Hukung su Ulangan 22:25-27 bal᷊inẹ měbẹ̌bisara soal u apa tau esẹ ene nẹ̌sal᷊a arau tala, ual᷊ingu seng nal᷊ahẹ i sie nẹ̌sal᷊a. Katewe timonang hukung ini ute gunang mapakal᷊ahẹ mahuala ene tawe nẹ̌sal᷊a. Mahịe měmanda konteks ayatẹ̌ ene.

Manga ayatẹ̌ kal᷊imona nẹ̌bisara soal u sěngkatau esẹ někoạ hubungan seks ”su soa” dingangu sěngkatau mahuala seng piạ kaghiange. Ual᷊ingu někoạ ene, tau esẹ ene seng někoạ zinah ual᷊ingu mahuala piạ kaghiange ene mẹ̌sul᷊ungu seng bọu nẹ̌kawing. Kerea dingangu mahuala ene? ”Su tempong su soa ene i sie tawe němangsagẹ̌ makiambang.” Manga i sie němangsagẹ̌, taumata wal᷊inẹ tantu sarung makaringihẹ̌ kụ mẹ̌tul᷊ung si sie. Katewe, i sie tawe němangsagẹ̌. Hakị u ene, mahuala ene lai někoạ zinah, kụ i rẹ̌dua kěbị nẹ̌sal᷊a.​—Ul. 22:23, 24.

Hukung su manga ayatẹ̌ tuhụe nělahẹ situasi nẹ̌tatěntang: ”Katewe mạeng tau esẹ ene nẹ̌sombangu mahuala piạ kaghiange ene su baelẹ̌, kụ esẹ ene něndariha dingangu něměrkosa si sie, tau esẹ ene harusẹ̌ pateng. Katewe abe pěkoạ apa-apa su mahuala ene, ual᷊ingu i sie tawe někoạ dosa makakoạ si sie botonge pateng. Kasus ini mẹ̌sul᷊ungu kasus sěngkatau něndariha dingangu němate ringange. Tau esẹ ene nẹ̌sombang dingangu mahuala ene su baelẹ̌, kụ mahuala ene seng němangsagẹ̌ makiambang katewe tawẹ apa taumata nẹ̌tul᷊ung si sie.”​—Ul. 22:25-27.

Su kasus ini, manga hakim mangimang wawine ene tantu ”seng němangsagẹ̌ makiambang katewe tawẹ apa taumata nẹ̌tul᷊ung si sie”. Hakị u ene, i sie tawe někoạ zinah. Katewe, tau esẹ ene niputusẹ̌ někoạ zinah ual᷊ingu seng ”něndariha dingangu něměrkosa” mahuala seng piạ kaghiange ene.

Hakị u ene, maning timonang hukung ene gunang mapakal᷊ahẹ mahuala ene tawe nẹ̌sal᷊a, hukung ene tatapẹ̌ nělahẹ tau esẹ ene nẹ̌sal᷊a ual᷊ingu něměrkosa dingangu někoạ zinah. Su kasus kerene, i kitẹ botonge mangimang manga hakim sěntiniạ ”měmarikěsa pakapia” tuhụ petunjuk mal᷊ahẹ seng masau gẹ̌gělịkang i Yehuwa.​—Ul. 13:14; 17:4; Kel. 20:14.