Lipaki Tsa Jehova li lokolotse Libibele ka lipuo tse 12 ka mafelo-beke a mabeli a hlahlamanang. Ka la 4 July 2020, ho lokollotsoe Phetolelo ea Lefatše le Lecha ea Mangolo a Halalelang ka puo ea Sebislama le Seoromo. Letsatsing le hlahlamang ka la 5 July ha boeloa ha lokolloa Phetolelo ea Lefatše le Lecha ka puo ea Selatvia le Semarathi le Phetolelo ea Lefatše le Lecha ea Mangolo a Segerike a Bakreste ka puo ea Sebengali le Sekaren (sa S’gaw). Libibele tsena li ile tsa lokolloa ka marang-rang nakong ea lipuo tse rekotiloeng. Bahoeletsi ba ile ba shebella lenaneo lena le khethehileng la elektronike ’me ba ile ba thabela limpho tsena tse tsoang ho Jehova haholo.

Phetolelo ea Lefatše le Lecha e ntlafalitsoeng e ile ea lokolloa ka puo ea Sebislama ke mora oa bo rona Mark Sleger, e leng setho sa Komiti ea Lekala la Fiji. Bahoeletsi ba Vanuata ba ile ba shebella lenaneo lena ka puo ea Sebislama eo e neng e boetse e fetoletsoe ka Puo ea Matsoho ea Sebislama.

Ho fetolela Bibele ena ho nkile lilemo tse fetang tse tharo ’me e fetoletsoe ke lihlopha tse peli tsa bafetoleli. Mofetoleli e mong o ile a re: “Bara ba bo rona ba tl’o rata Phetolelo ea Lefatše le Lecha e ntlafalitsoeng hobane e baleha habonolo hape e ngotsoe ka tsela eo ho ngoloang ka eona mehleng ena le ka puo e sebelisoang letsatsi le letsatsi. E tla re thusa hore kaofela ha rona re utloisise ’nete haholoanyane.”

Re kholisehile hore Bibele ena e ntlafalitsoeng e tla thusa bahoeletsi ba fetang 700 ba buang Sebislama ha ba ithuta Bibele le ha ba le tšimong.

Mora oa bo rona Delroy Williamson, e leng setho sa Komiti ea Lekala la Ethiopia o ile a lokolla Phetolelo ea Lefatše le Lecha ka puo ea Seoromo. Lenaneo lena le ile la shebelloa ke bara le barali ba bo rona ba 12 548 ho akarelletsa le bahoeletsi ba 2 000 ba buang Seoromo.

Ka lebaka la khaello ea theknoloji, Sehlopha se Busang se ile sa lumella hore lenaneo lena le rekotoe esale pele ’me le hasoe ka thelevishene. Bahoeletsi ba ne ba boetse ba ka mamela lenaneo lena ka fono.

Bafetoleli ba bahlano ba qetile lilemo tse hlano ba fetolela Bibele ena. Bibele ena e tla ba sesebelisoa sa bohlokoa ka ho fetisisa ho bara le barali ba bo rona ba pakelang batho ba bangata ba buang Seoromo.

Ka mor’a lilemo tse 12 ho sebetsoa ka thata, Phetolelo ea Lefatše le Lecha e ile ea lokolloa ka puo ea Selatvia. Liphutheho tsohle tsa Latvia tsa puo ea Selatvia le Serussia li ile tsa memeloa ho shebella lenaneo lena.

Mora oa bo rona Jouni Palmu, e leng setho sa Komiti ea Lekala la Finland o ile a fana ka puo e lokollang Bibele ena. O ile a re: “Re thabile haholo ho lokollela babali ba Latvia Bibele ena e fetoletsoeng ka puo ea mehleng ena, e bileng e balehang habonolo. Rea tšepa hore e tla etsa hore ho be monate ho bala Bibele le ho thuisa ka eona.”

Mofetoleli e mong ha a bua ka mokhoa oa ho etsa lipatlisiso o teng Bibeleng ena e ncha o ile a re: “Ho bonolo ho sebelisa phetolelo ena ea Bibele e ncha, hape e na le ntho e ’ngoe le e ’ngoe e re thusang ho ithuta le ho nahanisisa ka Lentsoe la Molimo.”

Ho ile ha lokolloa Phetolelo ea Lefatše le Lecha ka puo ea Semarathi sebokeng se neng se tšoaretsoe liphutheho tsohle tsa puo ea Semarathi India. Mora oa bo rona Puneet Aggarwal, e leng setho sa Komiti ea Lekala la India o ile a fana ka puo e lokollang Bibele ena.

Bafetoleli ba tšeletseng ba qetile lilemo tse tharo ba fetolela Bibele ka puo ea Semarathi. E mong oa bafetoleli o ile a re: Phetolelo ena e tl’o thusa batsoali le mesuoe ea Bibele haholo ha ba ruta bana ba bona kapa batho ba thahasellang ho tseba ’nete eo Bibele e e rutang.”

Mofetoleli e mong o ile a re: “Ho thabisa haholo ho tseba hore lebitso la Molimo e leng Jehova le khutliselitsoe moo le neng le hlaha teng meqolong ea pele. Babali ba tla bona lebitso la Jehova hoo e ka bang leqepheng le leng le le leng la phetolelo ena ’me lebitso la Jehova le tla fumana thoriso e le tšoanelang.”

Puo ea Semarathi e buuoa ke batho ba fetang limilione tse 83 India.

Mora oa bo rona Ashok Patel, e leng setho sa Komiti ea Lekala la India o ile a fana ka puo e lokollang Bibele ea Mangolo a Segerike a Bakreste ka puo ea Sebengali. Bahoeletsi ba India le Bangladesh ba fetang 1 200 ba ile ba shebella lenaneo lena.

Puo ea Sebengali e buuoa ke batho ba fetang limilione tse 265 ’me ke puo ea bosupa e buuoang ke batho ba bangata ka ho fetisisa lefatšeng. E le hore ho fetoleloe ka tsela e tla utloisisoa ha bonolo ke batho ba bangata, sehlopha sa bafetoleli ba tsoang libakeng tse fapaneng India le Bangladesh se ile sa kopana ’me sa qeta lilemo tse tharo ho fetolela Bibele ena.

Mora oa bo rona Patel puong ea hae o ile a re: “Sebengali ke puo ea pele lipuong tse buuoang India le Bangladesh ea ho fetolela Bibele. Phetolelo e felletseng ea Mangolo a Segerike a Bakreste e ile ea lokolloa ka 1801. Ntho e ntle haholo ka Bibele ea pele ea Sebengali ke hore lebitso la Molimo e leng Jehova le hlaha moo le neng le lokela ho hlaha. Leha ho le joalo, liphetolelo tsa morao li ile tsa sebelisa tlotla ‘Morena’ bakeng sa lebitso le halalelang. Phetolelo ea Lefatše le Lecha ea Mangolo a Segerike a Bakreste e nepahetse ebile e bonolo.”

E mong oa ba sehlopheng sa bafetoleli o ile a re: “Phetolelo ena ke bopaki ba hore Jehova o rata batho ba lichaba tsohle le hore o batla hore ba ithute ka eena le ka mora oa hae Jesu Kreste.”

Mora oa bo rona Hiroshi Aoki, e leng setho sa Komiti ea Lekala la Myanmar o ile a fana ka puo e lokollang phetolelo ea Mangolo a Segerike a Bakreste ka puo ea Sekaren (sa S’gaw). Lenaneo lena le ile la shebelloa ke batho ba 510 ba tsoang liphuthehong tse tšeletseng le lihlopheng tse ’nè.

Ho fetolela Bibele ka Sekaren (sa S’gaw) ho nkile nako e ka holimonyana ho selemo. E mong oa bafetoleli o ile a re: Bara le barali ba bo rona le batho ba tšimong ba tl’o thabela ho bala Bibele ea Sekaren (sa S’gaw) hobane e khutliselitse lebitso la Jehova moo le neng le le teng pele hape e sebelisa puo e buuoang mehleng ena. Phetolelo ena e hlakile, e nepahetse, hape ho bonolo ho e utloisisa. Re leboha Jehova haholo ka mpho ena eo a re fileng eona e tl’o re thusa ho ba metsoalle ea hae re sebelisa puo e re finyellang lipelo.”

Mofetoleli e mong o ile a re: “Phetolelo ea Lefatše le Lecha e ngotsoe ka puo e buuoang mehleng ena, kahoo e tla thusa babali hore ba utloisise maikutlo a batho ba hlahang ka Bibeleng le maemo a bona hape ba tla khona ho etsisa tumelo ea bona.”

Ruri re thaba le bara le barali ba bo rona ba fumaneng Libibele tsena. Re kholisehile hore ho lokolloa ha Libibele tsena ho tla thusa bahoeletsi ba buang lipuo tsena hore e be metsoalle ea Jehova le hore ba bolelle ba bang ’nete.​—Johanne 17:17.