Ho Tite 1:1-16
1 Nna Pauluse ke lekgoba la Modimo ke bile ke moapostola wa Jesu Kreste. Tumelo ya ka e dumellana le ya bakgethwa ba Modimo le tsebo e nepahetseng ya dithuto tsa nnete. Nnete eo e amana le ho sebeletsa Modimo ka botshepehi.
2 Tumelo ya ka e thehilwe hodima tshepo ya bophelo bo sa feleng+ boo Modimo ya ke keng a bua leshano,+ a ileng a bo tshepisa kgale.
3 Ka nako ya hae e loketseng, o ile a tsebahatsa lentswe la hae ka mosebetsi wa boboledi oo ke ileng ka tshepelwa ho o etsa+ ho ya ka taelo ya Mopholosi wa rona, Modimo.
4 Ke ngolla Tite, ngwanaka wa sebele ebile e le Mokrestemmoho le nna:
E se eka Modimo Ntate wa rona le Mopholosi wa rona Jesu Kreste ba ka ba mosa* ho wena le ho o fa kgotso.
5 Ke ile ka o siya Kreta e le hore o ka lokisa dintho tse hlokang ho otlollwa* le hore o ka kgetha baholo motseng o mong ka mora o mong jwalo ka ha ke o laetse:
6 Moholo e lokela ho ba motho eo ho seng letho leo a qoswang ka lona, a be le mosadi a le mong, bana ba hae e be badumedi ba sa tsebahaleng ka ho ba hlaha kapa ho ba marabele.+
7 Ka ha moholo ke mohlanka wa Modimo, o lokela hore a se ke a ba le letho leo a qoswang ka lona, a se ke a tsitlella thato ya hae,+ a se ke a rata ho halefa,+ e se ke ya eba letahwa, a se ke a rata ho lwana,* a se ke a ba meharo ya ho fumana leruo ka bolotsana.
8 Empa e be motho ya amohelang baeti,+ ya ratang ho etsa dintho tse lokileng, ya nang le kelello,*+ ya lokileng, ya tshepahalang,+ ya itshwarang.+
9 Tsela eo a rutang ka yona e be tumellanong le lentswe le tshepahalang*+ e le hore a ka kgona ho kgothatsa* ka thuto e nepahetseng*+ le ho kgalemela+ ba hanyetsang.
10 Etswe ho na le banna ba bangata ba marabele, ba thetsang, ba buang haholo empa ba se na thuso, haholoholo ba tsitlellang taba ya lebollo.+
11 Ba lokela ho kwalwa melomo ka ha banna bana ba ntse ba senya tumelo ya malapa ka ho ruta dintho tse fosahetseng e le hore ka bolotsana ba iphumanele maruo.
12 E mong wa bona, moprofeta wa bona o ile a re: “Bakreta ke batho ba leshano, dibata tse kotsi le menyollo e botswa.”
13 O ne a bua nnete. Ka lebaka lena o nne o ba kgalemele ka matla e le hore ba be le tumelo e matla,*
14 ba se ke ba mamela ditshomo tsa Bajuda le ditaelo tsa banna ba furallang dithuto tsa nnete.
15 Dintho tsohle di hlwekile ho batho ba hlwekileng.+ Empa ho batho ba silafetseng le ba se nang tumelo ha ho letho le hlwekileng hobane dikelello tsa bona ha mmoho le matswalo a bona di silafetse.+
16 Ba bolela hore ba tseba Modimo empa ba mo latola ka diketso+ hobane ba a nyonyeha, ha ba mamele ebile ha ba tshwanelehe ho etsa mesebetsi efe kapa efe e lokileng.
