Na Mathata a Moruo a Tla ke a Fele?

E Bapale

Dinaheng tse ngata, batho ba ipelaetsa ka lebaka la mathata a moruo a teng. Mathata ana a ile a mpefala le ho feta nakong ya sewa sa COVID-19. Nakong eo, ho ile ha eba le merusu ka lebaka la di lockdown, kgaello ya dintho le kgaello ya ditshebeletso tsa bophelo bo botle. Ho ile ha bonahala phapang e kgolo pakeng tsa barui le mafutsana.

Na mathata a moruo a aparetseng lefatshe a tla ke a fele? E. Bibele e bontsha seo Modimo a tla se etsa ho rarolla mathata ao re tobaneng le ona.

Mathata a moruo ao Modimo a tla a rarolla

Bothata: Batho ba hlolehile ho etsa hore boemo ba moruo bo kgotsofatse ditlhoko tsa batho bohle.

Tharollo: Modimo o tla fedisa mebuso ya batho mme e nkelwe sebaka ke Mmuso wa hae. Mmuso oo o tla busa lefatshe lohle o le lehodimong.—⁠Daniele 2:44; Matheu 6:⁠10.

Phello: Ka ha mmuso wa Modimo o tla busa lefatsheng lohle, o tla laola lefatshe ka tsela e phethahetseng. Ho ke ke ha hlola ho eba le bofutsana kapa mathata a moruo. (Pesaleme 9:7-9, 18) Ho e na le hoo, batho ba tla thabela mosebetsi wa matsoho a bona mme ba phele bophelo bo kgotsofatsang le malapa a bona. Bibele e tshepisa sena: “Ba tla haha matlo mme ba dule ho ona, ba tla lema dirapa tsa morara mme ba je ditholwana tsa tsona. Ba ke ke ba haha matlo ebe motho e mong o dula ho ona, ba ke ke ba lema ebe ho ja batho ba bang.”—⁠Esaia 65:21, 22.

Bothata: Batho ha ba kgone ho qoba diketsahalo tse bakang mathata le bofutsana.

Tharollo: A sebedisa Mmuso wa hae, Modimo o tla fedisa dintho tsohle tse etsang hore batho ba tshohe ba be ba ikutlwe ba sa sireletseha.

Phello: Tlasa tlhokomelo ya Modimo, batho ha ba sa tla hlola ba hlahelwa ke maemo a etsang hore bona kapa malapa a bona ba hloke dintho tsa bohlokwa bophelong. Ka mohlala, dintwa, dikgaello tsa dijo le mafu a sewa di ke ke tsa hlola di eba teng. (Pesaleme 46:⁠9; 72:16; Esaia 33:24) Modimo o re: “Setjhaba sa ka se tla dula sebakeng se nang le kgotso, dibakeng tse sireletsehileng le dibakeng tse nang le kgutso.”—⁠Esaia 32:⁠18.

Bothata: Hangata batho ba meharo le ba inahanang bobona ba hatella batho ba bang.

Tharollo: Bafo ba Mmuso wa Modimo ba tla ithuta ho rata ba bang e le ka nnete ho e na le ho inahana bobona feela.—⁠Matheu 22:37-⁠39.

Phello: Tlasa Mmuso wa Modimo, e mong le e mong o tla bontsha lerato le jwalo ka la Modimo, hobane “ha a itjhebe boyena feela.” (1 Bakorinthe 13:4, 5) Bibele e re: “Di ke ke tsa lematsa batho kapa tsa baka tshenyo thabeng yohle ya ka e halalelang hobane hohle lefatsheng batho ba tla tseba Jehova, a Jwalo ka ha metsi a kwahela lewatle.”—⁠Esaia 11:⁠9.

Bibele e bontsha hore re phela mehleng ya bofelo le hore haufinyane Modimo o tla phethahatsa tshepiso ya hae ya ho fedisa mathata ohle a moruo. b (Pesaleme 12:⁠5) Ha re ntse re emetse seo, melaomotheo ya Bibele e ka o thusa ho sebetsana le mathata a moruo ao o tobaneng le ona hona jwale. Ka mohlala, sheba dihlooho tse reng, “O ka Phela ka Tjhelete e Nyenyane Jwang?” le se reng, “E-ba le Maikutlo a Nepahetseng ka Chelete.”

Maikutlo a fosahetseng ka Bibele le ditaba tsa moruo

Maikutlo a fosahetseng: Bofutsana bo ke ke ba fela hobane Jesu o ile a re: “Le tla dula le ena le bafutsana.”—⁠Matheu 26:⁠11.

Nnete: Jesu o ne a mpa a bua nnete ya taba: Ha feela lefatshe lena le hlokang toka le ntse le le teng, ho tla dula ho e na le mafutsana. Le ha ho le jwalo, molaetsa wa Jesu o tliseditse “bafutsana ditaba tse monate,” tse akarelletsang tshepiso ya hore Mmuso wa Modimo o tla fedisa bofutsana ka ho sa feleng.—⁠Luka 4:18, 43.

Maikutlo a fosahetseng: E le hore batho ba kgahlise Modimo ba lokela ho futsaneha hobane Jesu o ile a re: “Tsamaya o rekise dintho tsa hao ebe o fa bafutsana tjhelete eo.”—⁠Matheu 19:⁠21.

Nnete: Jesu o ne a sa behele balatedi ba hae molao wa hore na ba lokela ho phela jwang. O ne a fana ka keletso e tobileng ho mohlankana ya neng a amehile haholo ka maruo a hae. Jesu o ile a kgothalletsa monna eo hore a nolofatse bophelo ba hae mme a amohele memo ya ho ba e mong wa balatedi ba hae.

Maikutlo a fosahetseng: Modimo o hlohonolofatsa batho ka leruo, hobane Bibele e re: “Tlhohonolofatso e tswang ho Jehova e ruisa motho.”—⁠Diproverbia 10:⁠22.

Nnete: Ka Bibeleng, “tlhohonolofatso e tswang ho Jehova” hangata e bua ka maruo a moya, a kang bophelo bo nang le morero, kamano e ntle le Modimo le tshepo ka bokamoso. (Pesaleme 25:14; Johanne 17:⁠3) Le hoja Modimo a ile a hlohonolofatsa ba bang ba bahlanka ba hae ka maruo, boholo ba batho bao e ileng ya eba Bakreste ba ne ba sa rua. (Genese 24:34, 35; Jakobo 2:⁠5) Esita le Jesu Kreste o ne a se na dintho tse ngata tse bonahalang.—⁠Matheu 8:⁠20.

Maikutlo a fosahetseng: Bibele e ruta ka bokomonisi, ka ha e re ka Bakreste ba lekgolong la pele la dilemo: Ba ne ba “arolelana dintho tsohle. Ba ne ba rekisa dintho tsa bona.”—⁠Diketso 2:44, 45.

Nnete: Ditemana tsena di hlalosa tokisetso ya nakwana e ileng ya etswa ho thusa ba bang ba neng ba sa tswa ba Bakreste ka dintho tseo ba di hlokang. Qalong batho bana ba ne ba ile Jerusalema ho ya moketeng wa Bajuda wa Pentekonta. (Diketso 2:⁠5) Empa ha eba Bakreste, ba ile ba dula Jerusalema nako e teletsana ho feta ka moo ba neng ba lebeletse ka teng, e le hore ba ithute ho eketsehileng ka tumelo ya bona e ntjha. Ka lebaka leo, Bakreste mmoho le bona ba ile ba ithaopela ho fana ka thepa ya bona e le hore ba ba thuse ka dijo le marobalo.—⁠Diketso 2:41, 42, 46, 47.

a Lebitso la Modimo ke Jehova jwalo ka ha Bibele e bolela.—⁠Pesaleme 83:⁠18.

b E le ho tseba hore na ke hobaneng ha o ka tshepa Bibele, sheba sehlooho se reng, “Bibele e Nepahetse Dinthong Tsohle.”

O ka Nna wa Rata le Tsena

TORA YA HO LEBELA

Mmuso wa Modimo o Tla Finyella Eng?

Jesu o ne a tseba hore ke Mmuso wa Modimo feela o ka rarollang mathata a batho. Mmuso wa Modimo o se o entse eng ho re kgodisa hore o tla feela o re kgotsofatse?

Dipaki Tsa Jehova