱la mbá nguáthá mbiʼi o maguanúʼ xúgíʼ gu̱nʼ rí maʼni migúwán,* mú nda̱wa̱á muʼgua ga̱jma̱á ni̱ndxu̱ʼ mbá chíʼmbaʼ kamba̱a̱ náa gáʼgá. 7  Mú tsíyóʼ manújngoʼ mbá xngaa kayuuʼ náa ikháanʼla, numuu rí gúʼthu̱u̱n maxtáá mbá nguáthá mbiʼi ga̱jma̱á nindxa̱la,+ á mu Jeobá* nandoo. 8  Aʼkho maxtáá náa Éfeso+ asndu índo̱ gáʼni Ndxa̱a̱ Pentecostés* 9  numuu rí nimbaʼtoo mbá xkrugua mba̱a̱ mu mañajunʼ itháan,+ mú kúwi̱i̱n wéñuuʼ xa̱bu̱ sia̱nʼ. 10  Á mu na̱jkha̱nú Timoteo,+ gumbáyííla mu xámiñuu índo̱ gáxtáa ga̱jma̱á nindxa̱la, numuu dí ikhaa xtáa raʼni ñajuunʼ Jeobá,*+ xó má ikhúún. 11  Ikha jngóo, nimbáa xáʼyoo dí ragíʼdoo numuu. Gumbáyíí mu nda̱a̱ rí gágíʼnuu índo̱ gáʼkha̱ gáʼyoʼ, numuu rí ikhúún gajmíʼ a̱ngiu̱lú kuwa̱a̱nʼ raguaʼthi̱i̱nxu. 12  Nitakáñuu wéñuuʼ ndxájulú Apolos+ mu maʼga gajmíi̱n a̱ngiu̱lú gáʼyala. Ikhaa tséguapaa maʼga xúgi̱, mú maʼga índo̱ gáguapaa. 13  Gakuwa̱a̱nʼla xawii,+ gaguaʼdáá má xúʼko̱ fe,+ xámíñála,+ gakhi̱i̱ a̱jkia̱la gúni̱.+ 14  Gu̱ni̱ xúgíʼ ga̱jma̱a̱ ngajua.+ 15  Mú rígá rí nandoʼ ma̱tala a̱ngui̱nʼ. Ikháanʼ ndu̱ya̱a̱ rí bi̱ kúwá náa goʼwóo Estéfanas ninindxu̱ún timbíin* xa̱bi̱i̱ Cristo náa Acaya ga̱jma̱a̱ ikhiin nixnaximíjna̱ mu mumbañún a̱ngiu̱lú.* 16  Ikháanʼla mangáanʼ gunimbala kuñu̱u̱n xa̱bu̱ xóo buʼko̱ ga̱jma̱a̱ xúgíinʼ bi̱ nuñambáá ma̱ngaa bi̱ nuñajunʼ gakhi̱i̱.+ 17  Nadxuʼ numuu dí na̱ʼkha̱ Estéfanas,+ Fortunato ga̱jma̱a̱ Acaico, índo̱ nda̱ñu̱u̱n ikhiin asndu xóo naku̱mu̱ʼ dí nda̱ya̱la ikháanʼ. 18  Ikhiin nixnuʼ tsiaki̱i̱,* xúʼko̱ má nixnala tsiaki̱i̱ mangáanʼ. Ikha jngóo gusngajmá dí nduyamajkhún xa̱bu̱ xóo buʼko̱. 19  A̱ngiu̱lú bi̱ nagimbíi̱n* náa Asia nurajxáanʼla. Áquila ga̱jma̱a̱ Prisca, xúgíinʼ bi̱ nagimbíi̱n náa goʼwóo+ nurajxáanʼla ga̱jma̱a̱ mbiʼyuu Tátá. 20  Xúgíinʼ a̱ngiu̱lú nurajxáanʼla. Guraximijnáa ga̱jma̱a̱ beso.* 21  Ikhúún Pablo, naniraʼmáʼ i̱yi̱i̱ʼ rígi̱ ga̱jma̱a̱ ñawúnʼ mu marajxa̱a̱nʼla. 22  Á mu mbáa tsíyoo kaʼyoo Tátá, gajuiʼtátsríguíi. ¡Tátá ndrígúxu̱, mbá péñu,* ayi̱! 23  Garigá rí májánʼ wéñuuʼ a̱jkiu̱u̱n Tátá Jesús* náa ikháanʼla, maski ajndu rakáʼyala. 24  Nandoʼ ka̱ya̱la xúgiáanʼ ikháanʼ bi̱ kuwáanʼ mbóó jnduʼ gajmiála Cristo Jesús.

Mbaʼa nota

^ O “congregación”. Atayáá glosario, congregación.
^ Náa ajngáa griego naʼthí, “bi̱ kaʼwiin”.
^ O “kaníí”.
^ O “gu̱nʼ rí nagajtaa idiʼ”.
^ Atayáá apén. A5.
^ Atayáá glosario, Pentecostés.
^ Atayáá apén. A5.
^ Náa ajngáa griego naʼthí, “dí najma̱a̱ ginii kayuu”.
^ Náa ajngáa griego naʼthí, “bi̱ kaʼwiin”.
^ Náa ajngáa griego naʼthí, “xi̱ʼ”.
^ O “congregación”. Atayáá glosario, congregación.
^ Náa ajngáa griego naʼthí, “beso rí kaʼwu”. Beso rígi̱ nuxnamijná a̱ngiu̱lú bi̱ ndiʼkhún eniʼnumijná.
^ O “Ataniuxu̱ mbá rí májánʼ”.
^ Atayáá glosario, rí májánʼ wéñuuʼ a̱jkiu̱u̱n.

Copyrights ndrígóo i̱yi̱i̱ʼ rígi̱